Најмалку пет лица загинаа во шумските пожари околу Лос Анџелес, соопштија градските власти во четвртокот наутро. Огнот се шири и во квартот Холивуд, каде што е во тек евакуација на жителите, а на брзото ширење на пожарот влијае силниот ветер кој достигнува до 160 километри на час.
Останаа само 11 дена пред новоизбраниот претседател на САД, Доналд Трамп, повторно да се всели во Белата куќа. Меѓутоа, шефoт на државата во заминување, Џо Бајден, до самиот крај максимално ја користи својата функција и моќ, а овој пат на удар е вештачката интелигенција (ВИ).
СВЕТ
Лос Анџелес под огнена стихија
Градот на ангелите е погоден од најголемата природна катастрофа во последните неколку децении, бидејќи шумските пожари зафатија многу населени подрачја. Најмалку пет лица загинаа, а околу 100.000 луѓе добија наредба да се евакуираат. Иако пожарникарите во средата се бореа да ги задржат двата огромни пожара - еден во квартот Пацифик Палисејдс, а другиот во Пасадена, вечерта избувна нов пожар во ридовите на Холивуд, што доведе до евакуација.
Се очекува дека ветровите кои го разгоруваат огнот, со удари од скоро 130 километри на час, ќе траат до четврток. Пожарите, во кои досега изгореа повеќе од 26.000 хектари, го блокираа животот во вториот по големина град во Америка. Училиштата и патиштата се затворени, домовите и претпријатијата останаа без струја, квалитетот на воздухот опадна, а илјадници раселени жители побараа хотелско сместување или засолниште кај пријатели и семејството.
ПОЛИТИКА
Дополнително ограничување на извозот на чипови за ВИ?
Администрацијата на Џо Бајден планира нови ограничувања за извоз на чипови за вештачка интелигенција од компанијата „Енвидија“ (Nvidia), и тоа само неколку дена пред завршувањето на неговиот мандат. Целта на таквите мерки е да се спречи напредните технологии да стигнат во рацете на Кина и Русија. Имено, САД сакаат да ја запрат продажбата на ВИ чипови кои се користат во центрите за податоци, а сето тоа во рамките на настојувањето развојот на вештачката интелигенција да се концентрира во „пријателски земји“ и компаниите ширум светот да се усогласат со американските стандарди, тврдат извори запознаени со ситуацијата.
Овој став можеби и не изненадува бидејќи „Енвидија“ токму во САД, во Лас Вегас на долгоочекуваната конференција ЦЕС (CES 2025) која трае до 11 јануари, веќе покажа што нè очекува во 2025 година - откривање на нови, револуционерни производи. Покрај напредни решенија за паметни куќи и носливи уреди, овогодинешниот настан понуди и увид во иднината на автономните возила, одржливите технологии и уметнички иновации.
Depositphotos
БЕРЗИ
Европа
Фјучерсите на европските акции во четвртокот наутро се тргуваат мешано, пред објавувањето на податоците за малопродажба во еврозоната. Потсетуваме, европските берзи вчерашното тргување го завршија во црвено, откако економската доверба во еврозоната падна на најниско ниво од ноември 2020 година.
САД
Истовремено, фјучерсите на американските индекси тргуваат со загуби. Американските пазари на капитал денес ќе бидат затворени поради одбележување на националниот ден на жалост, по повод смртта на поранешниот претседател на САД, Џими Картер, кој неодамна почина на 100-годишна возраст.
Американските берзи тргувањето во средата го завршија мешано, бидејќи трговците продолжија да го анализираат записникот од декемвриската седница на Фед. Тој документ покажа дека скоро сите официјални лица се согласни дека инфлаторните ризици растат и дека оваа година можеби ќе биде потребен помал број намалувања на каматните стапки отколку што се очекуваше.
Азија
Кога станува збор за акциите во азиско-пацифичкиот регион, тие претежно се во црвено. Акциите во Јапонија и Австралија предничат по загубите. Истовремено, акциите во континентална Кина и Хонгконг се колебаат, откако најновите податоци покажаа дека се влошиле дефлационите притисоци во втората најголема светска економија.
.webp){kind=icon}