Додека Доналд Трамп „ги решава“ тензиите меѓу завојуваните страни – Русија и Украина, со цел да ѝ се стави крај на повеќегодишната војна, неговиот сојузник Илон Маск планира виртуелно да се вклучи во петтиот по ред годишен Економски форум во Катар (англ. Qatar Economic Forum). КЕФ 2025 се одржува во Доха, каде што претставници на влади и бизнис-лидери од 20 до 22 мај ќе дискутираат за глобалната економија. Да потсетиме, САД во последно време настојуваат да ги зајакнат своите односи со Блискиот Исток, за што сведочат и резултатите од неодамнешната посета на Трамп на Саудиска Арабија – таа земја ќе инвестира трилион долари во САД.
ПОЛИТИКА
Трамп најави преговори меѓу Москва и Киев
По телефонскиот разговор со рускиот претседател Владимир Путин, американскиот лидер изјави дека Москва и Киев веднаш ќе започнат преговори за завршување на војната во Украина. Тој додаде дека Ватикан понудил да биде домаќин на состаноците, кои, освен завојуваните страни, би вклучувале и претставници на САД, Европската Унија и Обединетото Кралство.
„Мислам дека ќе се случи нешто, а доколку не се случи ништо, ќе се повлечам, а тие ќе мора да продолжат“, изјави Трамп на прес-конференција во Овалната соба.
Путин претходно го оцени телефонскиот разговор со Трамп како „искрен и многу корисен“, велејќи дека двете страни се договориле дека Русија со Украина ќе работи на меморандум за потенцијално мировно решение. Да потсетиме, ова е трет телефонски разговор на американскиот и рускиот лидер од почетокот на мандатот на Трамп.
ЕУ подготвува 17. пакет санкции против Русија
Германија со своите сојузници работи на нов пакет санкции за да изврши притисок врз Русија да прифати примирје во Украина. Портпаролот на владата Стефан Корнелиус изјави дека Берлин постојано ги ревидира своите опции за санкции кон Русија, кои Европската Унија ќе ги усвои неделава. Во фокусот на 17. пакет санкции ќе биде рускиот финансиски сектор, а се очекуваат и ограничувања за банките што ги поддржуваат воените зафати на Москва.
Yuri Gripas/Abaca/Bloomberg
ЕКОНОМИЈА
Индија сака прелиминарен трговски договор со САД пред јули
Индија разгледува трговски договор со САД структуриран во три транши, а се очекува прелиминарниот договор да биде склучен пред јули, кога треба да стапат во сила реципрочните царини на американскиот увоз. Прелиминарниот договор ќе се занимава, најверојатно, со прашања за пристап до пазарот на индустриски добра, земјоделски производи и нецарински бариери, како што е контрола на квалитетот, изјавиле за „Блумберг“ извори запознаени со ситуацијата.
Преговорите сè уште се во тек и засега не е јасно дали администрацијата на Трамп се согласила на трофазниот процес во трговскиот договор. Индискиот министер за трговија Пијуш Гојал моментално е во четиридневна посета на Вашингтон, а во порака објавена на социјалната мрежа X наведе дека имал „добри разговори“ со американскиот министер за трговија Хауард Лутник.
БЕРЗИ
Европа
Со европските фјучерси утрово се тргува во зелено, откако тргувањето во понеделникот заврши мешано, поттикнато од бран распродажби што предизвикаа намалување на кредитниот рејтинг на САД од страна на агенцијата „Мудис“ (Moody's Ratings).
Еврото е во благ пораст од 0,1 отсто во однос на доларот, додека обврзниците се стабилни, со 2,59 отсто принос на десетгодишните германски обврзници.
САД
Фјучерсите на Волстрит засега укажуваат на уште еден ден тргување во црвено. Американските државни обврзници стагнираат откако десетгодишните приноси скокнаа на 4,46 отсто. По намалувањето на кредитниот рејтинг на САД, се огласија и претставници на Федералните резерви, кои нагласија дека можеби нема да има намалување на каматните стапки пред септември.
Индексот Bloomberg Dollar Spot стагнира, додека цените на нафтата и на златото се во пад. Со едномесечните фјучерси на брентот се тргува по цена од 65,27 долари за барел, додека нафтата ВТИ (WTI) се тргува по 62,72 долари за барел. Златото на спот-пазарот моментално се тргува по цена од 3.212 долари за унца.
GOLDS:COM
GOLD SPOT $/OZ
3.208,18 USD
-21,382 -0,66%
почетна цена
3.229,38
претходна цена на затворање
3.229,557
промена од почетокот на годината
22,602781482187%
дневен опсег
3.204,71 - 3.232,72
опсег на 52 недели
2.286,86 - 3.500,10
Азија
Инвеститорите внимателно ја следат и Азија, каде што се фокусираат на исходите од трговските преговори на Соединетите Американски Држави со Јапонија, Индија и Виетнам. Индексот MSCI Asia Pacific скокна за 0,4 отсто, додека акциите во Хонгконг напредуваа повеќе од еден процент на крилјата на исклучително успешната иницијална јавна понуда на CATL на берзата.
Имено, акциите на „Контемпорари амперекс“ (Contemporary Amperex Technology Co. Ltd - CATL), доставувач на електрични батерии за автомобилските гиганти „Тесла“, „Фолксваген“, „Форд“ и „Мерцедес“, скокнаа до 18 отсто за време на неговиот прв ден од тргување, собирајќи 4,6 милијарди долари и станувајќи најголемата котација годинава, и покрај санкциите од Пентагон и геополитичките тензии.
.webp){kind=icon}
Во моментов нема коментари за веста. Биди прв да коментира...