Стравот од санкции привремено ги кочи испораките на руска нафта кон Кина

Проширените санкции врз кинеските пристаништа и рафинерии ги задушуваат испораките на руска и иранска нафта кон најголемиот увозник во светот, иако новите механизми за заобиколување на мерките сугерираат дека забавувањето може да биде краткотрајно.

Големите државни преработувачи привремено ги стопираа набавките на ЕСПО, суровата нафта што го сочинува најголемиот дел од кинескиот увоз од Русија по американските санкции врз компаниите „Роснефт“ (Rosneft PJSC) и „Лукоил“ (Lukoil PJSC). Насочувањето на Вашингтон кон нафтениот терминал во Рижао, кој обработуваше околу една десеттина од кинескиот увоз на сурова нафта, дополнително ги намали иранските испораки.

И некои од приватните рафинерии, кои обично преземаат поголем ризик при купување нафта што е под ризик од санкции, така избегнуваат да го купуваат овој вид сурова нафта од рускиот Далечен Исток. Нивната внимателност доаѓа поради ставањето на „Шандонг Јулонг петрокемикал“ (Shandong Yulong Petrochemical Co.) на црната листа од Европската Унија и Обединетото Кралство, компанија што важеше за еден од најголемите купувачи на руска нафта.

Сето ова внесе силна доза на претпазливост меѓу купувачите.

Bloomberg

Зголемениот страв е она што ги издвојува најновите американски мерки од претходните западни ограничувања, вели Вандана Хари, основачка на сингапурската аналитичка компанија „Ванда инсајтс“ (Vanda Insights). „Американските санкции врз ‘Роснефт’ и ‘Лукоил’ може да бидат извесен пресврт.“

Нервозата кај кинеските купувачи се случува во момент кога и индиските рафинерии ги намалуваат своите набавки на руска нафта, што покажува дека западните напори да го лишат Кремљ од финансии за војната во Украина конечно почнуваат да даваат ефект. Но издржливоста на веќе санкционираните пристаништа, како Донгџјаку во провинцијата Шандонг, сугерира дека испораките би можеле повторно да пораснат доколку нема строга контрола и спроведување.

Според процена на аналитичката компанија „Ристад енерџи“ (Rystad Energy AS), кинескиот увоз на руска сурова нафта по морски пат овој месец може да се намали за 500.000 до 800.000 барели дневно – или до две третини под нормалното ниво. Испораките од Иран, пак, може да паднат за 200.000 до 400.000 барели дневно или до 30 отсто.

Постои сè поголем вишок на ризична нафта што тешко наоѓа купувач, вели Ема Ли, водечки експерт за кинескиот пазар во компанијата за следење на танкери и пазарна интелигенција „Вортекса“ (Vortexa Ltd.). Приватните кинески рафинерии, т.н. „типотс“ (teapots), се соочуваат со недостиг од квоти за увоз, а продавачите се очајни да се ослободат од барелите – што ги турка цените надолу, рече таа.

Увозот на иранска нафта во Кина, за која пристаништето Рижао е клучна влезна точка, останува слаб откако тоа пристаниште беше санкционирано во октомври поради врските со производителот од Персискиот Залив. Веќе високите резерви во Шандонг и недостигот од увозни квоти кај приватните рафинерии исто така ја намалуваат побарувачката за тие барели, покажуваат податоците на „Вортекса“.

Иранска нафта останува на море поради слаба побарувачка во Кина

Задржаните количества се на највисоко ниво од мај 2023 година

Bloomberg

Според „Кплер“ (Kpler), количеството иранска сурова нафта што останува на море достигна речиси 48 милиони барели на крајот на минатата недела, најмногу во повеќе од две години. Околу 40 проценти од оваа нафта се наоѓа во теснецот Сингапур, а исто толку има и во Жолто Море и во Јужно Кинеско Море, соопшти аналитичката компанија.

Постојат и поголеми количества на ЕСПО, кој според трговците се нуди со попуст од околу 4 долари по барел во однос на референтната цена за испораките кон Кина – значително повеќе од јазот од 50 центи на крајот на октомври.

Таквите цени би можеле да бидат премногу примамливи за некои кинески рафинерии, кои може повторно да посегнат по старите практики: исклучување на транспондерите и преточување од брод на брод за да се скрие потеклото на купената сурова нафта.

Пристаништето Донгџјаку исто така се појавува како важна рута за ризични видови нафта. Тоа беше санкционирано од САД во август, што го зголемува ризикот за трговците, сопствениците на танкери и финансиерите што би биле вклучени во неговото користење. Но, по кратко намалување на испораките, пристаништето повторно обработува големи количества иранска нафта, што укажува дека за некои купувачи можната добивка и понатаму е поважна од потенцијалните казни.

Тековното забавување во набавките на руска и иранска нафта може делумно да се должи и на недостигот од увозни квоти за приватните рафинерии, бидејќи се приближува крајот на годината. Тоа може да ги натера да побараат дополнителни квоти од владата.

Дури и ако се одобрат дополнителни квоти, некои од кинеските рафинерии веројатно ќе го применат пристапот „да почекаме и да видиме“ кога станува збор за купувањето руска нафта, за да видат колку строго ќе се применуваат санкциите, вели Јанан Сон, аналитичарка во консултантската компанија „Енерџи аспектс“ (Energy Aspects Ltd.). „Ќе биде потребно време за да се воспостават нови канали за набавка и нови синџири на снабдување.“