Цената на среброто падна откако Трамп се откажа од царините за критични минерали

Среброто забележа пад откако инвеститорите почнаа да ги реализираат добивките по силниот раст, а и поради одлуката на САД да не воведат увозни царини за критични минерали.

Цената на белиот метал се намали за дури 7,3 отсто во четвртокот, откако претходно достигна рекордно ниво од 93,7515 долари за унца. Тоа уследи по раст од повеќе од една петтина во претходните четири трговски сесии. Пад забележа и златото.

Американскиот претседател Доналд Трамп изјави дека ќе преговара за билатерални договори за обезбедување соодветни количини критични минерали, при што спомена можност за утврдување минимални цени, но не ја исклучи целосно можноста за воведување царини. Стравувањата од такви мерки доведоа до задржување на дел од испораките, вклучително и среброто, во магацини во САД, што придонесе за глобален недостиг минатата година и продолжи да ги поддржува цените и во 2026 година.

Среброто минатата година го надмина златото со раст од речиси 150 отсто, при што дел од инвеститорите се насочија кон него откако „жолтиот метал“ стана прескап. Дополнителна поддршка доаѓа од индустриската побарувачка, особено од соларниот сектор каде што се користи во панели, додека шпекулативното купување во Кина во последните недели го засили нагорниот тренд.

Bloomberg

Среднорочната слика за среброто и натаму останува поволна, поткрепена од недостиг на понуда, силна индустриска побарувачка и прелевање на побарувачката од златото, вели Кристофер Вонг, стратег во „Оверси-чајниз банкинг груп“ (Oversea-Chinese Banking Group). Сепак, како што посочува, „интензитетот на неодамнешните движења бара одредена претпазливост на краток рок“.

Златото и среброто оваа недела имаа корист од поширокото насочување на инвеститорите кон стоките, што ги однесе благородните метали до рекордни нивоа, заедно со калајот и бакарот. Обновените напади на администрацијата на Трамп врз Федералните резерви ги поддржаа цените и повторно ја разгореа трговијата „продај ја Америка“. Апсењето на лидерот на Венецуела од страна на САД, повторените закани за преземање на Гренланд, како и нестабилната ситуација во Иран, исто така ја поттикнуваат побарувачката за сигурни вложувања.

Во последните недели, среброто е склоно кон нагли ценовни осцилации, при што е забележан скок на неговиот 14-дневен експоненцијален просечен вистински опсег – индикатор за пазарна волатилност. Тоа, според аналитичарите, веројатно се должи на технички фактори, а не на фундаментални двигатели.

„Голем дел од она што трговците го гледаат на екраните одразува принудни пазарни текови, динамика на маргините, заштита од ризик преку опции и затворање кратки позиции, наместо вистинско формирање цени врз основа на понуда и побарувачка“, напиша Оле Хансен, директор за стратегија за стоки во „Саксо банка“ (Saxo Bank AS), во објава на социјалните мрежи. „Во ваква средина, техничките нивоа ја губат својата сигурност, стоп-налозите лесно се активираат, а дури и исправните макроекономски проценки тешко опстануваат во краткорочниот пазарен шум.“

Трговците внимателно го следеа исходот од истрагата на Министерството за трговија на САД за тоа дали увозот на овој метал и други критични минерали претставува закана за националната безбедност.

Одлуката на Трамп да се воздржи од воведување увозни царини „укажува дека администрацијата ќе примени попрецизен пристап при идните одлуки“, наведува Даниел Гали, висок стратег за стоки во „ТД секјуритис“ (TD Securities), во аналитичка белешка. Тоа, според него, „значително ги намалува стравувањата од сеопфатен пристап кој ненамерно би можел да влијае врз физичките резерви што ја поддржуваат референтната цена на металите“.

Среброто падна за 6 отсто, на 87,7795 долари за унца, заклучно со 13 часот по сингапурско време. Златото се намали за 0,7 отсто, на 4.591,51 долар. Платината и паладиумот исто така забележаа пад од повеќе од 2 отсто. Индексот Bloomberg Dollar Spot Index остана непроменет.

Според најновото истражување на „Марект Пулс“ (Markets Pulse), растот на златото продолжува и по јануари. Иако среброто и бакарот достигнаа слични пресвртници, се појавуваат знаци дека приливот на овие метали слабее, бидејќи инвеститорите ја преиспитуваат одржливоста на ограничувањата во понудата.