Златото и среброто уриваат рекорди поради судирот со ФЕД и тензиите во Иран

Златото и среброто се искачија на рекордни нивоа откако Министерството за правда на САД се закани со кривично гонење против Фед, повторно отворајќи прашања за независноста на институцијата, додека протестите во Иран ја зголемија побарувачката за сигурни инвестиции.

Жолтиот метал скокна кон 4.600 долари за унца, додека среброто се доближи до 85 долари, откако претседателот на Федералните резерви, Џером Пауел, изјави дека евентуалното обвинение „треба да се гледа во поширок контекст на заканите и континуираниот притисок од администрацијата“ за влијание врз одлуките за каматните стапки. По неговите коментари, доларот ослабе, а приносите на американските 10-годишни државни обврзници благо пораснаа. Континуираните напади врз Федералните резерви минатата година од страна на администрацијата на Трамп беа клучен фактор за слабеењето на доларот и поддршката на растот на златото.

Во меѓувреме, смртоносните протести во Иран ја зголемија привлечноста на благородните метали како безбедно засолниште, поради можноста Исламската Република да биде соборена. Американскиот претседател Доналд Трамп во неделата изјави дека разгледува потенцијални опции во однос на Иран, при што повторно се закани со преземање на Гренланд и ја доведе во прашање вредноста на воената алијанса - НАТО, нешто повеќе од една недела откако го собори венецуелскиот лидер Николас Мадуро.

Златото го продолжи растот и достигна нов историски максимум
Новите напади врз Федералните резерви, тензиите во Иран и американските податоци ги туркаат цените нагоре

Bloomberg

Благородните метали се во средиштето на силна нагорна ревалоризација, поттикната од спој на поволни фактори што ја засилија побарувачката. Меѓу двигателите се падот на каматните стапки во САД, зголемените геополитички тензии, намалената доверба во американскиот долар и притисокот врз Федералните резерви, кои му дадоа поддршка на растот на златото и среброто. Повеќе од десетина управители на фондови велат дека одлучиле да не повлекуваат значителни добивки од позициите во злато, задржувајќи уверување во неговата долгорочна привлечност.

„Ова е потсетник за бројните неизвесности со кои се соочуваат пазарите: геополитиката, дебатата околу растот и каматните стапки, а сега и нов потсетник, преку насловите, за институционален ризик“, изјави Чару Чанана, главен инвестициски стратег во „Саксо маркетс“ (Saxo Markets) во Сингапур.

Во меѓувреме, Врховниот суд на САД во среда треба да ја соопшти одлуката која се однесува на царините на Трамп. Одлука против тие давачки би ја поткопала неговата клучна економска политика и би претставувала најголем правен пораз откако се врати во Белата куќа.

Среброто скокна за речиси 6 отсто, достигнувајќи рекордни 84,6090 долари за унца. Белиот метал минатата година порасна за речиси 150 отсто, откако историски „short squeeze“ го зафати пазарот во октомври, а доминантниот спот-пазар во Лондон и натаму се соочува со ограничена понуда, бидејќи стравувањата од царини го спречуваат пренасочувањето на металот од преполните магацини во САД.

„Очекуваме дефицитот на пазарот на сребро да продолжи и во текот на 2026 година, првенствено поради зголемената инвестициска побарувачка“, соопшти „БМИ“ (BMI), единица на „Фич солушнс“ (Fitch Solutions Inc.), во анализа објавена во понеделникот, додавајќи дека и индустриската побарувачка ја доведе физичката понуда на сребро на исклучително ниско ниво.

Трговците, исто така, ги следат резултатите од американската истрага за национална безбедност, која може да отвори пат за воведување царини за увоз на сребро, платина и паладиум. Извештајот се очекува во јануари.

Податоците за вработеноста во САД објавени минатата недела не ги разнишаа очекувањата дека каматните стапки ќе продолжат да се намалуваат, што дополнително ги поддржа цените на благородните метали. Пазарите очекуваат најмалку две намалувања годинава, по трите последователни намалувања што ги спроведоа Федералните резерви во втората половина од минатата година.

„Послабите податоци од американскиот пазар на труд ги засилија очекувањата дека Фед ќе преминат кон намалување на каматите порано и поагресивно од претходно очекуваното“, напиша во аналитичка белешка Пријанка Сачдева, виш пазарен аналитичар во брокерската куќа „Филип Нова“ (Phillip Nova Pte) од Сингапур. Таа додаде дека ваквиот пресврт ги прави вложувањата со камата помалку атрактивни, што ја зголемува привлечноста на златото и другите средства што не носат принос.

Златото поскапе до 2 отсто и се тргуваше со раст од 1,6 отсто на 4.584,44 долари за унца во 15:31 часот по сингапурско време. Индексот Bloomberg Dollar Spot се намали за 0,2 отсто. И паладиумот и платината пораснаа за повеќе од 3 отсто.