Кина покрена антидампинг истрага против некои американски чипови

Министерството за трговија на Кина објави антидампинг истрага против одредени американски аналогни чипови, пишува во соопштението објавено денеска на официјалната интернет страница на институцијата. Поточно, Кина започна две истраги насочени кон американскиот сектор за полупроводници.

Имено, кинеското министерство за трговија соопшти дека започнало истрага за одредени аналогни „Ај-си“ (IC) чипови од 13 септември, а истовремено започнала и антидискриминациска истрага за американските потези против кинескиот сектор за чипови, пишува во одделно соопштение од министерството.

Објавата дојде на само еден ден откако САД додадоа повеќе кинески компании на својата листа на субјекти и во пресрет на состанокот меѓу американскиот министер за финансии Скот Бесент и кинескиот вицепремиер Хе Лифенг, кои треба да се сретнат во Мадрид за да разговараат за трговски, економски и прашања од националната безбедност. Дискусиите ќе го опфатат и статусот на Тикток на „Бајтденс“ (ByteDance Ltd.) - чиј рок да постигне договор за да се осигури дека ќе продолжи со работењето во САД истекува следната недела. Освен тоа, според американското министерство за финансии, ќе се разговара и за напорите за борба против перењето пари.

Инаку, Кина во јануари изјави дека ќе ги истражи наводите дека САД ги отфрла чиповите од пониска класа и неправедно ги субвенционира сопствените производители на чипови, што претставува еден од најсилните одмазднички потези на Пекинг против американските технолошки санкции.

Антидампинг истрагата ќе трае околу една година, а доколку е потребно може да се продолжи за уште шест месеци, додека истрагата против пристрасност обично трае околу три месеци, според регулаторот за трговија.

Во моментов нема коментари за веста. Биди прв да коментира...

Остави коментар