Кварталната заработка на „Енвидија“ е клучен тест за растот на берзата

Трговците со акции се посмирени неделава, откако претседателот на Федералните резерви, Џером Пауел, сигнализираше дека намалувањето на каматните стапки е на повидок. Следниот клучен тест за берзата ќе биде пресекот на тоа што ги движеше добивките во последните неколку години: еуфоријата околу вештачката интелигенција (ВИ).

Расположението на пазарот беше слабо пред петокот, при што индексот S&P 500 падна пет последователни сесии – најдолга низа на загуби од јануари – откако експертите од Волстрит ги повлекоа обложувањата дека Фед е подготвен да ги намали трошоците за задолжување. Коментарите на Пауел ги растераа ваквите стравувања, туркајќи го индексот S&P 500 до најдобриот ден од мај досега и помалку од два поена од рекордното ниво.

Сега на ред е „Енвидија“ (Nvidia Corp.), која в среда, по затворањето на берзата, ќе ги објави кварталните резултати. Трговците се надеваат дека компанијата ќе ги смири стравувањата околу трошоците за ВИ и ќе потврди дека последниот раст на берзата не е само уште еден технолошки балон.

„’Енвидија’ е клучна за берзата, затоа што секој сигнал за дополнителен раст ќе биде гориво што може да го запали овој пазар“, вели Ерик Бајли, извршен директор за управување со богатство во „Стјуард партнерс“ (Steward Partners). „Ризикот е што инвестицискиот бум во ВИ може да се покаже како достигнат врв, доколку резултатите разочараат и прогнозите бидат претпазливи – што би можело сериозно да ги вознемири пазарите.“

Со речиси 8 отсто удел во индексот S&P 500, „Енвидија“ (Nvidia) е најголемиот учесник во индексот и стана главен барометар за движењата на пазарот, благодарение на клучната улога во развојот на ВИ. Чиповите на технолошкиот гигант се присутни насекаде, а дури 40 отсто од приходите доаѓаат од „Мета платформс“ (Meta Platforms Inc.), „Мајкрософт“ (Microsoft Corp.), „Алфабет“ (Alphabet Inc.) и „Амазон“ (Amazon.com Inc.), кои се меѓу десетте најголеми компании во индексот.

„Енвидија“ со најголем удел во индексот S&P 500

Bloomberg

Затоа објавата на кварталните резултати на „Енвидија“ и нејзините прогнози се решавачки момент за берзата.

Притисокот расте

„Притисокот и натаму е навистина силен“, вели Ким Форест, главна инвестициска директорка во „Боке капитал партнерс“ (Bokeh Capital Partners LLC). „Голем дел од движењата на пазарот во последниве години се темелеше на ’Енвидија’ и на компаниите околу неа. Затоа сум малку нервозна.“

Тоа, сепак, не значи дека инвеститорите немаат претстава какви ќе бидат резултатите на „Енвидија“. Нејзините најголеми клиенти веќе објавија претежно солидни резултати во текот на сезоната, со ветувања дека ќе продолжат со милијардите вложувања во капитални трошоци. Тоа е охрабрувачки сигнал за добивката и прогнозите на производителот на чипови.

„Често ’Енвидија‘ (Nvidia) ги објавува резултатите во моменти кога технологијата се доведува во прашање, а тоа сигурно се случуваше во изминативе две недели“, вели Арт Хоган, главен пазарен стратег во „Б. Рајли Велт“ (B. Riley Wealth). „’Енвидија‘ има потенцијал да биде позитивен катализатор.“

„Енвидија“ со големи осцилации по објавата

Акциите бележат значајни движења во двата правца по објавувањето на заработката.

 

Bloomberg

Акциите на „Енвидија“ (Nvidia) во петокот скокнаа за 1,7 отсто, прекинувајќи ја тридневната низа на падови – најдолга во последниот месец – и ја приближија акцијата на помалку од 3 отсто до рекордното ниво достигнато на почетокот на август. Аналитичарите од Волстрит очекуваат „Енвидија“ да прикаже приспособена заработка од 1,01 долар по акција во вториот фискален квартал – скок од 48 отсто во однос на минатата година – при приходи од над 46 милијарди долари, што е зголемување од 54 отсто во споредба со истиот квартал лани.

