Доларот ослабе поради шпекулации дека американските каматни стапки би можеле да бидат намалени порано и повеќе отколку што моментално очекуваат пазарите, откако американскиот претседател Доналд Трамп го засили притисокот врз претседателот на Федералните резерви (Фед), Џером Пауел.
Индексот на доларот на „Блумберг“ падна на најниско ниво во последниве три години, откако „Волстрит журнал“ (Wall Street Journal) објави дека Трамп би можел да посочи замена за Пауел веќе во септември или октомври. Трговците ја толкуваат оваа вест како знак дека е сè поверојатен раниот почеток на циклусот на намалување на каматите, бидејќи Трамп одамна бара намалување на трошоците за задолжување.
„Тоа ефективно го прави Пауел помалку релевантен, бидејќи сите веќе го насочуваат вниманието кон идниот претседател“, изјави Метју Хаупт, менаџер на портфолио во ВАМ (Wilson Asset Management) во Сиднеј. „Затоа ова се доживува како навестување на поопуштена монетарна политика“.
Насловите поврзани со Пауел додаваат нова неизвесност за доларот и за американските државни обврзници, кои се под притисок поради загриженоста за ефектите од трговските царини и растечкиот фискален дефицит.
Индексот на доларот на „Блумберг“ падна за 0,4 проценти, на најниско ниво од април 2022 година. Вкупно, индексот годинава изгуби повеќе од осум проценти од вредноста. Трговците во последните денови ги зголемија облозите за намалување на каматните стапки, па сега пазарите предвидуваат вкупно 66 базични поени намалување до крајот на годината, во споредба со 51 поен минатата недела, според податоците од пазарот на свопови.
Bloomberg
Доларот ослабе во однос на сите главни валути во четвртокот, а најголеми добивки забележаа валутите на Тајван, Јужна Кореја и Јужна Африка.
„Оваа вест дефинитивно врши притисок врз доларот“, изјави Игнатиус Панг, шеф на продажба и извршување девизни трансакции за Азија во УБП (Union Bancaire Privée). Моментите на зајакнување на доларот, додаде тој, „се можност за диверзификација на валутните портфолија“.
Како потенцијални заменици на Пауел, „Волстрит журнал“ ги посочува гувернерот на Фед, Кевин Варш, и директорот на Националниот економски совет, Кевин Хасет, наведуваат лица запознаени со ситуацијата.
Што велат аналитичарите на „Блумберг“
„Инвеститорите ќе ја толкуваат можноста претседателот Трамп да именува нов претседател на Федералните резерви до октомври како знак дека раните намалувања на каматите се поверојатни. Пазарите моментално очекуваат Фед да ги намали стапките во септември, но овој пресврт ги зголемува шансите и јули сериозно да се земе предвид за намалување од 25 базични поени“, оценува Марк Кренфилд, стратег на БМЛ (Bloomberg Markets Live).
Трамп во средата изјави дека има три или четири кандидати на ум за наследник на Пауел, чиј мандат истекува во мај 2026 година. Тој повторно го критикуваше Фед поради задржување на стапките на исто ниво, тврдејќи дека централната банка одржува преголеми трошоци за задолжување за американската влада.
„Сосема е реално да се очекува дека ќе се зголеми притисокот врз Пауел да ги намали стапките, а тоа дополнително го поттикнува падот на доларот“, изјави Родриго Катрил, стратег во НАБ (National Australia Bank Ltd.) во Сиднеј.
.webp){kind=icon}
Во моментов нема коментари за веста. Биди прв да коментира...