Поевтините конкуренти на златото скокнаа на повеќегодишни максимуми

Среброто го продолжи растот на 13-годишен максимум, а платината достигна највисоко ниво од почетокот на 2022 година, сигнализирајќи го растечкиот апетит на инвеститорите за скапоцени метали што се користат во клучните индустрии.

Спот цените на двата метала денеска продолжија да растат по скоковите од повеќе од четири проценти во претходната сесија. Златото порасна со побавно темпо.

Металите беа потпомогнати од техничкиот моментум, како и од подобрувањето на фундаменталните показатели, со силен апетит за среброто во Индија и повторно зголемената побарувачка за платина во Кина. Тоа дополнително го засили растот, според белешката на Ники Шилс, раководител на стратегијата за метали во „МКС Памп“ (MKS PAMP SA) со седиште во Женева.

Bloomberg

 

Среброто и платината обично се тргуваат заедно со златото, кое се смета за засолниште во време на геополитичка неизвесност. Златото годинава порасна за 28 проценти бидејќи растечката трговска војна предводена од САД ја зголеми неговата привлечност, а централните банки одржуваа покачени нивоа на купување.

Среброто и платината заостануваа, но сега го достигнуваат, со раст од 25 и 28 проценти соодветно од почетокот на годината. И двата метала се поттикнати од осцилациите на индустриската побарувачка.

Среброто е клучен импут во фотоволтаичните соларни панели, додека платината се користи во каталитичките конвертори во моторите со согорување и лабораториската опрема. И двата пазари годинава се движат кон дефицит по неколку години во кои побарувачката ја надмина понудата.

Држењето над 35 долари за унца останува „критична пресвртна точка“ за среброто и, доколку се одржи, треба повторно да го разгори интересот на малопродажбата, рече Шилс. Во меѓувреме, потенцијалното обновување на побарувачката за берзанско тргување со фондови со платина би можело да предизвика шпекулативен раст, со оглед на тоа што нестабилните и зголемени каматни стапки укажуваат дека пазарот се стеснува, рече таа.

Bloomberg Mercury

 

Вложувањата во ЕТФ-ови со платина покажуваат знаци на закрепнување и пораснаа за повеќе од три проценти од средината на мај, според податоците собрани од „Блумберг“. Приливите во ЕТФ со сребро продолжија да растат од почетокот на февруари, со пораст на вложувањата од осум проценти.

Паладиумот, исто така, имаше корист од растечкото позитивно расположение низ целиот комплекс на скапоцени метали, искачувајќи се денеска за дури два отсто.

Цената на среброто порасна за 1,6 проценти, на 36,22 долари за унца во 9:50 часот наутро на берзата во Лондон. Платината порасна за 2,1 отсто, додека златото се искачи за 0,4 проценти. Индексот Bloomberg Dollar Spot малку се промени.

Инвеститорите со нетрпение го очекуваат клучниот извештај за работни места во САД што треба да биде објавен подоцна во текот на денот, по неочекуваниот скок на барањата за надомест за невработеност што ги зголеми облозите дека Федералните резерви ќе ги намалат каматните стапки најмалку уште два пати оваа година. Пониските трошоци за позајмување обично се во корист на златото и другите скапоцени метали, бидејќи тие немаат камата.