text size
Цената на нафтата порасна по нападите врз некои од најважните енергетски капацитети на Блискиот Исток, што ги зголеми стравувањата од посериозни последици од конфликтот, кој трае речиси три недели.
Брентот поскапе за дури 5,1 отсто и се приближи до 113 долари за барел, додека најтргуваниот договор за ВТИ се движеше околу 96 долари. Американскиот природен гас скокна за дури 6,5 отсто. Иран изврши напади врз голем терминал за течен природен гас во Катар, еден од неколкуте енергетски објекти на кои Техеран најави дека ќе цели по ударите врз огромното гасно поле Јужен Парс во Исламската Република.
Нафтата нагло поскапе по нападите врз енергетски капацитети на Блискиот Исток
Фјучерсите се повисоки за околу 50 отсто од почетокот на војната со Иран
Bloomberg
Цената на нафтата порасна за околу 50 отсто од почетокот на војната, која предизвика хаос на Блискиот Исток - со блокирање на пловидбата низ Ормускиот Теснец и значително намалување на дел од производството на нафта и гас. Сепак, енергетскиот сектор за експлоатација на нафта и гас во Иран досега во голема мера беше поштеден, што помогна да се ограничи ризикот од ескалација, која би можела посериозно да влијае врз долгорочната понуда.
Пазарот сè уште го потценува и не го пресметува целосно ризикот колку брзо конфликтот може да ескалира во директни напади врз пошироката енергетска инфраструктура во Персискиот Залив, изјави Харис Куршид, главен инвестициски директор во „Каробар капитал“ (Karobaar Capital LP) во Чикаго.
Ако дојде до директни напади, 120 долари нема да бидат плафон, туку почетна точка. Цените од 140 до 160 долари воопшто не би биле изненадување, додаде тој, мислејќи на цената на брентот.
Американскиот претседател Доналд Трамп изјави дека САД не знаеле за нападот на Израел врз гасното поле Јужен Парс, но се закани дека американските сили ќе „го разнесат целото“ наоѓалиште ако дополнително бидат погодени катарски енергетски објекти. Тој претходно оваа недела рече дека напад врз нафтената инфраструктура на главниот ирански извозен центар на островот Харг сè уште е можност, по претходните бомбардирања на воени цели таму.
Притисокот врз Ормускиот Теснец значи дека претседателот Трамп не може едноставно да прогласи победа и да се повлече, бидејќи тоа не би го решило основниот проблем, изјави Вил Тодман, виш соработник во Програмата за Блискиот Исток во Центарот за стратешки и меѓународни студии.
Многу од опциите што ги има претседателот Трамп за да го зголеми притисокот врз Иран би можеле дополнително да ги подигнат цените на енергентите, вклучувајќи и обид за преземање на островот Харг или напади врз иранската енергетска инфраструктура за производство на нафта и гас.
Главни нафтени и гасни капацитети погодени од Иран и Израел
Напади од 28 февруари, најновите се означени со круг
Bloomberg
Индустрискиот комплекс Рас Лафан во Катар, каде што се наоѓа најголемата фабрика за извоз на течен природен гас во светот, претрпе „големи оштетувања“ по ракетен напад, додека последователен удар предизвикал пожар, соопштија локалните власти. Гасното поле Јужен Парс е важно за снабдување на домашниот пазар, како и за соседните Ирак и Турција. Поврзани нафтени и петрохемиски капацитети беа погодени и во Асалује во Исламската Република.
Одмазднички напад врз Рас Лафан е токму она од што најмногу стравуваше глобалниот пазар на природен гас, по ударите врз постројките за преработка на гас во иранското поле Јужен Парс претходно во текот на денот, изјави Том Марзек-Мансер, директор за гас и течен природен гас за Европа во „Вуд Макензи“ (Wood Mackenzie Ltd.).
Сè уште не е познато кој дел од индустрискиот комплекс е оштетен, но во секој случај тоа ќе создаде притисок за раст на цените на гасот кога ќе се отворат пазарите в четврток, додаде тој.
Абу Даби соопшти дека ги запрел операциите во своите гасни капацитети во Хабшан откако пресретнувањето ракети довело до паѓање на остатоци. Бахреин ја негираше информацијата на полуофицијалната иранска новинска агенција Фарс дека била погодена рафинерија за течен природен гас.
САД би можеле да разгледаат воведување давачка за извоз на сурова нафта или дури и забрана, со цел да се ублажи растот на цените на енергентите предизвикан од војната, што помогна да се зголеми разликата меѓу американската нафта ВТИ и глобалниот репер брент, соопшти РБЦ (RBC Capital Markets LLC). Разликата порасна на повеќе од 15 долари по барел.
Како дел од мерките за ограничување на растот на цените, Трамп привремено ја суспендира повеќе од еден век старата поморска регулатива позната како Законот Џоунс, со цел да се намалат трошоците за транспорт на нафта, гас и други суровини низ САД. Во меѓувреме потпретседателот Џеј Ди Венс и други високи претставници на администрацијата на Трамп в четврток планираат состанок со извршни директори од нафтената индустрија.
.webp){kind=icon}
