Пет важни вести за почеток на денот

Дарежливоста на рускиот претседател Владимир Путин кон Ким Џонг Ун отиде чекор понатаму кога на севернокорејскиот лидер, кој сака лимузини, му подари нов автомобил. Путин му подари на Ким автомобил од руско производство за негова лична употреба, објави во вторникот официјалната севернокорејска централна новинска агенција.

Добро утро! Ова се петте вести што треба да ги знаете на почетокот од денот.

Ковачевски и Спасовски ќе примаат по 2.500 евра апанажа цела година

Поранешниот премиер Димитар Ковачевски и поранешниот министер за внатрешни работи Оливер Спасовски одат на апанажа. Пред десетина дена, во речиси празната сала „Борис Трајковски“, дел од членовите на Комисијата за прашања на изборите и именувањата ги усвоија решенијата за остварување на правото на апанажа на двајцата членови на кои им престанала функцијата.

Надоместокот е во висина на платата што именуваното лице ја добивало додека било на функцијата. Со одлуката на Уставниот суд за укинување на членот 4 од Законот за изменување и дополнување на Законот за плата и други надоместоци на избрани и именувани лица, висината на апанажата што ќе ја добива поранешниот премиер Димитар Ковачевски ќе биде 156.482 денара, додека на Оливер Спасовски 153.037 денари, колку што им биле и платите додека ја вршеле функцијата. Покрај правото на апанажа, Ковачевски побарал и добил право на користење службено возило, кое му следува во согласност со Законот за возила. 

Владата одобрила анекс на договорот за неизградената фабрика за електрични возила во Тетово

Македонските граѓани веројатно ќе треба да почекаат на отворањето на фабриката за електрични возила во Тетово, откако Владата во заминување на една од последните седници во 2023 година, одржана на 26 декември, дала согласност Дирекцијата за технолошки индустриски развојни зони да потпише анекс кон договорот за доделување државна помош склучен со инвеститорот „Некст.е.ГО мобиле“ во август 2022 година.

Со оглед на тоа што првично беше најавено дека производството на автомобили во Тетово треба да почне во последниот квартал од 2024 година, „Блумберг Адрија“ праша во Дирекцијата за технолошки индустриски развојни зони и во седиштето на „Некст.е.ГО мобиле“ што предвидува анексот на договорот, колку пари државна помош ќе добие компанијата, колку пари во државна помош се досега доделени и кога треба да почне изградбата на фабриката за производство на автомобилите. Иако двете страни најавија одговори, до објавата на приказната не добивме одговори ниту од Дирекцијата, ниту од компанијата.

Таму каде што лобирањето е непознато, корупцијата цвета. Како е во регионот?

Досега се напишани голем број извештаи за лобирањето во регионот Адрија од страна на невладини организации што се занимаваат со прашањето на транспарентноста, вклучувајќи и добри деловни практики. Главниот заклучок е дека граѓаните од нашиот поширок регион негативно реагираат на самиот концепт на лобирање. Лобирањето постои откако постои демократски избрана влада што носи обврзувачки закони во парламентот, чија содржина ги одразува поставеноста и компромисот на различни општествени интереси.

Современите држави носат конкретни закони за регулирање на полето на лобирањето, креирање регистар на луѓе и компании што се занимаваат со таа работа, со цел да се зголеми транспарентноста на активноста. Лобист може да биде поединец, може да биде дел од компанија, лобистите може да бидат ангажирани од држави, верски организации, синдикати и, се разбира, деловни компании.

Саудиска Арабија сè повеќе инвестира во забава - на ред дојдоа и филмовите

Саудиска Арабија е најголемата економија во регионот, со население од нешто повеќе од 32 милиона - околу 63 отсто од нив се на возраст под 35 години. Ова ја прави еден од најдобрите пазари за содржини на локален јазик на Блискиот Исток, при што секторот за филмска продукција бележи годишна стапка на раст од околу 25 проценти.

Во текот на изминатите неколку години кралството навлегуваше подлабоко во индустриите, вклучувајќи спорт и забава, делумно како начин да го подобри својот имиџ во странство и да ја диверзифицира својата економија. Како дел од тие планови, владата нуди огромни стимулации за да стане центар за филмска продукција. Во 2019 година кралството започна Меѓународен филмски фестивал на Црвено Море, а минатата година во Кан претстави два фонда за продукциска инфраструктура и инвестиции во филмската индустрија.

Европската комисија започнува постапка против Тикток

Европската комисија започна формална процедура за да процени дали Тикток (TikTok) можеби го прекршил Законот за дигитални услуги во областите поврзани со заштитата на малолетниците, транспарентноста на рекламирањето, пристапот до податоци за истражувачите и управувањето со ризикот поврзан со дизајнот што предизвикува зависност и штетна содржина, соопштија од Европската комисија (ЕК). Со поведувањето формална постапка, комисијата се овластува да преземе понатамошни чекори, како што се привремени мерки и одлуки за неусогласеност.

На 25 април 2023 година Тикток беше назначен како многу голема онлајн платформа (VLOP) според Законот за дигитални услуги на ЕУ, откако соопшти дека има 135,9 милиони месечни активни корисници во ЕУ. Како VLOP, Тикток мораше да започне со исполнување низа обврски утврдени во Законот за дигитални услуги четири месеци откако беше вклучен во списокот.