Додека се лади ентузијазмот за „Енвидија“, во Кина расте нов миленик на пазарот на ВИ

Во четвртокот сите очи беа вперени во највредната компанија во светот, „Енвидија“, чии благи прогнози предизвикаа сомнежи кај инвеститорите во врска со одржливоста на бумот на вештачката интелигенција. Во меѓувреме, пошироката јавност речиси и не забележа вест за една кинеска компанија од истиот сектор што тивко бележи раст што далеку го надминува тој на „Енвидија“, но и вредност што сугерира дека пазарот очекува чуда од неа.

Дизајнерот на ВИ-чипови „Камбрикон технолоџис“ сè уште е релативно непознато име надвор од Кина, а неделава соопшти дека во првата половина од 2025 година остварил рекордна добивка (од 144 милиони долари, во споредба со загуба од 74,5 милиони долари претходната година), додека приходите му скокнале за повеќе од 4.000 проценти (на 402,7 милиони долари) во однос на првото полугодие од 2024 година.

Таквиот резултат ја сместува компанијата меѓу најбрзорастечките технолошки фирми во матичната држава, одразувајќи бран побарувачка за кинески чипови, откако официјален Пекинг поттикна користење на домашната технологија во експанзијата на ВИ по Дипсик.

Компанијата моментално обезбедува хардверска поддршка за водечките кинески ВИ-модели, вклучувајќи ги не само споменатиот Дипсик туку и Квен („Aлибаба“), Хунјаун („Teнсент“) и други, а најави и инвестиција од четири милијарди јуани (околу 560 милиони долари) за развој на чипови за големи јазични модели.

Depositphotos

Ова е, без дилема, импресивен раст за „Камбрикон“, вели аналитичарот на „Блумберг Адрија“ Матеј Вујаниќ, но истакнува дека за целата тековна година се очекува раст на приходите околу 500 отсто. Тој број сè уште е импресивен, „но кога се гледа во апсолутен износ, тоа сè уште е многу мал приход во споредба со ’Енвидија‘“, додава тој. Имено, за „Камбрикон“ се проектира приход од 875 милиони долари во 2025 година, додека „Енвидија“ според последните податоци веќе оствари 165,22 милијарди долари приходи.

Вујаниќ го врти вниманието кон вредноста (валуацијата) на двете компании, која покажува дека американската технолошка компанија е фундаментално значително посилна, додека проценетата вредност на „Камбрикон“ е екстремна. „Таа произлегува од очекувањата дека неговата добивка ќе расте побрзо отколку што ’Енвидија‘ растеше во последните три години“.

За споредба, „Енвидија“ на својот врв имала P/E (однос цена/добивка по акција) од 138, наспроти 595 на „Камбрикон“.

Исто така, бележела P/S (однос цена/продажба по акција) од 45 (кај кинеската компанија тој број е 166) и P/B (однос цена/книговодствена вредност по акција) од 66 (а „Камбрикон“ 98).

„Тоа значи дека ’Камбрикон‘ ќе мора да ја надмине ’Енвидија‘ во нејзиниот најдобар период, за да ја оправда денешната валуација“, појаснува Вујаниќ.

Кина стратешки промовира развој на локални компании

Неколку години откако Соединетите Американски Држави (САД) го започнаа револуционерниот развој на ВИ (со достигнувања на „Опен-еј-ај“, „Алфабет“ и други), Кина останува единствената што успева да им биде конкурентна на тоа поле.

Тоа дополнително го комплицира веќе започнатиот технолошки конфликт помеѓу двете нации, а производите на „Енвидија“ деновиве се најдоа во средиштето на геополитичкото ривалство меѓу Вашингтон и Пекинг.

И додека американската администрација бара дел од „колачот“ на „Енвидија“, истовремено испраќа јасна порака дека има цел да обезбеди монопол на домашните компании на светскиот пазар на ВИ.

На тоа, очекувано, кинеската влада се противи и мотивира локални компании (меѓу кои повеќепати се споменуваат „Дипсик“, „Алибаба“ и „Муншот“) да продолжат со унапредување на своите ВИ-модели, кои веќе достигнуваат перформанси на врвните американски решенија. Поточно, Кина постави доминација во полето на ВИ како клучна државна цел, воведувајќи обемна шема на субвенции и национална мрежа меѓусебно поврзани дата-центри.

„Камбрикон“ оствари рекордна добивка поради тоа што растот на побарувачката за домашни ВИ-чипови во Кина го поттикна растот на приходите. Компанијата стана водечка берзанска ѕвезда на кинескиот технолошки сектор и привремено ја престигна дури и компанијата џин „Квеичоу Моутаи“ по цена на акција во јуани, пренесе „Блумберг“.

 

 

 

Сепак, пазарниот ентузијазам кон „Камбрикон“ носи и значајни ризици, па пред компанијата што стана симбол на кинескиот оптимизам околу ВИ стои предизвикот да покаже дали амбициозните очекувања навистина ќе се остварат или ќе се покажат како преголем залак.

Во моментов нема коментари за веста. Биди прв да коментира...

Остави коментар