Цената на нафтата расте по потврдата на ОПЕК+ за пауза во производството и фокус кон Венецуела

Цената на нафтата порасна откако ОПЕК+ потврди дека ќе се придржува до планот да направи пауза во зголемувањето на производството во првиот квартал, додека трговците ја анализираа реакцијата на пазарите по реториката на американскиот претседател Доналд Трамп околу Венецуела.

Брентот се тргуваше близу 63 долари за барел, а ВТИ беше над 59 долари. Групата производители предводени од Саудиска Арабија ја повторија тримесечната пауза – првпат најавена на почетокот на минатиот месец – по состаноците во неделата. ОПЕК+ повторно соопшти дека потегот ја одразува послабата сезонска побарувачка на пазарот.

Цената на нафтата расте по паузата на зголемувањето на производството во ОПЕК+, со фокус на Венецуела

Фјучерсите под притисок поради растечкиот вишок на пазарот

Bloomberg

Цената на нафтата во ноември го забележа четвртиот последователен месечен пад, бидејќи очекувањата за растечки вишок ја притискаа прогнозата. Меѓународната агенција за енергија предвидува рекорден вишок во 2026 година. Сепак, геополитичките тензии на Блискиот Исток и во други региони често ги одржуваа цените повисоки годинава.

„Иако изгледите за пазарот се негативни поради очекуваниот голем вишок, присутните ризици од нарушување на снабдувањето значат дека пазарната слабост побавно се одразува во цените“, изјави Варен Патерсон, раководител за стратегија за суровини во сингапурската канцеларија на ИНГ (ING Groep NV).

Во саботата Трамп го засили притисокот врз Венецуела со предупредување дека авиокомпаниите треба да го сметаат воздушниот простор над и околу земјата за затворен, иако во неделата ги минимизираше тие коментари. Сепак, американските сили се зголемуваат во регионот, што ја одржува напнатоста на пазарот.

Во меѓувреме американски и украински преговарачи изјавија дека имале продуктивни разговори за рамката за мировниот договор, но нема конечен напредок иако Трамп продолжува да притиска за примирје со Русија. Потенцијалното примирје би можело да доведе до олеснување на санкциите кон Москва и зголемување на извозот на сурова нафта од земјата.

„Во моментов геополитиката и дисциплината на ОПЕК+ повеќе дејствуваат како сили што ја спречуваат нафтата да продолжи да паѓа, отколку како поттикнувачи за трајно поскапување“, изјави Чару Чанана, главен инвестициски стратег во „Саксо маркетс“ (Saxo Markets) во Сингапур. Станува збор за „ризик од насловни вести и спречување подлабока распродажба“, додаде таа.