Доларот е сè поранлив - инвеститорите без добра заштита од нов пад

Ако ги прегледате извештаите на пензиските фондови и осигурителните друштва ширум светот, една работа особено паѓа в очи: некои од најбогатите сопственици на американски средства имаат мала заштита од слабеењето на доларот, што значи дека американската валута би можела да претрпи уште поголем пад доколку расположението на инвеститорите одеднаш се промени.

 

На пазарите како Јапонија, Канада и Тајван, овие инвеститори на 30 јуни заштитиле од валутниот ризик само 41 отсто од својата изложеност во странски валути, што е најниско ниво од најмалку 2015 година, според пресметките на „Блумберг“ засновани на податоци од шест пазари за кои се достапни такви податоци. Иако тоа не дава целосна слика, покажува како минатогодишната ненадејна трка за заштита од загубите поради падот на доларот, поттикната откако претседателот Доналд Трамп воведе глобални царини, стивна како што американската валута постепено се стабилизираше.

Со намалувањето на обемот на валутната заштита, инвеститорите се враќаат на стратегијата што функционираше во поголемиот дел од претходната деценија. Доларот имаше тенденција да расте или барем да ја задржува вредноста кога пазарите стануваа нестабилни, со што ги ублажуваше загубите на американските акции и обврзници кога нивната вредност се пресметува во домашните валути на инвеститорите. Истовремено, бидејќи заштитата од валутниот ризик беше скапа, имаше малку поттик таа да се плаќа.

Ризикот сега е во тоа што двата столба на кои се потпира оваа стратегија, високите трошоци за заштита и статусот на доларот како сигурно засолниште, истовремено се доведени во прашање.

Bloomberg

Доларот во овој квартал ослабе околу 2,3 отсто и ја загуби вредноста во однос на повеќето валути од групата Г10, додека инвеститорите повторно ја активираат стратегијата дека политиките на САД ќе доведат до пад на вредноста на американската валута. Загриженоста дополнително е засилена со потезите на министерот за финансии Скот Бесент да го поддржи јенот и да го ограничи растот на приносите на американските обврзници, како и со сомнежите околу тоа дали претседателот на Федералните резерви (Фед) Кевин Ворш ќе ги зголемува каматните стапки за да ја ограничи инфлацијата, додека Трамп инсистира на пониски трошоци за задолжување.

Валутната заштита ги штити инвеститорите од промените на девизниот курс така што користат деривати за продажба на долари во замена за својата домашна валута. Бидејќи американските средства сочинуваат голем дел од глобалните портфолија, поголемата валутна заштита практично значи и поголема продажба на долари.

„Имајќи го предвид обемот на странска сопственост на американски средства, не е потребна драматична промена во позиционирањето за таа да има значително влијание“, изјави Лора Купер, шефица на макро-кредитниот сектор во Лондон во компанијата „Нувин“, која управува со средства вредни 1,4 билиони долари. „Странските инвеститори поседуваат значителна количина американски средства, па дури и малите промени во односот на заштитената изложеност можат да поттикнат значителни текови на девизниот пазар.“

Зголемувањето на односот на заштитената изложеност за пет процентни поени би значело трансакции во вредност од околу 230 милијарди долари, според процените на „Блумберг“, засновани на 4,6 билиони долари средства во странски валути на шесте набљудувани пазари, меѓу кои се и Австралија, Данска и Финска.

Проценката не ги опфаќа големите пазари како Велика Британија и еврозоната, но земјите што се вклучени и понатаму претставуваат значаен дел од странската сопственост на американски средства. Јапонија е најголем странски сопственик на американски државни обврзници во светот, со околу десет отсто од вкупната странска сопственост, додека Канада и Тајван се меѓу 10-те најголеми сопственици.

Bloomberg

Факторите што во претходните четири години го намалија обемот на валутната заштита од повеќе од 50 отсто почнуваат да се менуваат.

Разликата во каматните стапки што ја правеше заштитата од валутниот ризик скапа сега се намалува. Тримесечниот трошок за заштита од доларот за инвеститорите чија основна валута е јенот падна на најниското ниво во последните четири години, на 2,75 отсто, од максимумот од шест отсто во октомври 2023 година. За инвеститорите чија основна валута е еврото, трошокот падна на најниското ниво во последните две години, на 1,32 отсто.

Побарувачката за валутна заштита и порано осцилираше. Пред една година приливите во берзанските фондови кои купуваа американски средства со валутна заштита за првпат во оваа деценија ги надминаа приливите во фондовите без заштита, покажаа податоците на „Дојче банк“ (Deutsche Bank AG). Сега војната во Иран и скокот на цените на енергентите дополнително ги поттикнуваат инфлаторните притисоци, туркајќи ги централните банки ширум светот кон повисоки каматни стапки и намалувајќи ја разликата во однос на САД.

