Пет клучни вести за почеток на денот

Ќе има ли пауза од монетарното затегнување и во Македонија анализираше „Блумберг Адрија“ откако Државниот завод за статистика во првиот ден од оваа седмица објави втора последователна едноцифрена стапка на инфлација. Во јули трошоците за живот пораснале за 8,4 отсто на годишно ниво. Ова е една од анализите што ги носиме денеска и петте клучни работи за почеток на денот.

Каде е максимумот на основната камата?

Инфлацијата во Македонија да остане на надолна патека очекува аналитичкиот тим на „Блумберг Адрија“ во анализата за стапката за следниот период. Ставот за пониска инфлација на аналитичарите се темели на фактите за забавувањето на цените на производителите, кои растат двојно побавно од инфлацијата, но и на високата основа од 2022 година.

Аналитичкиот тим на „Блумберг Адрија“ смета дека од потезите на Народната банка, особено од последниот од минатата недела, кога основната камата беше зголемена за 0,15 процентни поени, може да се заклучи дека стапката се приближува до некој максимум. Сепак сите опции се отворени.

Болна пресметка со каматите

А комбинацијата на повисоки каматни стапки и обновена воздржаност во државната потрошувачка се заканува да ја задуши експанзијата и да го зголеми ризикот од непријатна рецесија во еврозоната.

Проблемите од зголемувањето на трошоците за задолжување што започнаа минатата година ќе го достигнат врвот во 2024 година, што ќе ѝ нанесе удар на економијата во еврозоната од 3,8 отсто, анализира „Блумберг економикс“. Падот е во директна корелација со цените на енергијата, па укинувањето на субвенциите што ги применуваат владите на земјите од еврозоната би можело да го засили ефектот врз економијата до 5 проценти.

Германското индустриско производство во минус два месеца по ред

Германското индустриско производство во јуни падна втор месец по ред, дополнително продлабочувајќи ги проблемите на најголемата економија во еврозоната, која едвај излезе од рецесијата на почетокот на годината. 

Според германскиот завод за статистика, производството паднало за 1,5 отсто во споредба со мај, а најголеми проблеми предизвикале автомобилската индустрија и градежништвото. Индексот на производството падна на најниско ниво од декември. 

Пензионери се јавуваат на огласите за работа, дуќаните се затвораат

Во Македонија има работа, но нема кој да работи. Ако до пред неколку години се бараше слободно работно место, сега илјадници огласи за вработување на кои компаниите бараат квалификувани работници стојат отворени со месеци.

Во таква ситуација се и некои од околните земји и поразвиените земји од регионот Адрија, како Хрватска и Словенија. каде што работи огромен број од работната сила од другите земји. Анализираме што се случува на нашиот пазар на трудот и каква работна сила ѝ треба на државата, а во услови на миграција, лошо образование, слаба заинтересираност на младите за стручните училишта.

Ексклузивни фотографии од животот на Банкмен-Фрид 

Сем Банкмен-Фрид често зборуваше за својата вреќеста фотелја на која спиел во канцеларија. Помалку зборуваше за дремките во својот приватен авион.

Во месеците откако Банкмен-Фрид беше обвинет за водење огромна криптоизмама, американските обвинители и легии новинари почнаа да го анализираат секој негов збор (и дело) за да го разоткријат јазот меѓу неговата личност како што се претставуваше во јавноста и она што навистина се случувало зад сцената. Тој навистина спиел на вреќеста фотелја, но имал пристап и до авионите што ги изнајмила неговата компанија и до пентхаус вреден 30 милиони долари што го поседувал во ексклузивно одморалиште на Бахамите.