Акциите на светскиот лидер во областа на вештачката интелигенција паднаа за повеќе од шест проценти, што е најголем пад во последните четири месеци. Доналд Трамп порача дека не ја исклучува можноста за употреба на воена сила или економска принуда кога станува збор за ширење на американското влијание на Гренланд, Канада и Панамскиот канал. Утрово, фјучерсите на европските акции се тргуваат мешано.
ПОЛИТИКА
Трамп не исклучува воена принуда врз Панама и Гренланд
Новоизбраниот американски претседател Доналд Трамп порача дека не ја исклучува можноста за употреба на воена сила или економска принуда кога станува збор за ширење на американското влијание на Гренланд, Канада и Панамскиот канал. На прашањето на новинарите дали би ја исклучил можноста за употреба на воена сила за преземање контрола врз Гренланд и Панамскиот канал, Трамп порача дека не може да ја исклучи таа можност и дека тие области се потребни на САД поради економската безбедност.
БИЗНИС
Акциите на „Енвидија“ паднаа и покрај амбициозните планови
На корпоративно ниво, акциите на „Енвидија“ (Nvidia) во вторникот паднаа за повеќе од шест проценти и покрај големите планови на компанијата во областа на вештачката интелигенција. Ова е најголемиот дневен пад на акциите на компанијата во последните четири месеци. Иако „Енвидија“ претстави многу нови производи на саемот за технологија и електроника во Лас Вегас, аналитичарите очигледно очекуваа повеќе.
Прочитајте повеќе: „Енвидија“ откри амбициозна визија за новиот свет
„Мета“ ја укинува програмата за проверка на факти
Истовремено, компанијата „Мета“ соопшти дека ги укинува независните модератори за проверка на факти на Фејсбук и Инстаграм и дека ќе ги замени со „белешки од заедницата“. Таков систем веќе се применува на социјалната мрежа X, каде корисниците коментираат за вистинитоста на објавите.
БЕРЗИ
Европа
Фјучерсите на европските акции утрово се тргуваат мешано, пред објавувањето на податоците за довербата на потрошувачите во еврозоната. Потсетуваме, европските акции го завршија тргувањето во вторникот со добивки, иако најновите податоци покажаа дека инфлацијата во еврозоната во декември забрзала на 2,4 проценти, во споредба со 2,2 проценти од претходниот месец.
САД
Истовремено, фјучерсите на американските индекси се тргуваат претежно во зелено. Потсетуваме, американските акции го завршија тргувањето во вторникот со загуби, откако најновите податоци покажаа дека американската економија останува отпорна, што може да влијае на Фед да го одложи понатамошното намалување на каматните стапки. Имено, индексот што ја мери активноста на услужниот сектор забрза во декември, што укажува на сè уште силна деловна активност.
Азија
Кога станува збор за акциите во азиско-пацифичкиот регион, тие се тргуваат во црвено. Индексот MSCI е на пат да го регистрира најголемиот пад во повеќе од две недели. Истовремено, кинескиот референтен индекс падна на најниско ниво од септември, бидејќи инвеститорите стравуваат од очекуваното зголемување на американските царини.
НАФТА
Нафтата порасна откако извештајот на индустријата укажа на уште еден пад на резервите на сурова нафта во САД.
Со Брент се тргуваше над 77 долари за барел, откако порасна за еден процент во вторникот, додека нафтата ВТИ (West Texas Intermediate) беше близу 75 долари. Американските резерви се намалија за четири милиони барели минатата недела, соопшти Американскиот институт за нафта, што е седми последователен пад во последните три години.
Bloomberg
.webp){kind=icon}
