Акциите на „Тесла“ пораснаа речиси осум проценти во електронското тргување, откако Илон Маск изјави дека од мај во голема мера ќе се повлече од својата позиција во Одделот за ефикасност на владата. Извршниот директор на „Тесла“ најави и дека ќе посвети „многу повеќе време на ’Тесла’“. По таа најава акциите на производителот на електрични автомобили пораснаа, иако финансиските резултати на компанијата во првиот квартал беа полоши од очекувањата на аналитичарите. Повеќе детали открива Ед Ладлоу, новинар на „Блумберг“.
Дали ќе дојде до деескалација на трговските тензии
Американскиот претседател Доналд Трамп изјави дека планира да биде „многу фин“ кон Кина во трговските преговори и дека царините ќе бидат намалени доколку двете земји постигнат договор. „Тие значително ќе се намалат, но нема да бидат нула“, истакна Трамп. Таквите негови коментари доаѓаат откако американските акции и обврзници претрпеа сериозна криза откако на 2 април воведе сеопфатни царини, додека царините за Кина од 145 проценти сè уште се во сила.
ММФ ги намали прогнозите за глобалниот раст
Меѓународниот монетарен фонд значително ги намали прогнозите за глобалниот раст за оваа и следната година, предупредувајќи дека перспективите може дополнително да се влошат бидејќи царините на Трамп предизвикуваат глобална трговска војна. ММФ така ја намали проекцијата за глобалниот раст на 2,8 проценти за годинава, што е помалку во однос на проекцијата од 3,3 проценти од јануари. Исто така тоа би претставувало најбавен раст на БДП уште од пандемијата на ковид-19 во 2020 година. А еве што изјави генералната директорка на ММФ по повод растечкиот ризик од глобална рецесија.
БЕРЗИ
Европа
Фјучерсите на европските акции се тргуваат со добивки, продолжувајќи го нагорниот тренд од претходниот ден. Имено, европските индекси вчера ги избришаа претходните загуби, благодарение на закрепнувањето на американските пазари на акции, но и на силната заработка на француската козметичка компанија „Лореал“ (L'Oreal).
Америка
Фјучерсите на американските акции исто така се тргуваат во зелено, бидејќи администрацијата на американскиот претседател Доналд Трамп ублажи некои од тензиите што претходно ги потресоа финансиските пазари. И доларот зајакна втор ден по ред, откако Трамп изјави дека не планира да го смени претседателот на Федералните резерви, Џером Пауел, иако е незадоволен што централната банка не започна побрзо со намалување на каматните стапки.
.webp){kind=icon}
