S&P 500 паѓа веќе четврти ден по ред. Дали е време за купување?

Сигналите дека инфлацијата и понатаму останува главна грижа за функционерите на американската централна банка Фед придонесоа за повисоки приноси на обврзниците и ги зголемија загубите во повеќедневниот пад на технолошките акции, кој избриша милијарди долари создадени во претходниот раст. Инвеститорите со нетрпение го очекуваат говорот на Џером Пауел в петок, додека записите од последниот состанок на Фед ја зголемија загриженоста дека централната банка можеби нема да спроведе пошироко олеснување на политиката, како што очекуваат многумина. Заедно со „величествената седумка“ падна и американскиот индекс S&P 500, веќе четврти ден по ред.

Цените на големите технолошки компании се во црвено – „Енвидија“ (Nvidia), на пример, во два дена изгуби пет отсто од вредноста. Индексот Nasdaq 100 падна за еден отсто. „Палантир технолџис“ (Palantir Technologies), кој годинава можеше да се пофали со двојно зголемување на вредноста на акцијата, за шест дена изгуби 20 отсто. Приносот на двегодишните државни обврзници остана речиси непроменет, на 3,74 отсто.

Функционерите на Фед се загрижени поради повисоката инфлација и послабиот пазар на трудот. „Повеќето учесници оценија дека ризикот од повисока инфлација е поголем од ризикот од послаб пазар на труд“, се наведува во записникот од јулскиот состанок.

Дејвид Расел од компанијата „Трејдстејшн“ (TradeStation) истакнува дека документот ги потврдува јастребовските коментари на Пауел на последниот состанок. „Биковите би можеле да доживеат ладен туш во Џексон Хоул“, рече тој. Според Питер Буквар од „Бук репорт“ (Boock Report), идниот месец сепак ќе дочекаме намалување на каматните стапки, но со претпазливост, додека октомврискиот состанок ќе донесе нов поглед врз основа на тогашните податоци.

Мет Мали од „Милер табак“ (Miller Tabak) вели дека ќе бараат сигнали дали станува збор за привремен нарушувачки фактор или за нешто позагрижувачко. „Пред да предизвикаме тревога ќе треба да видиме понатамошен надолен притисок“, рече тој, додавајќи: „Инвеститорите би можеле многу брзо да станат многу нервозни ако технолошкиот сектор, а со него и пазарот, навистина влезе во позначаен пад“.

Според Марк Хакет од „Нејшнвајд“ (Nationwide), инвеститорите покажуваат замор по 30-процентниот раст што практично трае од април. „Гледаме значителен пад на водечките акции. Акциите на компании со голема пазарна капитализација и раст месецов значително заостануваат зад помалите фирми и вредносните акции“, вели Хакет. „И покрај тоа, волатилноста и кредитните спредови остануваат мирни, што укажува дека стравовите на инвеститорите се умерени“.

Компаниите со голема пазарна капитализација со месеци го предводеа растот на берзата поради сè поголемата побарувачка за производи од областа на вештачката интелигенција и услугите во облак. Некои стратези сега предупредуваат дека нивната претерана застапеност во индексите би можела да доведе до поширок пад на пазарот.

За некои инвеститори продажбата заради остварување добивка стана поважна од преземањето нови ризици, поради загриженоста дека процените стануваат пренадуени, вели Фавад Разакзада од „Сити индекс“ (City Index) и „Форекс“ (Forex.com). Сепак, веројатно е дека падовите, дури и во технолошкиот сектор, ќе бидат ограничени.

„Дали технолошкиот сектор ќе достигне нови пикови благодарение на коментарите на Пауел, допрва ќе се види“, додаде Разакзада. „Во секој случај, централните банки низ светот ја олеснуваат политиката, што ги поддржува глобалните пазари на акции“.

Купувај кога паѓа?

Падот на американските акции создава можност за „купување при пад“, порачаа од трговската единица на „ЏП Морган Чејс“ (JPMorgan Chase).

„Денес изгледа како тест за купувачите при пад, бидејќи денешните податоци за PMI и говорот на претседателот на Фед, Џером Пауел во Џексон Хоул, би можеле да го поместат пазарот или да го сменат наративот“, напиша во средата Ендру Тајлер, шеф за глобална пазарна интелигенција во „ЏП Морган“ (JPMorgan).

Според Керол Шлајф од „БМО Прајват велт“ (BMO Private Wealth), моменталните процени на акциите се високи и оставаат мал простор за разочарување. „Пазарот на акции во моментов однапред ја дисконтира светлата иднина, а таа процена во голема мера е оправдана со подобрите од очекуваните резултати и сè поголемата јасност во однос на трговската и даночната политика“, рече таа.