Испораките на нафта од островот Харг изгледа како да се на пауза

Испораките на нафта од главниот извозен терминал на Иран изгледа дека се запрени во последните неколку дена, според сателитски снимки - прв знак за подолга пауза од почетокот на војната.

На 8, 9 и 11 мај не биле забележани океански танкери на островот Харг, покажуваат европски сателитски снимки собрани од „Блумберг“.  Иако имало поединечни денови кога пристаништата биле празни од почетокот на конфликтот, ова е најдолгиот период без танкери досега.

Иран товареше нафта во објектот за време на конфликтот, продолжувајќи да ги полни бродовите и да ги користи како пловечко складиште откако нивното излегување од Персискиот Залив беше блокирано од американската морнарица.

Ако островот Харг остане неактивен, тоа ќе го зголеми притисокот врз преостанатите складишни капацитети во земјата, кои според снимките се полнат. Проценките варираат за тоа колку простор останува, но ако сите резервоари се наполнат, Иран би можел да биде принуден на поголеми намалувања на производството. Земјата веќе намали дел од производството.

„Њу јорк тајмс“ објави за истекување од 3.000 барели на 6 мај, врз основа на снимка, што можело да влијае на товарењето. Иран негираше дека имало истекување, а подоцнежните снимки, на кои товарењето било запрено, не покажуваат очигледен инцидент.

Слики од европскиот сателит „Сентинел 2“ од 11 мај покажуваат дека сите пристаништа на островот Харг биле празни. Слики од претходните денови исто така не покажуваат танкери.

Терминалот не бил празен повеќе од еден ден од почетокот на војната. Постојат снимки за 33 од 73 дена од нападите на САД и Израел започнати на 28 февруари. Само две од тие снимки покажуваат празни пристаништа - една во март и една во април.

Поради орбитата на „Сенител 1“ и „Сенител 2“, не сите области на Земјата се покриваат секој ден, па има празнини во записите.

Со тоа што иранските бродови не можат да го напуштат Персискиот Залив без ризик од заплена или напад од американската морнарица од средината на април, танкерите се користат како пловечко складиште.

Во последните недели се создаде флота на исток од островот Харг. Бројот на големи танкери порасна од три на 11 април на најмалку 18 до 11 мај. Други се собраа кај пристаништето Чабахар, близу границата со Пакистан.

Не е јасно колку од овие танкери се полни, но разумно е да се претпостави дека оние што го посетиле островот Харг содржат товар. Тие што се поблиску до Персискиот Залив може да се мешавина од натоварени бродови спречени да заминат и празни што чекале товар.

Со паузирано товарење, складишните резервоари на островот Харг изгледа дека се полнат, покажува анализата на снимките.

Резервоарите имаат пловечки покриви што се креваат како што се полнат, намалувајќи ја сенката што ја фрла ѕидот на резервоарот. Споредбата на снимки од различни денови покажува промени во волуменот на нафтата.

Снимка од 11 мај покажува неколку резервоари со значително помали сенки отколку на 6 април, пред блокадата. Сликите сугерираат дека капацитетот на островот Харг се намалува до речиси нула. Ако Иран остане без простор за складирање, би можел да мора да намали производство, што би било симболична победа за САД.

Од почетокот на блокадата, претседателот Доналд Трамп и неговата администрација предвидуваат дека Иран брзо ќе мора да затвора нафтени полиња. Други аналитичари, како „Кплер“, проценуваат дека Техеран може да продолжи со пумпање до крајот на мај пред да остане без складиштен простор