Накратко од светот: „Нетфликс“ со најголем квартален раст во историјата

Новиот претседател на САД изјави дека има големи очекувања од технолошките иновации, но и продолжи да се заканува со воведување царини на стоки од повеќе земји. „Нетфликс“ ги израдува инвеститорите, додека нафтата продолжува да паѓа.

ПОЛИТИКА

Трамп најави инвестиција во развој на вештачка интелигенција

Американскиот претседател Доналд Трамп најави инвестиција во изградба на инфраструктура за развој на вештачка интелигенција (ВИ) низ САД, вредна 500 милијарди долари.

Depositphotos

Зад проектот стојат три водечки технолошки компании „Софтбанк“ (Softbank), „Опен еј-ај“ (OpenAI) и „Оркл“ (Oracle), кои ќе ја основаат компанијата „Старгејт“ (Stargate), посветена на побрз развој на технологијата за ВИ. Се очекува и „Мајкрософт“ (Microsoft) и „Енвидија“ (Nvidia) да учествуваат во овој проект.

САД воведуваат царини од 10 проценти на увоз од Кина?

На трговски план, Трамп порача дека неговата закана за воведување царини од 10 проценти на кинескиот увоз сè уште е на маса и дека би можела да стапи во сила веќе следниот месец.

Потсетуваме дека Трамп најави можност за воведување царини од 25 проценти на Мексико и Канада, ако не ги обезбедат своите граници и не спречат нелегални имиграции.

Монетарната политика и безбедноста во фокусот на третиот ден од Давос

Bloomberg

Во Давос во тек е третиот ден од Светскиот економски форум, на кој политичката и бизнис-елита ќе разговараат за монетарната политика, но и за прашањата за безбедноста.

Ниту вчерашниот ден не помина без споменување на Трамп, но нешто поголем фокус сепак беше ставен на европските политики и развој. Претседателката на Европската комисија, Урсула фон дер Лајен, во својот говор најави мерки со кои Европа ќе се бори против геополитичките промени, кои, како што тврди, најжестоко удираат токму по Стариот Континент.

БИЗНИС

„Нетфликс“ ги надмина очекувањата на Волстрит

На корпоративен план, акциите на „Нетфликс“ во електронското тргување пораснаа за 14 проценти, откако деловните резултати на компанијата ги надминаа очекувањата на Волстрит.

Bloomberg

Имено, „Нетфликс“ во последниот квартал од минатата година регистрираше најголем квартален раст на претплатници во историјата, благодарение на враќањето на серијата „Сквид гејм“ (Squid Game), но и првиот пренос на големи спортски настани во живо. Компанијата доби уште 18,9 милиони претплатници, со што нивниот вкупен број низ светот надмина 300 милиони.

БЕРЗИ

Европа

Фјучерсите на европските акции претежно се во зелено, додека трговците продолжуваат да ги анализираат првите извршни наредби на новиот американски претседател.

Bloomberg

Европските берзи и вчерашното тргување го завршија со мали добивки, при што паневропскиот индекс Stoxx порасна за 0,4 проценти.

 

САД

Истовремено, фјучерсите на американските акции постигнуваат добивки бидејќи се зголемија шпекулациите дека политиката на Трамп ќе обезбеди поттик за корпоративна Америка. Приносите од 10-годишните американски обврзници пораснаа за еден базичен поен, по падот од пет базични поени за време на претходната сесија. Истовремено, доларот зајакна во однос на сите други водечки валути.

 

Азија

Кога станува збор за акциите во азиско-пацифичкиот регион, со нив се тргува претежно во зелено, по најавата за големи инвестиции во развој на ВИ во Америка. Сепак, кинеските пазари се во пад, бидејќи Трамп најави можност за казнени царини на увозот од Кина.

Нафта

Нафтата бележи загуби додека Трамп се заканува со царини, предизвикувајќи загриженост поради трговските војни на неколку фронта.

ICE, Nymex

 

Брентот се купуваше за близу 79 долари за барел по повеќе падови на цената од четвртокот, додека ВТИ (West Texas Intermediate) беше под 76 долари. Трамп рече дека разгледува царини од 10 проценти за Кина како одмазда за приливот на дрога фентанил од таа земја. Канада почна да испраќа големи количества сурова нафта во САД пред потенцијалното воведување дополнителни давачки.