Разгневена толпа го набрка шпанскиот премиер од поплавен град

Кралот и премиерот на Шпанија пристигнаа на местото на националната трагедија пред непријателски настроена толпа, која скандираше „убијци“ и фрлаше кал по нив. Додека Фелипе Шести продолжи да оди и да разговара со преживеаните во поплавите, Педро Санчез влезе во својот црн автомобил додека демонстрантите го следеа, извикувајќи навреди, удирајќи ги гумите и тропајќи по неговиот прозорец.

Контрастот помеѓу двајцата - едниот што остана и другиот што побегна - беше остар и не можеше да биде поосудувачки за социјалистичкиот лидер познат како еден од најлукавите политички преживувачи во Европа.

Како врвни институционални фигури, тие го посетија опустошениот град Пајпорта, пет дена по поплавите што однесоа најмалку 211 животи во регионот Валенсија по должината на медитеранскиот брег. Но, патувајќи од Мадрид, кој е оддалечен 400 километри, и двајцата погрешно го проценија расположението.

„Сега можеби не беше време“ за посета, рече министерот за транспорт Оскар Пуенте, зборувајќи за радиодифузерот „Ла секста“ (La Sexta) во една од првите изјави на владин претставник. „Постои чувство на напуштеност, на помош што не пристигнала многу денови“.

Гневот се зголемуваше зашто властите толку бавно реагираа на катастрофата додека регионалните и централните власто - од спротивни страни на идеолошкиот спектар - даваа спротивставени извештаи за времето на алармирање.

Додека расправиите продолжуваа, а бројот на жртвите се зголемуваше, илјадници волонтери помогнаа таму каде што државата не успеа. Во меѓувреме апокалиптичните снимки од последиците од поројните дождови - потопени домови, автомобили натрупани еден врз друг, улици преполни со остатоци - не се вклопуваа со модерниот имиџ на Шпанија како една од најуспешните економии на континентот.

Една особено несреќна фраза на Санчез кружи на социјалните мрежи: Ако на владата на Валенсија ѝ треба нешто, рече тој, „сè што треба да направи е да побара“. Тоа беше упатено до регионалниот претседател на Валенсија, Карлос Мазон, на прес-конференција во саботата кога премиерот го објави најголемото мирнодопско распоредување на војници по критиките за одговорот на една од најсмртоносните поплави во Европа овој век.

Но, во најтешко погодените места, како Пајпорта и соседниот Алфафар, тоа звучеше како политичко пресметување во поширока игра на обвинувања. Исто така, направеното се сметаше за премалку и предоцна откако жителите беа изолирани со денови без вода или електрична енергија, со кал што се лизгаше по улиците и внатре во куќите додека беспомошно чекаа одговор од итните служби.

Прочитајте повеќе на овој ЛИНК.