.webp){kind=icon}
До најважните избори годинава останува помалку од една недела. Колку е поблиску одлучувачкиот ден за американските претседателски избори на 5 ноември толку е потесен резултатот на гласачките ливчиња, покажуваат националните јавни анкети. Според последните податоци, тие поголеми шанси за победа ѝ даваат на актуелната потпретседателка Камала Харис, која има предност од еден процентен поен пред републиканецот Доналд Трамп.Од друга страна, поранешниот претседател Трамп добива замав не само во јавните анкети туку и на берзата. Акциите на неговата медиумска компанија „Трамп медија“ (Trump Media & Technology Group) во понеделникот се искачија на највисоката вредност од јуни и така го продолжија неодамнешниот раст, бидејќи обложувачниците изразија наклонетост кон повторниот избор на Трамп.
Добро утро, ви пишува Владимир Николоски од дигиталната редакција на „Блумберг Адрија“. Освен што со нетрпение се очекуваат резултатите од изборите во САД, во светот денеска се одбележува и 31 октомври – денот на штедењето. Бројките покажуваат дека од година во година растат штедните влогови на македонските граѓани иако повремено има мали осцилации во зависност од моменталната економска состојба. Всушност, парите на граѓаните се главен извор на депозитната база што банките ја користат за кредитирање. Ќе донесе ли промени во трендовите актуелното релаксирање на монетарната политика?
Прочитајте подолу во една од петте вести што ги издвоивме за почеток на денот.
Каматите ќе паѓаат: Зошто сепак ќе вреди да се штеди?
Кога зборуваме за зголемување на каматните стапки, првото нешто што ни паѓа на ум со одредена нелагодност се заемите. Но, во пресрет на денот на штедењето, вниманието го насочуваме кон штедењето и колку може да се заработи доколку решиме да паркираме дел од нашите средства во банките на одреден временски период. Во продолжение ги разгледуваме и трендовите на штедењето во регионот, особено по турбулентниот период на различни сигнали кога зборуваме за заштедите.
Од една страна потрошувачите поминаа низ циклус на висока инфлација и раст на трошоците за живот, а од друга страна имаше зголемување на платите и пензиите и подобрувања на пазарите на трудот. Каматите на депозитите го следеа и растот на каматните стапки во претходните периоди, но не во иста мера. Најголема пречка беше добрата ликвидност на банкарските сектори, па ни банките немаа потреба да нудат атрактивни каматни стапки на штедењето за да привлечат дополнителни средства.
Македонците инвестираат во злато двојно повеќе од лани
Навалицата за злато на светските пазари не стивнува, што деновиве ја качи цената на скапоцениот метал до рекордни над 2.750 долари за унца. Златото поскапе за 30 отсто од почетокот на годинава, а геополитичката неизвесност и светската економија, која се тетерави, само ги тераат инвеститорите сѐ повеќе да бараат сигурност во златото, што може да ја крене неговата цена и до над 3.000 долари до средината на 2025 година, како што прогнозираат аналитичарите.
Зголемен интерес за златото се забележува и во Македонија, каде што од пред неколку години може на пазарот да се купи инвестициско злато, освен традиционалното купување злато како накит, јубилејни монети издадени од Народната банка и сл. Од „УНИ банка“, првата банка што понуди инвестициско злато во земјава, велат дека во изминатиот период значително е зголемен интересот за златните продукти, а прометот во споредба со минатата година е двојно поголем.
Капитални проекти од над 800 милиони евра - нов балон или реалност
Владата планира догодина да потроши рекордни 823 милиони евра за капитални проекти. Сумата е превидена со буџетот за 2025 година кој деновиве ќе влезе во собраниска процедура. Парите за капитални инвестиции (над 50,6 милијарди денари) кои власта планира да ги реализира следната година се за 13 отсто или шест милијарди денари над сумата предвидена со ребалансот за оваа година (44,7 милијарди денари).
Министерката за финансии Гордана Димитриеска – Кочоска при објавувањето на буџетот изјави дека на оваа проекција се „темели развојот, а тоа се огледува и од фактот што износот на капиталните расходи е повисок од номиналниот износ на дефицитот“. Планот на Владата да инвестира над 800 милиони евра во капитални проекти изгледа многу амбициозен ако се земе предвид дека заклучно со 28 октомври, според податоците на веб-страницата на Министерството за финансии, реализирани се само 40,69 отсто или вкупно 295,7 милиони евра (18,188 милијарди денари).
„Комерцијална банка“ оствари добивка од 71,9 милиони евра за девет месеци
„Комерцијална банка“ во периодот јануари-септември годинава оствари добивка од 4,4 милијарди денари (71,9 милиони евра), што е зголемување за 45,1 проценти во однос на истиот период минатата година кога добивката на банката изнесуваше околу три милијарди денари (49,5 милиони евра), покажува неревидираниот биланс на успех на банката објавен преку Македонската берза. Од банката информираа дека планираната бруто-добивка заклучно со третиот квартал од 2024 година е остварена со 139,3 проценти.
„Притоа, остварената добивка пред исправка на вредност, која претставува показател за оперативната способност на банката да ги покрива расходите од работењето, е за 36,4 проценти поголема во однос на истиот период минатата година“, соопшти банката. Оттаму објаснуваат дека зголемувањето на добивката пред исправка на вредност главно произлегува од зголемените останати приходи од дејноста и зголемените нето приходи од камата, а во помал обем и поради зголемените нето приходи од провизии и надомести и нето приходи од тргување.
Продаден блок акции од „Македонијатурист“ за 9,1 милиони евра
Во блок трансакција вредна 564 милиони денари (9,1 милиони евра) вчера на Македонската берза се продадоа 50.953 акции од „Македонијатурист“ АД Скопје коишто претставуваат 11,27 проценти од основната главнина на друштвото. Акциите се продадоа по цена од 11.070 денари за акција, којашто е значително повисока од просечната цена по која се тргуваа акциите на компанијата во изминатиов период. Со ова продолжува низата големи блок транскации со акциите на компанијата овој месец. „Блумберг Адрија“ пред две недели пишуваше дека тетовската градежна компанија „Изо стоне“ (Izostone) влезе во сопственичката структура на „Македонијатурист“.
Според податоците на Централниот депозитар за хартии од вредност, тетовската компанија купила 6,62 проценти од вкупниот број акции на „Македонијатурист“. Тогаш, тетовската компанија им се придружи на уште пет акционери кои поседуваат над пет проценти од акциите во „Македонијатурист“. Тоа се Доне Таневски кој поседува 23,40 проценти од вкупниот број акции на компанијата, „Сава пензиски фонд“, во чија сопственост се 8,80 проценти од вкупниот број акции, „Македонијатурист“ (10 проценти), Соња Бибановска (11,27 проценти) и Симеон Павлов (5,01 проценти).
