Високата претставничка на Европската унија (ЕУ) за надворешна политика и безбедност, Каја Калас, истакна дека од трговската војна Кина ќе биде земјата која ќе има корист. Рускиот претседател Владимир Путин изјави дека сака да разговара за предложениот прекин на огнот во Украина со својот американски колега Доналд Трамп, но предупреди дека секое примирје би требало да доведе до долгорочен мир.
ЕКОНОМИЈА
Калас: Кина профитира од трговската војна на Трамп
По повод најновите најави на Трамп, се огласи високата претставничка на ЕУ за надворешна политика и безбедност, Каја Калас. Таа тврди дека Кина е земјата која што ќе има корист од актуелната трговска војна меѓу САД и нејзините сојузници.
„Кина е таа која се смешка од страна“, рече Калас вчера на маргините на состанокот на Групата 7 (Г7) во Канада. „Кина навистина ќе има корист од тоа што САД води трговска војна со Европа“.
Нејзината изјава следуваше неколку часа откако претседателот на САД, Доналд Трамп, се закани дека ќе воведе царини од 200 отсто за вино, шампањ и други алкохолни пијалаци од Франција и другите земји од ЕУ. Калас ја повтори подготвеноста на ЕУ да возврати, иако повика на воздржаност бидејќи трговската војна обично предизвикува раст на инфлацијата, која што на крајот е на штета на потрошувачите.
БЕРЗИ
Европа
Фјучерсите на европските акции утрово се тргуваат мешовито, откако се зголемија шансите САД да избегне блокада на работата на владата. Имено, лидерот на демократите во американскиот Сенат, Чак Шумер, се откажа од заканите дека ќе го блокира републиканскиот закон за потрошувачка, со што го отвори патот да се избегне блокада на владата.
САД
Истовремено, американските индекси генерираат претежно добивки, додека доларот продолжува да расте веќе трет ден по ред. Избегнувањето на блокада на работата на владата ја неутрализира неизвесноста на пазарите, кои се веќе нервозни поради економскиот раст во САД и царинската војна на претседателот Доналд Трамп. Да потсетиме дека во текот на два месеци од неговото претседателствување расположението на Волстрит прејде од оптимизам во песимизам поради што од американските пазари на акции се избришани дури пет милијарди долари.
Азија
Акциите во Азиско-пацифичкиот регион се тргуваат со добивки. Во зелено се акциите во Јапонија и Австралија, а индексот CSI 300 во континентална Кина достигна највисоко ниво оваа година.
ПОЛИТИКА
Путин е за примирје во Украина
Путин истакна дека сака да разговара за предложениот прекин на огнот во Украина со Трамп. Сепак, тој предупреди дека секое примирје би требало да доведе до долгорочен мир. „Самата идеја е исправна и ние секако ја поддржуваме, но постојат прашања за кои мора да разговараме“, порача Путин.
По неговата изјава се огласи и американскиот претседател Доналд Трамп, кој порача дека изјавата на Путин е ветувачка, но нецелосна.
Трамп се заканува со царини од 200 отсто на алкохолот од ЕУ
Во рамки на натамошната ескалација на трговската војна, Трамп се закани дека ќе воведе царини од 200 отсто на виното, шампањот и другите алкохолни пијалоци од Франција, но и од другите земји од ЕУ. Трамп во објава на социјалните мрежи напиша дека ќе продолжи со увозните царини доколку Брисел воведе данок за американскиот извоз на виски.
НАФТА
Нафтата поскапе бидејќи САД ги заострува санкциите против Иран и Русија, со што делумно се неутрализираше падот во четвртокот што следуваше по песимистичките прогнози од Меѓународната енергетска агенција за побарувачката. Брентот порасна на повеќе од 70 долари за барел откако во претходната сесија на тргување падна за 1,5 отсто, додека ВТИ (WTI - West Texas Intermediate) е близу 67 долари.
Белата куќа воведе санкции за иранското министерство за нафта, како и за дополнителни компании и бродови кои се користат за транспорт на сурова нафта од оваа членка на ОПЕК (Организацијата на земји извознички на нафта), додека исто така ги ограничи и опциите за плаќање за руската енергија.
.webp){kind=icon}
