Среброто нагло потона за околу 17 отсто

Среброто нагло падна, бришејќи го дводневното закрепнување. Исто така се намали и цената на златото.

Цената на среброто се намали за цели 17 отсто, откако накратко се искачи на над 90 долари за унца за време на раното тргување во Азија. По рекордните цени кои изгледаа дека одат премногу далеку и премногу брзо, металот се повлече за повеќе од една третина од историскиот максимум достигнат на 29 јануари.

„Сентиментот изгледа дека омекна низ повеќето класи на средства, вклучувајќи регионални акции и метали,“ рече Кристофер Вонг, стратег во „Оверси чајниз бенкинг“ (Oversea-Chinese Banking). Ова создаде „повратна спирала во услови на тенка пазарна ликвидност,“ додаде тој.

Наглиот и остар пад на благородните метали исто така влијаеше врз расположението на пазарите со основни метали, при што бакарот падна за повеќе од 1 отсто и се спушти под 13.000 долари за тон. Во меѓувреме, златото се намали за цели 3,5 отсто во време на нестабилно тргување.

Благородните метали минатиот месец нагло пораснаа во трка поттикната од шпекулативен моментум, геополитички превирања и загриженост за независноста на американската централна банка. Тој налет нагло заврши на крајот од минатата недела, во петокот, со најголем дневен пад на среброто досега и најголем пад на златото од 2013 година.

Инвеститорите изградија големи позиции во благородни метали, а дополнителен поттик дадоа силните приливи во берзански производи и бран купувања на кол-опции.

Ненадејниот колапс за време на азиското тргување во петокот продолжи на почетокот на оваа недела, пред купувањето во време на пад да ги поддржи цените во последните неколку сесии.

Пазарите сега ги мерат политичките импликации од номинацијата на Кевин Ворш за претседател на Федералните резерви, при што претседателот Доналд Трамп во средата изјави дека не би го номинирал за таа улога доколку тој има желба да ги зголеми каматните стапки. Трамп во интервју за „Ен-би-си нуз“ рече дека нема „многу“ сомнеж дека Фед повторно ќе ги намали стапките - што е поттик за благородните метали, кои не носат камата.

Цените на златото „веројатно ќе останат нестабилни сè додека не се добие поголема сигурност за монетарната политика,“ напишаа аналитичарите на „Стандард Чартеред“ (Standard Chartered Plc), меѓу кои и Судакшина Уникришнан. Некој дел од оваа краткорочна нестабилност може да произлезе од инвеститори кои ги повлекуваат своите вложувања во берзански производи, рекоа тие, но „структурните двигатели остануваат недопрени и очекуваме повторно движење нагоре.“

Среброто традиционално е понестабилно од неговиот поскап „роднина,“ поради помалиот пазарен обем и пониската ликвидност. Дури и така, последните осцилации се издвојуваат по нивната големина и брзина, со ценовни движења зголемени од силни шпекулативни приливи и потенка трговија на децентрализираниот пазар.

Среброто падна за 12,7 отсто на 76,99 долари за унца пладневното тргување во Сингапур. Спот-златото беше пониско за 1,7 отсто, на 4.881,35 долари. Платината и паладиумот исто така паднаа. Индексот Bloomberg Dollar Spot, мерка за американската валута, порасна за 0,1 отсто.