.webp){kind=icon}
Владата подготвува есенска кошничка со најупотребувани производи што ќе имаат намалени цени. Оттаму информираа дека ќе ги следат потребите на граѓаните и во зависност од тоа што најмногу се троши, ќе се интервенира за да не се случи повторно инфлацијата да забрза.
Добро утро, подолу петте вести што ги издвоивме за почеток на денот.
Ќе знаеме ли што е вистина кога вештачката интелигенција ќе загосподари со нашите уреди
Како што дигитализацијата на светот забрзано се шири, нашите паметни телефони се трансформираат во пософистицирани машини и незаменливи алатки, кои имаат големо влијание врз секојдневниот живот. Тие повеќе не се само уреди за комуникација; тие се паметни, интуитивни асистенти, а најновите генерации целат да бидат уште попаметни преку вградување на технологијата за вештачка интелигенција (ВИ).
Добар патоказ за тоа е неодамнешната промоција на најновите паметни телефони од „Епл“ (Apple), од линијата „ајфон 16“ (iphone 16), за кои извршниот директор на компанијата Тим Кук рече дека се изградени со вештачка интелигенција „од самата основа“. Сепак, еволуцијата на паметните уреди управувана од вештачката интелигенција со себе носи мноштво нови ризици и закани, кои корисниците можеби не ги сфаќаат доволно сериозно.
Македонија е незрела за самурајски, ама тамам за зелени обврзници
Македонија веќе подолг период е влезена во циклус на задолжувања на домашниот и на странските пазари на капитал, кои во изминативе години го вивнаа јавниот долг на земјата. Износот на јавниот долг во вториот квартал од годинава достигна 8,87 милијарди евра односно 60,5 проценти од БДП, што е мало зголемување во однос на првиот квартал, кога долгот изнесуваше 8,77 милијарди евра (59,8 проценти од БДП).
Со оглед на тоа што диверзификацијата и трошоците за задолжување играат битна улога во одржливоста на јавните финансии, анализиравме дали Македонија може да го следи примерот на Словенија и на уште неколку други земји од Централна и Источна Европа (ЦИЕ) што преку издавање таканаречени самурајски обврзници се задолжуваат на азиските пазари.
„Фолксваген“ укинува 30-годишна спогодба за забрана за отпуштања
„Фолксваген“ (Volkswagen) го раскинува договорот за заштита на работните места на работниците од автомобилската индустрија во Германија како дел од напорите за намалување на трошоците, потег што ризикува раководството на компанијата да влезе во сериозна конфронтација со синдикатите.
„Фолксваген“ во вторникот раскина неколку договори поврзани со 30-годишната спогодба што треба да ги зачува работните места до 2029 година, соопшти компанијата. Гаранциите практично истекуваат кон средината на следната година. Укинувањето на обврските за безбедност на работното место во компанија што е синоним за германската инженерска моќ укажува на тоа колку далеку паднала најголемата европска економија во однос на конкурентноста.
Камала Харис го навлече Трамп на дебата под нејзини услови
Камала Харис својата дебатна стратегија во вторникот вечер ја засноваше на провоцирање на Доналд Трамп пред националната телевизиска публика, ставајќи го противникот во неповолна позиција. Демократската кандидатка за претседател го принуди својот републикански противник да се брани од своите кривични пресуди, своето богатство и својата улога во укинувањето на федералното право за абортус.
Таа го предизвикуваше за ентузијазмот на неговите митинзи и неговата склоност кон бизарни изјави и теории на заговор. Беа потребни само неколку минути за поранешниот претседател да го прифати нејзиниот пристап, со тоа што Трамп ја пренасочи дискусијата на имиграцијата и безбедноста на границите со непоткрепени онлајн гласини за недокументирани мигранти, за кои рече дека сега ги јадат миленичињата на луѓето во едно предградие на Охајо.
Членoви на ММФ во Русија за прв пат од почетокот на војната во Украина
Меѓународниот монетарен фонд (ММФ) најави дека може да спроведе годишен преглед на руската економија за прв пат од почетокот на војната, бидејќи економската ситуација во таа земја е „посредена“ од порано. Спроведувањето на годишни економски прегледи, познати како консултации за член IV, е „заедничка обврска“ на заемодавачот со седиште во Вашингтон и неговите членови, изјави портпаролката на ММФ за „Блумберг“ (Bloomberg) во е-пошта. Ваков преглед ММФ последен пат објави на почетокот на 2021 година.
ММФ претходно овој месец објави дека неговите членки ќе започнат разговори со руските власти на 16 септември, а потоа ќе отпатуваат во земјата на разговори во живо. Овој потег дојде веднаш откако Ксенија Јудаева, поранешен прв заменик-гувернер на руската централна банка, беше назначена за претставник во извршниот одбор на ММФ. Таа го замени Алексеј Можин, кој беше на таа позиција од деведесеттите.
