Холивудските студија и сценаристи блиску до договор за крај на штрајкот

Холивудските студија и сценаристи се блиску до решавање на спорот за обновување на договорите, кој со месеци го парализира Холивуд, но сè уште немаат конечен договор, велат извори запознаени со ситуацијата.

Студијата се согласиле да ангажираат одреден број сценаристи за нивните ТВ-емисии, што ќе се зголемува паралелно со бројот на епизоди во сезона, изјави еден од изворите. Двете страни смислиле и шема каде сценаристите ќе добиваат бонуси за популарните емисии на платформите за стриминг.

Студијата дале и контрапредлог за употребата на вештачка интелигенција во пишувањето сценарија, што беше главна тема на разговор во саботата. Разговорите ќе продолжат в недела, се вели во заедничката изјава на двете страни.

Директорите од компании како „Нетфликс“ (Netflix Inc.), „Волт Дизни“ (Walt Disney Co.) и „Ворнер брос“ (Warner Bros. Discovery Inc.) четврти ден по ред разговараат со претставниците на Здружението на писатели на Америка, надевајќи се дека ќе го решат штрајкот што започна на почетокот на мај. Сценаристите се борат за повисоки плати и промени во начинот на кој добиваат надомест од платформите за стриминг.  

Двете страни се под притисок да постигнат договор. Големите медиумски компании не можат да продуцираат многу нови емисии на ТВ или да започнат филмски проекти. Покрај тоа, традиционалната есенска сезона на награди и зимскиот филмски циклус се загрозени, особено затоа што и Здружението на филмски актери стапи во штрајк во јули.

Прекинот на работата ја чини економијата милијарди долари, особено во Лос Анџелес, а тоа влијае на сè, од фризери и шминкери до ресторани.

Иако двете страни не успеаја да постигнат договор во саботата, сепак се надеваат дека ќе ги решат несогласувањата во наредните денови. Откако ќе постигнат начелен договор, синдикатот сè уште треба да го ратификува договорот со гласање на неговите членови.

Во моментов нема коментари за веста. Биди прв да коментира...

Остави коментар