В сабота ќе бидат дозволени протести само на синдикатите, рече Макрон

Францускиот претседател Емануел Макрон изјави дека неговата влада ќе се обиде во сабота да дозволи само протестни маршеви на синдикатите, со цел да се спречи повторување на насилните демонстрации од минатиот викенд.

„Во случаите кога не станува збор за синдикати, ќе ги забраниме секаде каде што можеме“, рече Макрон во говорот во четвртокот, по состанокот со највисоките безбедносни претставници. Макрон се обидува да избегне какви било демонстрации, но рече дека на синдикатите ќе им биде дозволено да протестираат против зголемените трошоци за живот по конкретни маршрути договорени со полицијата.

За демонстрации на јавни места е потребно одобрение од владата, а забраните понекогаш ги оспоруваат активисти кои учествуваат во одобрени протести, што потенцијално може да доведе до судири со полицијата.

Макрон ги призна „пропустите во планирањето и елементите на изненадување“ минатата сабота, кога протестите привлекоа повеќе од половина милион луѓе и се претворија во вандализам. Учесниците во немирите нападнаа јавни згради и ограбуваа продавници во градовите низ целата земја. Францускиот лидер ги обвини организираните ултра леви групи, кои „настојуваат да ја урнат републиката“, за поттикнување бунтовнички дејства, заедно со актите на деликвенција.

Пред да станат насилни, протестите минатиот викенд обединија неколку групи, вклучувајќи средношколци и активисти на „Жолтите елеци“, повремено радикално движење од граѓанската база кое се појави во 2018 година за да се бори против зголемените трошоци за живот.

Во соопштение во четвртокот, синдикатот ЦГТ (CGT) изјави дека одговорноста за одржување на редот е на владата, повикувајќи ги властите да ги прекинат своите „репресивни тактики“.

Додека владата се подготвува за нов бран насилство, париската полиција во четвртокот забрани протести и демонстрации во некои делови од градот, вклучувајќи ја областа околу претседателската палата, долж Шанзелизе и во близина на други туристички места, наведувајќи го ризикот од насилство. Забраната во Париз во четвртокот е на сила од 8 часот наутро до 20 часот.

Неколку други градови низ Франција исто така забранија протести, објави „Франс Прес“.

Полициската наредба првенствено се однесува на студентските протести, кои траат од средината на септември и произлегуваат од поплаките за пренатрупаните училници, недостигот од наставници и системот што се користи за распределување на местата на универзитетите. Се појавија и неколку демонстрации „во знак на солидарност“ со средношколците, вклучувајќи една што го принуди музејот Лувр да се затвори во понеделникот.

Рано во четвртокот, пред забраната да стапи на сила, неколку студенти влечеа зелени контејнери за рециклирање кон главниот влез на еден универзитет во шестиот арондисман во Париз, што е често користен начин за блокирање на пристапот. Парискиот кампус на универзитетот СП (SciencesPo) беше накратко блокиран од демонстранти во четвртокот наутро, пред да интервенира полицијата и да дозволи зградите повторно да се отворат.

Протести во Италија

Франција не е единствената европска земја што се соочува со демонстрации. Во Италија, протестите на камионџиите и блокадите на патиштата поради наглиот раст на цените на горивата го нарушија доставувањето на стоки, особено на југот на земјата, предизвикувајќи недостиг од храна во некои области. Блокадите го спречија пристигнувањето на свежи производи, како млекото, до млекарниците, што доведе до запирање на производството на прочуената биволска моцарела од регионот Кампанија.

Немирите на југот се одвоени од протестите што доведоа до грабежи и немири во Милано во текот на викендот.

Претходно оваа недела, италијанската премиерка Џорџа Мелони објави мерки насочени кон спречување понатамошно насилство, во услови на загриженост поради уште еден бран демонстрации закажани за претстојниот викенд. Владата планира да распореди 500 припадници на војската во Милано до крајот на годината.