Најголемата европска економија - Германија - ја очекува повеќемесечен политички застој, бидејќи гласачите се подготвуваат за нови сојузни избори во февруари, додека коалициските преговори би можеле да траат со месеци по изборите. Потсетуваме, пратениците во Долниот дом на германскиот парламент ѝ изгласаа недоверба на владата на канцеларот Олаф Шолц, поради што за 23 февруари се закажани нови избори, и тоа седум месеци предвреме.
Шолц го загуби мнозинството во парламентот откако неговата владејачка коалиција се распадна во ноември поради спор за буџетот. Политичката неизвесност доаѓа во деликатен момент за најголемата европска економија, која со години стагнира. И враќањето на Доналд Трамп во Белата куќа се заканува да го зголеми притисокот врз Германија, бидејќи царините што тој ги најавува би можеле да ги погодат германските извозници.
Трамп: Зеленски да се подготви за договор за завршување на војната
На геополитички план, новоизбраниот американски претседател Доналд Трамп порача дека украинскиот претседател Володимир Зеленски мора да биде подготвен да склучи договор за завршување на војната со Русија. Трамп истакна дека ќе бидат потребни речиси сто години за да се обноват украинските градови и ја критикуваше употребата на американско оружје за напади длабоко во територијата на Русија.
Франција: Спречен колапс на институциите
Само неколку дена откако францускиот претседател Емануел Макрон го именува центристот Франсоа Бајру за нов премиер, Долниот дом на парламентот едногласно усвои посебен законски акт со кој се одобрува продолжување на годинашниот државен буџет и се спречува прекин на работата на државната администрација. Овој закон, како што наведува „Блумберг“, беше неопходен откако владата на премиерот Мишел Барние неодамна беше сменета со гласање недоверба.
Nathan Laine/Bloomberg
КРИПТОВАЛУТИ
Цената на биткоинот над 107.000 долари
На криптопазарот, биткоинот достигна нов рекорд благодарение на поддршката на Трамп за дигиталните валути, но и оптимизмот во врска со претстојното вклучување на компанијата „Микростратеџи“ (MicroStrategy) во индексот Nasdaq 100. Најголемата дигитална валута во понеделникот во еден момент порасна за повеќе од 4,8 проценти, на 107.791 долар, надминувајќи го рекордот од 5 декември.
БЕРЗИ
Европа
Фјучерсите на европските акции утрово се тргуваат претежно во црвено, пред објавувањето на најновите податоци за стапката на невработеност во Велика Британија. Потсетуваме, европските берзи и вчерашното тргување го завршија со загуби, бидејќи трговците се подготвуваат за одлуките на централните банки во Велика Британија, Јапонија и во САД.
САД
И фјучерсите на американските индекси се тргуваат во црвено, пред седницата на Фед. Централната банка на САД в среда ќе донесе одлука за каматната стапка, која, според очекувањата на економистите, треба да биде намалена за четвртина процентен поен.
Азија
Кога станува збор за акциите во азиско-пацифичкиот регион, тие се колебаат помеѓу добивки и загуби. Откако „Ројтерс“ објави дека официјален Пекинг планира раст на БДП од околу пет проценти за 2025 година, акциите во континентална Кина пораснаа, а во Хонгконг паднаа.
Bloomberg
НАФТА
Нафтата се стабилизира по падот, бидејќи слабите економски податоци од Кина ја зголемија загриженоста за побарувачката во најголемиот светски увозник на сурова нафта. Брентот се тргуваше близу 74 долари за барел по падот од 0,8 проценти во претходната сесија, додека ВТИ (West Texas Intermediate) беше под 71 долар, по кинеските податоци во понеделникот што покажаа пад на рафинериската активност и слаба малопродажба. Кинеските лидери најавија посилен стимуланс, но неодамнешните чекори сугерираат дека Пекинг веројатно нема да успее во радикалната акција, за која аналитичарите веруваат дека е потребна за да се запре дефлацијата.
Bloomberg Mercury
.webp){kind=icon}