Првите состаноци на централните банки за годинава не донесоа ништо ново. Впрочем, тоа и се очекуваше. Каматните стапки засега остануваат на исто ниво. Банкарите ќе чекаат нови податоци за инфлацијата, но и за ризиците што ги носат случувањата во Црвено Море.
Што се однесува на клучниот фактор за затегнувањето на монетарната политика, инфлацијата, податоците испраќаат мешани сигнали. Во Германија таа забави повеќе одошто се очекуваше, но во еврозоната забавувањето е под очекувањата. Во земјава, гувернерката Анита Ангеловска Бежоска, во ексклузивна изјава за „Блумберг Адрија“ рече дека инфлацијата е сè уште над историскиот просек и затоа засега основната камата останува на 6,30 отсто.
Високите трошоци за задолжување не беа лоши за сите. Благодарение на зголемените камати, банките уште еднаш ги зголемија добивките. Кај Комерцијална банка добивката во 2023 година се зголемила за 66 отсто во однос на 2022 година. Стопанска банка за истиот период остварила поголема добивка, во висина од близу 18 милиони евра.
Не само во земјава туку и во регионот ланската година беше банкарска. Затоа банките се најдоа на листата 50 најуспешни и највлијателни за минатата година, која втора година по ред ја правиме ние, петте редакции на „Блумберг Адрија“. На листата, освен банките, се најдоа и деветмина Македонци што ја обележија 2023 година во своето поле на дејствување.
Минатата година беше успешна и за македонските филмови и серии. „Сказните на Биби“ и „Домаќинство за почетници“ го освојуваат светот, а главните ликови во светските хит-серии пијат македонски чаеви. Следниот чекор е виски со македонска етикета.
Во Топ 50 ги ставивме и изборите, кои годинава ќе се одржат речиси во сите земји од регионот. Македонија прва се зафати со подготовките за нив. Неделата ја почнавме со нова, техничка влада, која треба да создаде фер амбиент за гласање. Вообичаено, од ваквата преодна влада стопанството нема големи очекувања, најважно е процесот да заврши брзо, за да може барем во втората половина од годината состојбата да се нормализира и да се реализираат очекувањата на странските институции за забрзан економски раст во земјава.
Забрзан економски раст на глобално ниво очекува и ММФ. Во најновиот извештај напишаа дека силната Америка и државната поддршка во Кина ќе ѝ дадат поголем поттик на светската економија. Во прилог на ова одат и податоците од еврозоната, која, сепак, успеа да избегне рецесија лани.
Неделава ги анализиравме случувањата во ИТ-секторот. На глобално ниво има сè повеќе откази во секторот што е еден од најбрзорастечките. Но кај нас има уште простор за нови вработувања. Секторот останува атрактивен поради високите плати и флексибилните услови за работа. ИТ-секторот го забрза развојот и на фитнес-индустријата во земјава. Вработените што денот го поминуваат врзани пред работните маси создадоа нов тренд – вежбаат за здравје, за разлика од порано, кога се вежбаше само за убавина.
Една од нашите теми неделава беше и данокот на имот. Законот наложува побогатите да плаќаат повеќе. Во практика, општините не можат да проверат кој колку е богат и колку имот има, па собирањето пари од побогатите станува нивна добра волја. Ако пријават, ќе платат.
Богатите во светот не можат ништо да скријат. Еве, на пример, Илон Маск по судска одлука ќе треба да го врати бонусот што му го додели неговата компанија во 2018 година. Човекот и по ова ќе си остане на врвот на листата на милијардери на „Блумберг“, а ќе врати 55 милијарди долари или точно десет македонски државни буџети.
.webp){kind=icon}