ЕКОНОМИЈА
ЕЦБ четврти пат годинава ги намалува каматните стапки?
Во фокусот на инвеститорите денеска е одлуката на Европската централна банка (ЕЦБ) за каматните стапки. Економистите на „Блумберг“ очекуваат дека четврти пат годинава ќе се намалат каматните стапки, со оглед на тоа што инфлацијата се приближува до целта од два процента. Речиси сите аналитичари анкетирани од „Блумберг“ за денеска предвидуваат намалување од четвртина процентен поен, како и дека на секој нареден состанок до јуни следната година каматните стапки ќе се намалуваат во истиот обем.
И аналитичарите на „Блумберг Адрија“ очекуваат продолжување на монетарното олеснување и намалување на депозитната каматна стапка за дополнителни 25 базични поени, на ниво од три проценти, што е најниско од пролетта 2023 година.
Bloomberg Mercury
Фед доби зелено светло в среда повторно да ги намали трошоците за задолжување
Откако инфлацијата во САД во ноември порасна во согласност со очекувањата, пазарите ги зголемија облозите кога станува збор за очекуваното намалување на каматните стапки на Федералните резерви (Фед).
Инвеститорите очекуваат дека Фед на средината од следната недела ќе ги намали каматните стапки за 25 базични поени, со што референтната каматна стапка ќе заврши во опсег од 4,25 до 4,5 проценти. Тоа е за цел процентен поен пониско во однос на почетокот на септември.
БИЗНИС
Маск прв човек со нето-богатство од над 400 милијарди долари
На корпоративен план, Илон Маск стана првиот човек во светот чие нето-богатство надмина 400 милијарди долари. Најновиот катализатор беше инсајдерската продажба на акции на „Спејс екс“ (SpaceX), поради што нето-богатството на Маск се зголеми за околу 50 милијарди долари, според индексот на милијардери на „Блумберг“.
И акциите на неговата компанија „Тесла“ (Tesla) во средата пораснаа на највисоко ниво во историјата, што го зголеми богатството на Маск на 447 милијарди долари.
Илон Маск
Bloomberg
БЕРЗИ
Европа
Фјучерсите на европските акции утрово се тргуваат мешано, пред одлуката на ЕЦБ за каматните стапки. И покрај малото забрзување на инфлацијата во еврозоната во последните месеци, економистите очекуваат дека на денешниот состанок каматните стапки ќе се намалат за 25 базични поени, со што каматната стапка на депозити ќе падне на три проценти. Потсетуваме, инфлацијата во еврозоната минатиот месец забрза на 2,3 проценти, што е малку над целта на ЕЦБ од два процента.
САД
Истовремено, фјучерсите на американските индекси се тргуваат претежно во црвено, иако најновите податоци за инфлацијата беа во согласност со очекувањата. Индексот на потрошувачките цени минатиот месец порасна на 2,7 проценти, што е мало зголемување во однос на 2,6 проценти од октомври. Таквиот податок, сепак, беше во согласност со очекувањата на економистите, поради што се зголемија очекувањата дека Фед следната недела ќе ги намали каматните стапки за 25 базични поени.
Азија
Кога станува збор за акциите во азиско-пацифичкиот регион, тие се тргуваат со добивки. Кинеските и јапонските акции предничат по добивките во регионот, додека индексот МСЦИ (MSCI) регистрира најголем раст во последната недела. Азиските акции закрепнаа поради очекувањата дека Пекинг ќе најави дополнителни мерки за поттикнување на забавената економија.
Трговците чекаат и детали од дводневната централна економска работна конференција во Пекинг, на која ќе се дефинираат економските мерки за следната година.
Нафта
Нафтата се стабилизира по тридневниот раст, додека трговците ги анализираа коментарите на американските официјални лица за можните нови мерки кон Русија и Иран и ги чекаа прогнозите на Меѓународната агенција за енергија, кои ќе бидат објавени во текот на денов.
Брентот се купуваше за околу 74 долари за барел откако порасна за повеќе од три проценти за време на трите сесии, додека ВТИ (West Texas Intermediate) беше над 70 долари. Министерката за финансии на САД, Џенет Јелен, рече дека ниските цени на нафтата може да дозволат понатамошни акции против Русија. Во меѓувреме, избраникот на Доналд Трамп за советник за национална безбедност рече дека новата администрација ќе изврши максимален притисок врз Иран.
.webp){kind=icon}
