Нема причина за разрешување на Пауел, вели Трамп

Доналд Трамп го намали значењето на својот судир со претседателот на Федералните резерви (Фед), Џером Пауел, со кого влезе во конфликт поради наводното пречекорување на трошоците при реновирањето на централната банка. Трамп во четвртокот ја посети Федералната банка и јасно стави до знаење дека прашањето за пониски каматни стапки го смета за поитно. По посетата, за време на која Трамп и Пауел јавно разменија забелешки околу трошоците за проектот, Трамп оцени дека „нема тензии“ меѓу него и Пауел, како и дека проблемите со реновирањето „не се доволна причина Пауел да биде отпуштен“.

„Тоа би било голем чекор, мислам дека не е потребно“, им рече Трамп на новинарите. Сепак, посетата не помина без тензии. Претседателот се пошегува дека во принцип би можел да смени раководител на проект што надгледувал слични пречекорувања на трошоците. Тој му дофрли на Пауел за каматните стапки. „Би сакал да ги намали каматните стапки, што друго да кажам“, додаде Трамп.

Посетата на претседателот беше редок спектакл, имајќи предвид дека Трамп е првиот претседател што ја посетил Федералната банка во речиси две децении. Трамп во својот втор мандат го засили притисокот врз Пауел, загрозувајќи ја долгорочната автономија на централната банка во обид да обезбеди пониски каматни стапки. Вториот мандат на Трамп во Белата куќа беше обележан со ширење на извршната власт, што му помогна да покори многу институции и индустрии, но не и Федералните резерви.

Посетата започна така што Трамп и Пауел, носејќи бели заштитни шлемови, се спуштија низ слабо осветлен ходник за да разговараат со новинарите. Трамп зборуваше за преголемите трошоци за реновирањето на Федералната банка, додека Пауел мавташе со главата. Со видлива непријатност, Пауел се спротивстави и одмавна со главата кога Трамп изјави дека трошоците за реновирањето достигнале 3,1 милијарди долари.

Кога претседателот му понуди на Пауел парче хартија, кое го претстави како нова процена на трошоците, Пауел кратко му рече на Трамп дека неговата анализа на трошоците содржи податоци за зграда што одамна е завршена. „Тоа е третата зграда“, рече Пауел, прекинувајќи го претседателот. „Изградена е пред пет години“, додаде тој. На прашањето на новинар што би направил ако менаџер на еден од неговите градежни проекти го пречекори буџетот, Трамп одговори дека „би го отпуштил“. Пауел се насмеа, а Трамп го потчукна по раката и рече дека „не е ништо лично“.

Се чини дека нема многу опуштање во односите меѓу Трамп и Пауел. Реновирањето на Федералната банка му даде причина на американскиот претседател дополнително да го критикува Пауел, претставувајќи го проектот како екстравагантен. Сепак, на крајот од посетата, новинарите го прашаа Трамп дали нашол докази за лошо управување и расипништво. Американскиот претседател рече дека зградата е „многу луксузна“, но додаде дека разбира оти мерките за безбедност и потребата за изградба во подрумот носат високи трошоци.

Трамп, кој изгради империја на пазарот на недвижности, редовно истакнува дека има искуство со надгледување големи градежни проекти во родниот Њујорк. Тој истакнува дека надгледувал поголеми проекти отколку реновирањето на Федералната банка и дека успевал да ги држи трошоците под контрола, како и дека тоа не е само изговор за да го отстрани Пауел.

Трамп исто така повеќепати ја коментирал политиката на централната банка во врска со каматните стапки. „Само сакам да видам една работа – каматните стапки мора да паднат“, рече тој. Во поширока смисла, Трамп рече дека тој и Пауел „убаво поразговарале“, но одби да каже кои биле заклучоците во врска со каматните стапки, алудирајќи на моменталниот период на тишина на Федералната банка пред нејзината седница следната недела. „Знаете, неговиот мандат наскоро истекува. Мислам дека ќе направи како што е исправно. Сите знаат што е исправно“, додаде тој.

Се очекува официјалните лица на Фед петти пат по ред да одлучат да не ги менуваат каматните стапки, а состанокот за тоа ќе се одржи следната недела. Повеќето официјални лица очекуваат дека ќе ги намалат стапките барем двапати пред крајот на годината, според проекциите објавени во јуни. Сепак, Пауел и неколку други официјални лица рекоа дека претпочитаат внимателен пристап при приспособувањето на политиката, со оглед на можноста царинската политика на Трамп да доведе до трајна инфлација.