Товарен брод што превезувал речиси 3.000 автомобили - од кои околу 300 се произведени од „Мерцедес бенц“ (Mercedes-Benz Group AG) - се запали во близината на брегот на Холандија, додека холандската крајбрежна стража се бори да го контролира пожарот.
Еден член на екипажот на бродот „Фремантел хајвеј“ (Fremantle Highway) загинал кога пожарот го зафатил транспортерот рано во средата. Сите 23 лица на бродот, вклучувајќи ги и неколкуте повредени члена на екипажот и лицето што загина, се извадени од бродот со хеликоптери и чамци за спасување, соопштија властите.
Бродот стар 10 години, со должина од околу 200 метри (656 стапки), може да носи дури 4.000 автомобили, според податоците собрани од „Блумберг“.
„Фремантел хајвеј“ под знамето на Панама бил на пат кон Порт Саид, Египет, по неодамнешното застанување во германското пристаниште Бремерхавен, според податоците за следење бродови собрани од „Блумберг“.
„Шоеј Кишен“ (Shoei Kishen Kaisa Ltd.), јапонската фирма што го поседува бродот, соопшти дека соработува со локалните власти и изрази сочувство за членот на екипажот што го загуби животот. Крајната дестинација за возилата била Сингапур, соопшти компанијата.
Термален приказ на бродот зафатен од пожарот
Извор: Холандска крајбрежна стража
„Ќе продолжиме да даваме сè од себе за брзо гаснење на пожарот и работиме на решавање на ситуацијата што е можно побрзо“, се наведува во соопштението на компанијата од средата.
Дваесет и пет од 2.857 автомобили на бродот биле електрични возила, изјави портпаролот на холандската крајбрежна стража. Едно од тие возила можеби се запалило и пожарот може да трае со денови, објави холандската новинска агенција АНП, цитирајќи неидентификуван претставник на крајбрежната стража.
Не беше веднаш јасно кои други производители на автомобили освен „Мерцедес“ имаат свои возила на бродот. „Форд“ (Ford Motor Co) и „Нисан“ (Nissan Motor Co.) немаат возила на бродот, рекоа портпаролите на компаниите, а претставници од „Стелантис“ (Stellantis NV), „Тојота“ (Toyota Motor Corp.) и „Рено“ (Renault SA) рекоа дека е малку веројатно дека имале товар на бродот.
Портпаролот на „Фолксваген“ (Volkswagen AG) рече дека компанијата активно го истражува случајот, но не можеше да даде дополнителни информации.
„Џенерал моторс“ (General Motors Co.) и БМВ (BMW AG) не можеше веднаш да даде информации. „Тесла“ (Tesla Inc.) не одговори на барањето за коментар.
„Крајбрежната стража не можеше да потврди дали има истекување на гориво од бродот, иако властите презедоа некои мерки на претпазливост за да спречат такво сценарио“, рече портпаролот.
Бродот пловел во близината на светското наследство на УНЕСКО во Ваденско Море, што е најголем непрекинат систем на рамнини од крајбрежен песок и кал во светот. Таквите средини се многу чувствителни и може да се оштетат доколку дојде до излевање на нафта.
Над областа каде што гори бродот била воведена привремена забрана за летање.
.webp){kind=icon}
