Среброто на историски максимум поради берзанскиот хаос во Лондон

Цената на среброто достигна рекордно ниво од речиси 53 долари за унца, откако пазарниот притисок во Лондон го засили растот поттикнат од зголемената побарувачка за сигурни вложувања.

Спот цената порасна за околу 1 отсто, достигнувајќи 52,89 долари за унца во Лондон, со што го надмина претходниот врв од јануари 1980 година – кога браќата милијардери Хант се обидоа да го преземат пазарот преку договор на тогашниот Чикашки одбор за трговија. Цената на златото исто така забележа нов историски максимум, продолжувајќи раст осма недела по ред..

Грижите околу недостигот од ликвидност во Лондон предизвикаа глобална трка по сребро, при што референтните цени достигнаа речиси невидени нивоа во однос на оние во Њујорк. Некои трговци дури резервираат товарен простор во трансатлантски летови за транспорт на сребрени прачки – скап начин што обично се користи само за злато – за да профитираат од повисоките цени во Лондон.

Премијата во раното тргување во вторникот изнесуваше околу 1,15 долар по унца, намалена од разликата од 3 долари минатата недела.

Благородните метали годинава се во рекордна серија на раст 

Bloomberg

Стапките за позајмување сребро – кои го претставуваат годишниот трошок за задолжување метал на лондонскиот пазар – останаа високи цела година, но во петокот скокнаа на повеќе од 30 отсто на едномесечна основа. Тоа создава енормни трошоци за инвеститорите.

Зголемената побарувачка од Индија во последните недели дополнително ја намали понудата на достапни сребрени прачки за тргување во Лондон, откако на почетокот од годината големи количества беа пренесени во Њујорк. Тоа се случи поради стравувањата дека металот би можел да биде погоден со американски царини, што предизвика големи нарушувања меѓу двата трговски центра.

Иако благородните метали официјално беа ослободени од царини во април, трговците и натаму се воздржани пред заклучокот на американската истрага според т.н. Секција 232 за критичните минерали – која ги опфаќа среброто, платината и паладиумот. Истражувањето повторно ги разгоре стравувањата дека металите би можеле да бидат опфатени со нови царини, што дополнително би ја заострило состојбата на пазарот.

Пазарот на сребро е помалку ликвиден и околу девет пати послаб од оној на златото, што ги засилува ценовните осцилации, наведоа аналитичарите на „Голдман Сакс“ (Goldman Sachs Group Inc.).
„Бидејќи централните банки не интервенираат за да ја стабилизираат цената на среброто, дури и краткотрајно повлекување на инвестициите може да предизвика несразмерен пад и да го ублажи недостигот во Лондон, кој го поттикна неодамнешниот раст“, се наведува во нивната белешка.

Стапките за позајмување сребро скокнаа над 30 отсто

Пазарот се затегнува поради силната индиска побарувачка и празнењето на лондонските трезори

Bloomberg

Четирите главни благородни метали – злато, сребро, платина и паладиум – годинава се зголемени меѓу 56 и 81 отсто, во раст што доминира на пазарите на суровини.

Растот на златото се потпира на зголеменото купување од централните банки, повисоките вложувања преку фондови со размена на хартии од вредност (ETF) и на намалувањето на каматните стапки од Федералните резерви на САД.

Побарувачката за сигурни вложувања дополнително ја поттикнуваат трговските тензии меѓу САД и Кина, заканите за независноста на Фед и затворањето на американската влада.

„Нема разумна причина да се оди против трендовите кај златото и среброто“, изјави инвеститорот од Сингапур Шјам Девани.
„Станува сè појасно дека трендовите се забрзуваат и веројатно ќе продолжат, затоа што слабите влади, лошите буџетски позиции и неизвесните монетарни политики придонесуваат за растот на цената на двата метала“, додаде тој.

Аналитичарите на Банката на Америка (Bank of America Corp.) во понеделникот ја зголемија својата проекција за цената на среброто на крајот од 2026 година од 44 на 65 долари за унца, наведувајќи постојан пазарен дефицит, зголемени буџетски дефицити и пониски каматни стапки.

Инвеститорите во меѓувреме го проценуваат патот на монетарното олабавување на Федералните резерви пред следната одлука за каматните стапки кон крајот на овој месец. Претседателката на разгранокот на Фед во Филаделфија, Ана Полсон, најави дека поддржува уште две намалувања на каматите годинава, наведувајќи дека политиката треба да ја игнорира краткорочната инфлација предизвикана од тарифите.

Ниските каматни стапки ја зголемуваат привлечноста на благородните метали, кои не носат камата. Спот цената на златото утрово во Сингапур се зголеми за 0,7 отсто, на 4.140,82 долари за унца, по растот од 2,3 отсто во понеделникот. Индексот Bloomberg Dollar Spot остана речиси непроменет, додека среброто порасна за 0,9 отсто, а платината и паладиумот исто така забележаа скок.