Цените на одредени стоки и суровини е во постојан пораст поради тензиите околу Црвено Море. Засегнати се и голем дел од компаниите во регион, но и македонски компании, вели во интервју за „Блумберг Адрија“ Румен Смилевски, извршен директор на компанијата „Малина Велес“.
Поради пренасочување кон алтернативни маршрути, нарачките доцнат, а цените растат.
Тој посочува дека овие случувања прават проблеми и за текот на производството.
„Сега се појавува и друг проблем од производителите и трговците, секој во оваа паника кога ќе види дека цените одат нагоре и робата касни, секој ако има 100 единици да троши во месецот, тој сака да земе повеќе 120, 150 … и имаме дополнителна тензија, а со самата таа тензија и фабриките не може да испорачуваат и берзите се во пораст. Ние сме зависни и од нафтата, јас работам и со шеќерот чија цена на берзите е во пораст. Значи цените на берзите во последните десетина дена се во постојан пораст“, вели Смилевски.
Кризата околу Црвено Море носи и ризици од обновување на инфлаторните притисоци.
„Јас очекував дека во 2024 дека ќе имаме намалување на цените на основните намирници, но за жал ова што се случи носи нови притисоци. Се надевам дека брзо ќе се нормализираат работите и цените ќе се вратат во нормален колосек. Инаку, сега имаме секојдневно зголемување на цените, а тоа нормално ќе влијае на инфлаторната скала“, вели Смилевски.