Среброто влегува во својата „златна доба“ - побарувачката ќе експлодира во 2026 година

Цените на среброто во 2025 година достигнаа невидени нивоа, растејќи со брзина што не се памети во поновата историја. По октомври, кога цената за унца премина 54 долари, белиот благороден метал брзо надмина и 57 долари, двојно зголемувајќи ја својата вредност во однос на почетокот на годината. Истовремено речиси е извесно дека Фед в среда по третпат ќе ги намали каматните стапки, што ќе создаде дополнителен импулс за металите, бидејќи пониските каматни стапки ја намалуваат атрактивноста на традиционалните инвестиции и ја слабеат вредноста на доларот.

За разлика од златото, кое традиционално се смета за најсигурно засолниште во турбулентни времиња, среброто сега води своја битка - поддржана од инвестициски, но и индустриски фактори. Неговата повеќекратна примена во различни растечки индустрии е клучен адут за неговиот раст, што го прави металот да „лета“, додека златото стагнира.

Глобални фактори што ја поттикнуваат цената

Растот на цената на среброто е делумно резултат на глобалната неизвесност на финансиските пазари, предизвикана од геополитичките тензии, промените во економските политики и најавите за нови царини од страна на американската администрација. Инвеститорите избегаа од ризичните средства, барајќи посигурни алтернативи, додека индустријата бележи рекордна побарувачка за суровини.

Со својата исклучителна спроводливост, среброто е неопходно во производството на електрични возила, батерии, 5Г-опрема, електроника, медицински уреди и роботика. Освен тоа, среброто игра особено важна улога во соларната индустрија, каде што го користат во форма на паста за производство на фотоволтаични ќелии. Како што расте инсталирањето соларни системи, така побарувачката го надминува капацитетот на рудниците.

Bloomberg

Проблеми во понудата и рударски ограничувања

Предизвиците во понудата и ограничувањата во рударството значат дека среброто се соочува со долгорочни проблеми. Најголемите производители - Мексико, Перу и Кина - се подложени на регулаторни притисоци и еколошки пречки, што дополнително го ограничува извозот.

Во Лондон, доминантниот пазар за спот трговија, резервите на сребро значително се намалени, додека за време на индискиот фестивал во октомври тие останаа под голем притисок поради високото повлекување на инвеститорите. Цената за позајмување сребро достигна рекордни нивоа, а самата спот цена скокна, што дополнително ги нагласи тензиите на пазарот.

Bloomberg

Индустриска побарувачка и очекувања за наредните години

Среброто, поради својата индустриска примена, е особено чувствително на макроекономските промени. Кога глобалната економија забрзува, индустриската побарувачка ги турка цените нагоре, додека инвеститорите реагираат во периоди на рецесија или геополитичка неизвесност. Поради својата индустриска примена, инвестициската вредност и пониската цена во однос на златото, среброто е особено привлечна опција за инвеститорите што сакаат да го диверзифицираат своето портфолио или да ја искористат можноста за шпекулативни вложувања.

Анализите покажуваат дека индустриската побарувачка за сребро до 2030 година може да ги надмине производствените капацитети, што ќе создаде дополнителен притисок на цените и ќе отвори нови можности за инвеститорите.

 

Пазар на благородни метали

Цените на златото во 2025 година исто така забележаа силен раст, поттикнати од потрагата по сигурни инвестиции и ефектите на лажливите економски политики. Сепак, среброто годинава ја презеде главната улога, со раст од 100 отсто до почетокот на декември, за разлика од златото, кое порасна околу 60 отсто.

Цената на среброто, во однос на златото, e подложна на нестабилност поради „потенкиот“ пазар (помал по обем и ликвидност) и ограничените резерви, а таквиот микс ја зголемува интензивноста на пазарните движења.

Кина и Индија остануваат најголеми потрошувачи на сребро, благодарение на огромните индустриски бази, големиот број жители и традиционалната улога на сребрениот накит како средство за чување вредност. Покрај индустриската и инвестициската употреба, владите и ковачниците трошат значителни количества сребро за производство на монети и други производи.

Сè на сè, оваа година покажа дека среброто веќе не е само „помалиот брат“ на златото, туку клучна суровина и инвестициски инструмент со своја сила и динамика. Индустриската побарувачка, ограничената понуда и глобалната пазарна неизвесност ја зголемуваат цената на овој метал до рекордни нивоа и создаваат потенцијал за понатамошен раст во следните години. За инвеститорите, среброто нуди можност да учествуваат на пазарот на метали што се одликуваат со висока волатилност, силна индустриска побарувачка и јасни геополитички и економски поттикнувачи - во практика, тоа ги зголемува шансите за профит (но и ризик), подразбира побрзо движење на цените и можност за диверзификација и, што е еднакво важно, потребен е помал капитал за влез на пазарот на благородни метали.