„Еднорозите“ во Македонија се блиску, вели Сaња Митровска основач и извршна директорка на „Нетворекер“ во интервју за „Блумберг Адрија“.
„Гледаме огромен раст првично од стартапите односно од тие мали компании коишто сакаат да постигнат брз раст а се повеќе и повеќе годишно ги имаме. Меѓутоа ако ги следиме парите, може да кажам дека еднорозите се многу блиску. Очекуваме да се појават во следните три до пет години максимум во Македонија, вели Митровска.
Сепак, предизвиците во Македонија се големи.
„Финансиите не се единственото решение за појава на еднорозите. Проблем е тоа што компаниите, односно стартапите не размислуваат глобално, односно не го лансирале својот продукт на пазарот за којшто е наменет, конкретно американскиот туку првично размислувале локално, односно да се развијат на Балканот“, вели Митровска.
Таа смета дека овие стартапи доколку две до три години пробуваат да се развијат во Балканот па потоа да одат на американскиот пазар, ќе биде доцна за иновацијата и никогаш нема да ја постигнат таа евалуација за да ги добијат потребните инвестициони фази, односно тие инвестиции од инвестициските фондови. Бидејќи ако сакаме да имаме „еднорози“ неопходно е тие стартапи да се прошират кон американскиот пазар не само заради апсорпциската моќ на пазарот меѓутоа и поради големината на пазарот.
„Затоа, многу важно е да размислуваме глобално а не локално. Тоа со што се бориме во моментов е како во рани денови да размислуваат глобално да прават иновација, вели Митровска.
Митровска додава дека едно од решенијата што ги увиделе и што го применува и Германија е наместо да ги носи странските инвеститори во земјата, попаметно е да се одберат неколку претприемачи кои би се пратиле во странство и тоа е многу значајно бидејќи така прават чекирање на реалноста.
„Пробавме тоа да го имплементираме сега со реално шоу за претприемачи. Избравме претприемачи коишто ќе имаат добра бизнис идеја и ги споивме односно им дадовме ментори коишто го поминале веќе патот тоа значи веќе изградиле бизниси и размислуваат глобално, излегле на странски пазари, продаваат веќе милиони или добиле инвестиции од милиони, бидејќи размената на искуство може да биде значајна, вели Митровска.
Поддршката на стартапите секако е важна а Фондот за иновации и технолошки развој во Македонија ги раздвижува претприемачките потенцијали поддржувајќи ги стартап компаниите со сума од 138 милиони евра.