Се излеа Маркова Река кај Батинци

Поради обилните врнежи од дожд, Маркова Река се излеа во селото Батинци, Скопско, предизвикувајќи поплави на улиците и во некои од домовите. Надлежните служби се на терен и работат на враќање на реката во нејзиното корито, додека локалните власти уверуваат дека нема опасност за населението.

Градоначалникот на Студеничани, Азем Садики, вели дека состојбата се санира, во моментов нема потреба од евакуација, но има материјални штети.

„Во селото Батинци, во Маркова Река има надојдено повеќе вода. На неколку места има излевање од речното корито. Ангажиравме две-три машини малку да ја санираме состојбата. Не знаеме дали ќе продолжи уште, засега има прекин на врнење на дождот, а во околните куќи околу Маркова Река има влезено вода во дворовите. Мислам дека за населението не е многу ризично за евакуација, засега има материјални штети по дворовите на неколку домаќинства“, рече тој.

Заменик-директорот на Дирекцијата за заштита и спасување, Кашмир Салиу, додаде дека нема опасност од поплави и се во постојана координација со градоначалниците на Кисела Вода и на Студеничани.

„Нашите екипи се упатени на самото место“, рече тој.

„Веднаш по добиената информација за излевање на Маркова Река поради обилните врнежи во општината Студеничани, од гостување на телевизија се упатив на најкритичните места да им помогнеме на нашите соседи“, напиша на Фејсбук Орце Ѓорѓиевски, градоначалник на Кисела Вода.

„Механизацијата е на терен и нема опасност по населението, силно се работи на враќање на реката во своето корито. Со колегата градоначалник на Студеничани, Азем Садику, сме на терен и будно ќе ја следиме ситуацијата да биде под контрола во текот на целата ноќ. Подготвени сме со сите расположливи сили да помогнеме. Во постојана комуникација сме и со колегата Дејан Митевски од Аеродром, така што и тој е подготвен да помогне во случај да е потребно. Временските непогоди не можеме да ги спречиме, но можеме заеднички да дејствуваме да нема големи последици“.

Жители на Батинци изјавија за медиумите дека дел од причините за излевање на Маркова Река е и неисчистеното корито, што, според градоначалникот на Кисела Вода, е во надлежност на Град Скопје. 

Во моментов нема коментари за веста. Биди прв да коментира...

Остави коментар