Патеката на американските каматни стапки е помалку јасна, додека пораките на Ворш ги тераат инвеститорите да проценуваат колку агресивно ќе се бори против инфлацијата. Неговото ветување дека ќе го ограничи растот на цените, дадено во петокот во Џексон Хол, ги зголеми очекувањата дека каматните стапки ќе бидат зголемени. Сепак, инвеститорите истовремено го земаат предвид притисокот на администрацијата на Трамп трошоците за задолжување да останат под контрола, особено во пресрет на изборите за Конгресот на средината на мандатот.

„Ако пазарите продолжат да ги намалуваат очекувањата за зголемување на каматните стапки на Фeд и ако разликата во каматните стапки дополнително се намали, инвеститорите би можеле да почнат повторно да ја воспоставуваат валутната заштита“, изјави Нејтан Туфт, главен инвестициски директор на тимот за стратегии во МИМ (Manulife Investment Management). „Тоа создава стабилен извор на притисок за продажба на долари.“

„Доларот сè повеќе се одвојува од номиналните и реалните приноси, бидејќи кредибилитетот на економската политика ги потисна разликите во каматните стапки како доминантен двигател“, вели Татјана Дарие, стратег во тимот „Маркетс лајв“ (Markets Live) на „Блумберг“.

Стјуарт Симонс, шеф на секторот за стратегии во КИЦ (QIC Ltd.), еден од најголемите австралиски државни управители на средства, рече дека потпирањето на кошница странски валути во која 70 отсто од изложеноста е во долари можеби веќе не е добра заштитна стратегија.

„Во ера на зголемена геополитичка неизвесност, дали навистина можете да бидете толку сигурни дека американскиот долар и понатаму ќе биде главното засолниште во време на криза?“, рече Симонс. „Она што го препорачуваме е да разгледате некои од алтернативите и да се погрижите во таа кошница странски валути да имате нешто поголема диверзификација.“

Bloomberg

Во прашање се доведува и силата на доларот. Планот на американското Министерство за финансии да ги зголеми купувањата на долгорочен долг со цел да ги ограничи трошоците за задолжување, како и координираната интервенција на САД и Јапонија на пазарот на јенот, предизвикаа загриженост поради подготвеноста на властите да ги поддржат пазарите и другите валути на сметка на доларот.

„Ако инвеститорите станат помалку убедени дека доларот сигурно ќе зајакнува во периоди на пазарен стрес, би можеле да имаат помалку причини да прифаќаат голема незаштитена валутна изложеност“, рече Нурелдин ал Хамури, главен пазарен стратег во компанијата ЕГ (Equiti Group) во Дубаи.

Инвеститорите не би морале да ги продаваат американските средства. Тие можат да ги задржат акциите или американските државни обврзници, а истовремено да ја зголемат валутната заштита така што однапред ќе продаваат долари. „Оваа разлика е многу важна бидејќи значи дека побарувачката за американски средства може да остане релативно силна дури и додека доларот е под притисок“, додаде тој.

Јапонија

Потенцијалот за преминување кон поголема валутна заштита можеби е најголем во Јапонија, каде што се наоѓаат некои од најголемите странски сопственици на американски средства. Проценките на „Дојче банк“ покажуваат слична тенденција меѓу јапонските инвеститори, кои во првата половина од оваа година заштитиле од валутниот ризик 41 отсто од новите купувања на странски обврзници, во споредба со 62 отсто во 2024 година.

„Последен пат кога нивото на заштита беше толку ниско, во 2013 година, доларот влегуваше во десетгодишен период на раст. Денешното макроекономско опкружување повеќе личи на спротивна слика“, рече Шоки Омори, главен стратег на „Дојче банк“ за јапонскиот пазар на фиксен приход.

Омори гледа три можни поттикнувачи за промена на трендот: нови зголемувања на каматните стапки на Банката на Јапонија, кои би ја намалиле разликата во каматните стапки; остар пад на доларот, кој би можел да ги продлабочи загубите и да ги натера одборите за управување со ризик да ја зголемат заштитата; и нов режим на солвентност, поради кој осигурителните компании би можеле да имаат помала толеранција кон валутните осцилации.

Bloomberg

Ерик Нелсон, стратег во „Велс Фарго“ (Wells Fargo), предупреди дека валутната заштита не треба да се гледа како основен двигател на движењето на доларот, наведувајќи дека монетарната политика веројатно ќе има доминантна улога на подолг рок. Сепак, смета дека постои простор инвеститорите да ја зголемат заштитата од падот на доларот како што ќе се намалуваат трошоците за обложување против американската валута.

Нелсон очекува еврото да биде еден од главните добитници, имајќи ги предвид големите незаштитени купувања на американски акции од страна на европските фондови.

„Секој знак дека доларот слабее во периоди кога инвеститорите избегнуваат ризични средства може брзо да го промени однесувањето на пазарот на валутна заштита и да го забрза падот на доларот“, рече тој.