Руската нафта со рекорден попуст од 2023 под притисок на санкциите

Клучната руска сурова нафта се продава со најголем попуст на меѓународниот пазар во речиси три години, откако западните санкции ја попречуваат трговијата со Москва.

Просечниот попуст на нафтата „Уралс“ од западните извозни пристаништа на Русија во петокот достигна 30,62 долари под глобалниот репер „Дејтед Брент“, покажуваат податоците на „Аргус Медиа“ (Argus Media). Тоа е најголемиот попуст од април 2023 година. Овој тип нафта сега се тргува по цена нешто над 40 долари за барел на извозната точка.

Поевтинетите барели го покажуваат влијанието на западните санкции, особено оние што САД ги воведоа кон крајот на минатата година врз Москва. Сè уште не е јасно како предложените глобални царини од 15 отсто на американскиот претседател Доналд Трамп, ќе влијаат врз идните купувања на Индија, откако Врховниот суд ги блокираше неговите претходни мерки.

Попустот на руската нафта „Уралс“ во однос на „Брент“
„Уралс“ се тргува со најголем попуст во однос на „Брент“ од април 2023 година поради санкциите

Bloomberg

Сепак, пониската цена значи и помали приходи, што го намалува износот на даноци што нафтените компании го уплаќаат во буџетот на Кремељ.

Нафтата „Уралс“ во балтичкото пристаниште Приморск во петокот се тргуваше по цена од 42,09 долари за барел, додека истата сорта во Новоросијск на Црното Море падна на 40,44 долари, покажуваат податоците на „Аргус Медиа“. Тоа е значително под нивото што руската влада го претпостави при планирањето на државниот буџет за оваа година, при што се очекуваше просечна цена од 59 долари за барел во 2026 година.

Додека „Уралс“ стигне до Индија, попустот во однос на „Брент“ се намалува на нешто повеќе од 12 долари за барел, според „Аргус Медиа“. Иако тоа и понатаму е најголемата разлика од април 2023 година, не е јасно дали таканаречениот распон на испорака, големиот јаз меѓу извозните и испорачаните цени, на крајот завршува во руски раце. 

Минатата година, САД ги удвоија царините на 50 отсто за Индија поради купувањето на нафтата „Уралс“, а потоа ги ставија на црната листа двете најголеми руски нафтени компании „Роснефт“ (Rosneft PJSC) и „Лукоил“ (Lukoil PJSC).

Американскиот претседател претходно ја укина дополнителната царина од 25 отсто што ја воведе за индиските производи поради купувањето руска нафта, како прв чекор кон зацврстување на условите на трговскиот договор што двете земји го најавија.

Американскиот суд во петокот пресуди дека користењето на Законот за меѓународни вонредни економски овластувања од страна на Доналд Трамп за воведување царини било незаконско.

Обединетото Кралство и Европската Унија исто така воведоа понизок ценовен лимит за руската нафта, мерка што стапи во сила на 1 февруари. Според правилата, компаниите од Европа можат да обезбедуваат услуги како транспорт и осигурување за руска нафта само доколку таа чини помалку од 44,10 долари за барел.