Се разбира, како што силен извештај може да ги поттикне акциите на „Енвидија“ и да го повлече пазарот нагоре, така и секое разочарување – вистинско или само перципирано – може веднаш да го запре растот и значително да ја зголеми тежината на падот. Според податоци собрани од „Блумберг“ (Bloomberg), трговците со опции пресметуваат движење од околу 6 отсто во кој било правец.

Иако пониските каматни стапки треба да им помогнат на акциите за раст како што е „Енвидија“ (Nvidia), тие нема да ги отстранат грижите околу високите пазарни вреднувања. Акциите во индексот S&P 500 се тргуваат по цена што е 22 пати повисока од очекуваната добивка по акција за следната година, што е над неговиот десетгодишен просек од 19. „Енвидија“ се тргува по цена што е околу 34 пати повисока од очекуваната добивка, што е под нејзиниот петгодишен просек од 39.

Екстремно високи вреднувања

„Вреднувањата се на екстремно високи нивоа“, вели Бајли од „Стјуард партнерс“. „И покрај тоа, инвеститорите продолжуваат да го игнорираат проблемот очекувајќи дека овие фаворити на пазарот со ВИ ќе продолжат да испорачуваат извонредни резултати“.

Едно од најголемите прашања за „Енвидија“ е дали ќе успее да ги продава своите производи во Кина. Администрацијата на Доналд Трамп неодамна им даде дозвола на „Енвидија“ и на „Адвансд мајкро дивајсис“ (Advanced Micro Devices Inc.) да продолжат со продажбите во Кина под услов 15 отсто од приходите да ѝ се даваат на американската влада. Но Пекинг потоа ги охрабри локалните компании да избегнуваат да го користат чипот H20 на „Енвидија“, кој беше дизајниран специјално за кинескиот пазар, па, според извештај на „Информејшн“ (The Information), фирмата им наложила на доставувачите да ја стопираат неговата продукција.

„Очекувањето на пазарот беше дека на крајот на ’Енвидија‘ ќе ѝ биде дозволено да се врати во Кина“, вели Мајкл О’Рурк, главен пазарен стратег во „Џоунстрејдинг“ (Jonestrading). 

Проблемот сега е што американската администрација тврди дека дозволува продажба на чиповитеH20  затоа што тие речиси се застарени, што Пекинг го сфати како навреда. Дополнително, Кина е загрижена дека САД би можеле да ги искористат чиповите на „Енвидија“ за создавање тајни пристапи („задни врати“) во кинеската технологија.

Аналитичарите на Волстрит, кои долго време се оптимистички расположени кон акциите на „Енвидија“, не гледаат голема причина за загриженост. Според податоци од „Блумберг“, само во последната недела најмалку девет од 79 аналитичари што ја покриваат компанијата ги зголемија своите ценовни цели врз основа на очекувања за солиден квартален извештај, поставувајќи ја просечната на над 194 долари. Тоа имплицира раст од околу 9 отсто во однос на цената на затворање на акцијата од 178 долари во петокот.

Се разбира, извештајот на „Енвидија“ не е единствениот можен катализатор за пазарот следната недела. Трговците ќе ги следат и новите податоци за инфлацијата во основниот индекс на лична потрошувачка, кои ќе бидат објавени в петок. Сепак, загриженоста дека резултатите на компанијата би можеле да предизвикаат распродажба и натаму доминира во размислувањата на Волстрит.

„Загрижен сум“, вели Бајли. „Економијата се соочува со тарифи и забавување на растот на вработеноста. Затоа овие скапи акции се зрели за голем пад ако се појават лоши вести, а поширокиот пазар е ранлив поради концентрацијата во неколку компании.“