ПОЛИТИКА
Европската Унија одобри дополнителни царини за електричните автомобили увезени од Кина, кои ги смета за нелојална конкуренција. Станува збор за царини од 45 отсто, што само дополнително ги зголемува трговските тензии меѓу водечките светски извозни сили. Регулативата за воведување царини е објавена во Службениот весник на Европската Унија. Ова го отвора патот за тарифите да стапат во сила утре, по неколкумесечни преговори, закани за кинеска одмазда и голем број апели од автомобилската индустрија да се избегне ескалација.
Bloomberg
БИЗНИС
Инвестицијата на „Алфабет“ во вештачката интелигенција се исплатеше
Водечките американски технолошки компании продолжуваат да известуваат за деловните резултати. Акциите на „Алфабет“ (Alphabet) поскапеа повеќе од пет проценти во електронското тргување, откако компанијата постигна подобри деловни резултати од очекуваните. На тој начин матичната компанија на „Гугл“ (Google) докажа дека скапите инвестиции во вештачката интелигенција почнуваат да даваат резултати, особено во секторот на технологии во облак (cloud computing) и клучниот пребарувач на „Гугл“. Имено, приходите на компанијата во третиот квартал пораснале на 74,6 милијарди долари, што е за околу 16 отсто повеќе во споредба со истиот квартал лани и над очекувањата на аналитичарите.
Маск: До 2040 година повеќе хуманоидни роботи отколку луѓе
Во Саудиска Арабија е во тек годишната конференција „Иницијативи за вложување во иднината“, позната и како „Давос во пустината“. Фокус на конференцијата е улогата на инвестициите во постигнување просперитетна и одржлива иднина. На собирот учествуваат голем број светски лидери, претприемачи и носители на одлуки во различни сектори. Еден од учесниците беше и контроверзниот милијардер Илон Маск, кој во своето обраќање пред учесниците рече дека до 2040 година на планетата ќе има повеќе хуманоидни роботи отколку луѓе.
БЕРЗА
Европа
Фјучерсите на европските акции утрово се тргуваат главно во минус, пред објавувањето на податоците за довербата на потрошувачите во еврозоната. Европските берзи во вторникот го завршија тргувањето со загуби, по разочарувачките резултати на „Бритиш петролеум“ (British Petroleum) и на „Новартис“ (Novartis).
САД
Со загуби се тргуваат и фјучерсите на американските индекси, пред објавувањето на податоците за БДП за третиот квартал, како и деловните резултати на „Мета“ (Meta) и на „Мајкрософт“ (Microsoft). Во вторникот индексите на Волстрит забележаа добивки, на крилјата на скокот на акциите на технолошките компании, при што Nasdaq го заврши тргувањето на рекордно високо ниво. Имено, водечките технолошки компании што имаат заедничка пазарна вредност од над 12 милијарди долари неделава ги објавуваат своите деловни резултати. Така, деловните резултати на „Гугл“ ги надминаа очекувањата, додека АМД (AMD) не ги исполни проекциите на аналитичарите.
Азија
Кога станува збор за акциите во азиско-пацифичкиот регион, тие главно се тргуваат во црвено, бидејќи има неизвесност пред претседателските избори во Америка и одлуката на Фед за каматните стапки. Клучните индекси во континентална Кина и Хонгконг паднаа за повеќе од еден процент, што доведе до значителни загуби во тој регион.
НАФТА
Нафтата е стабилна по дводневниот пад додека трговците очекуваат смирување на тензиите на Блискиот Исток, при што пазарот го насочи своето внимание кон глобалните салда на понудата и изгледите за производство на ОПЕК+. Брентот се тргуваше над 71 долар за барел откако падна за повеќе од шест отсто во претходните две сесии, додека ВТИ (West Texas Intermediate) беше близу 68 долари.
Bloomberg Mercury
Израел се чини дека презема чекори за да ја прекине војната со Хезболах до крајот на годината, откако одмаздата против Иран ги избегна нафтата и нуклеарните капацитети како потенцијални цели. Сепак, според „Стандард чартерд“ (Standard Chartered Plc.), пазарот „премногу брзо се опушти“ поради ризиците на Блискиот Исток, а обновените непријателства меѓу Израел и Иран, по изборите во САД, би можеле да ги зголемат цените.
.webp){kind=icon}
