Летовите во Дубаи беа пренасочени, а автомобили останаа заглавени на поплавените патишта, откако рекордните врнежи во изминатиот ден го доведоа градот во застој.
Обединетите Арапски Емирати (OAE) го доживеаја најсилниот дожд од почетокот на водењето ваква евиденција во 1949 година, се наведува во соопштението на канцеларијата за медиуми во Дубаи. Тоа предизвика хаос меѓу жителите бидејќи водата влезе во домовите и подземните паркинзи, остави некои згради без струја и резултираше со големи поплави дури и еден ден подоцна.
Едно лице загина откако било повлечено од поплавите на северот на земјата, објави весникот „Национал“ (National). Во соседен Оман, најмалку 18 лица загинаа во последните денови бидејќи обилните дождови предизвикаа поплави, објави агенцијата АП, цитирајќи соопштение од Националниот комитет за управување со вонредни состојби на земјата.
Аеродромот во Дубаи, еден од најпрометните во светот, страда од „значаен прекин“, беше објавено во средата на X. Онлајн распоредите покажаа дека повеќето пристигнувања или полетувања се откажани или одложени до 8 часот по локално време.
Обилните дождови низ пустинската земја делумно произлегоа од т.н. сеење облаци, според Ахмед Хабиб, метеоролог. ОАЕ започнаа операции за сеење облаци во 2002 година за да се решат проблемите со безбедноста на водата, но недостигот од одвод во многу области може да предизвика поплави.
„Националниот центар за метеорологија на заливската држава испрати најмалку седум авиони за сеење од аеродромот во Ал Аин помеѓу понеделникот вечер и вторникот попладне за да ги искористат предностите на конвективните облачни формации“, рече Хабиб. Таа техника вклучува вградување хемикалии и ситни честички - често природни соли како што е калиум хлорид - во атмосферата за да се внесе повеќе дожд од облаците.
Со оглед на тоа што глобалното затоплување се заканува со пораст на смртните случаи поврзани со горештините во ОАЕ, канцеларијата за медиуми во Дубаи во вторникот дождовите ги нарече „дождови на добрината“, и покрај поплавените куќи.
Последните бури следуваа по обилните дождови на почетокот на годинава, кои исто така предизвикаа поплави и сообраќајни пречки. Владата на Дубаи им порача на своите вработени в среда повторно да работат оддома поради временските услови и ги повика приватните работодавци да го сторат истото тоа. Училиштата добија насоки да останат затворени.
Луѓето навалија на социјалните мрежи за да споделат искуства во однос на лошите временски услови. На некои видеа се гледа како автомобили се одвлечени од патиштата, додека на други се гледа како таванот на продавница се урива кога водата поплави еден од најпопуларните трговски центри во Дубаи. Градското метро остана во прекин во средата наутро.
.webp){kind=icon}
Во моментов нема коментари за веста. Биди прв да коментира...