Фед е пред жестока расправа за каматните стапки

Претставниците на Федералните резерви (Фед) се решени да ги држат каматните стапки стабилни уште малку, иако сè поконтроверзната дебата на состанокот за политиката неделава може да ги зајакне очекувањата за намалување на стапките наесен.

Претседателот на Федералните резерви, Џером Пауел, е под силен притисок од американскиот претседател Доналд Трамп и неговите сојузници за да ги намали трошоците за позајмување, па неделава може да се соочи со повеќекратни несогласувања од претставници што сакаат да обезбедат поттик на пазарот на трудот, кој инаку забавува.

Но се очекува американската централна банка да ја остави својата референтна стапка непроменета на крајот од дводневниот состанок на 30 јули, додека креаторите на политиките чекаат повеќе податоци што го откриваат влијанието на царините врз потрошувачките цени.

„Дури и ако не гледаме никаква промена во политиката, мислам дека гледаме навестувања дека сме на пресвртница“, рече Сара Хаус, виш економист во „Велс Фарго“. „Но, се разбира, поголемиот дел од комитетот сè уште не е на тоа стојалиште - мислам дека сè уште се претпазливи за тоа што ќе се случи со инфлацијата во врска со овие царини“.

Претставниците на Федералните резерви ќе ја објават одлуката по состанокот в среда, во 14 часот по локално време во Вашингтон, а Пауел ќе одржи прес-конференција 30 минути подоцна. Фјучерсите на каматните стапки покажуваат дека инвеститорите се обложуваат на веројатно намалување на стапката на следниот состанок, во септември, а набљудувачите на Фед ќе слушаат сè што помага да се потврди тој став.

Одлуката за стапката доаѓа во средината на недела преполна со објавувања клучни економски податоци, вклучувајќи го и месечниот извештај за вработување што треба да се објави в петок. Економистите очекуваат дека тој извештај ќе покаже забавување на вработувањето во јули бидејќи неизвесноста околу трговската политика на Трамп продолжи да ги оптоварува перспективите.

Несогласувања

Многу аналитичари гледаат можност за несогласувања од страна на гувернерот на Фед, Кристофер Волер, и потпретседателката на Фед за супервизија, Мишел Боуман, две лица назначени од Трамп, кои изразија загриженост дека стапките се превисоки со оглед на зголемените ризици за вработување.

Волер навести несогласување претходно месецов, велејќи дека Фед треба да дејствува сега за да го поддржи пазарот на трудот, кој е „на работ“. Боуман минатиот месец исто така рече дека би можела да поддржи намалување на стапката уште во јули ако ценовните притисоци останат придушени.

Доколку и Волер и Боуман гласаат со несогласување, тоа ќе биде првпат двајца гувернери да го сторат тоа од 1993 година. Се смета дека Волер е меѓу кандидатите што Трамп ги разгледува за замена на Пауел кога ќе му истече мандатот како претседател во мај.

Некои коментатори ги игнорираа поделбите што се појавија при гласањето. Во белешка до клиентите во петокот Мајкл Фероли, главен економист за САД во „ЏП Морган Чејс“, рече дека двете несогласувања би ги сметал „повеќе како аудиција за назначување претседател на Фед отколку како став за економските услови“.

Bloomberg

 

Дајана Свонк, главна економистка во КПМГ (KPMG), забележа дека несогласувањата се вообичаени во близина на пресвртните точки на политиката.

„Треба да се очекува несогласување во услови кога Фед се приближува до одлуката кога да ги намали стапките, со оглед на широкиот опсег на неизвесност околу тоа како ќе се одвиваат царините“, напиша таа во белешка до клиентите во четвртокот.

Додека Волер и Боуман сѐ повеќе се фокусираат на мандатот за вработување на централната банка, повеќето други сѐ уште се повеќе загрижени за инфлацијата. Неизвесноста околу тоа како ќе влијаат царините на цените и како централната банка треба да одговори беше очигледна во проекциите што ги објавија креаторите на политиките во јуни: од 19-те надлежни, 10 сакаа најмалку две намалувања на стапките од четвртина поен годинава, а седуммина не најавија никакви намалувања.

Неодамнешните извештаи за инфлација покажаа зголемување на цените за некои стоки погодени од царините, вклучувајќи играчки и апарати за домаќинство. Но, според индексот на потрошувачки цени, и основната инфлација се зголеми за помалку од очекуваното во јуни, веќе петти месец по ред, што сугерира дека притисоците врз цените сè уште немаат широка основа.

„Со оглед на сценариото за инфлацијата по ковид, некои службеници на Фед се повнимателни дека царините можеби ќе се појават подоцна или ќе потраат подолго“, рече Џон Бригс, раководител на стратегијата за американски каматни стапки во „Нетиксис Норт Америка“ (Natixis North America). „Нетиксис“ очекува Фед да го продолжи својот циклус на олабавување во октомври, и тоа со серија намалувања од четвртина поени до јуни 2026 година.

Прес-конференција

На својата прес-конференција Пауел речиси сигурно ќе се соочи со прашања во врска со царините и инфлацијата. Веројатно ќе остане претпазлив, повторувајќи ја својата порака дека службениците имаат обврска да ја одржат ценовната стабилност, бидејќи инфлацијата сè уште е над целта на Фед од два отсто.

Претседателот на Фед може да признае дека податоците што се подобри од очекуваното и неодамна објавените трговски договори ја намалуваат веројатноста за најлошото сценарио за инфлацијата, повторувајќи ги коментарите на други службеници во последните недели и отворајќи ја вратата за намалување на каматните стапки во септември.

До следниот собир на креаторите на политиките на 16 и 17 септември, тие ќе имаат уште два извештаи за работни места во рака, заедно со повеќе податоци за инфлацијата, потрошувачката и домувањето.

Дотогаш, според Анджеј Скиба од „РБЦ Глобал асет менаџмент“ (RBC Global Asset Management), надлежните може да бидат во позиција да ги намалат стапките освен ако нема агресивна ескалација на царините или изненадувања со податоците за инфлацијата во нагорна линија.

Меѓутоа, досега прашањето е оставено економистите да се занимаваат зошто царините досега немале поголемо влијание врз цените. Може да бидат вклучени низа фактори, како потезите на бизнисите да создадат резерви пред да настапат царините и да го распределат товарот низ целиот синџир на снабдување, рече Грегори Дако, главен економист на „ЕЈ Партенон“ (EY-Parthenon).

„Очекувам дека претседателот Пауел ќе ги истакне овие механизми и ќе нагласи дека овие притисоци врз трошоците почнуваат да се појавуваат, но сепак ќе одржи умерен наратив“, рече Дако.

Пауел годинава се соочи со огромен притисок од страна на Трамп, вклучувајќи и закани за отказ. Нападите на републиканците врз централната банка во последните недели се фокусираа на нејзиниот проект за реновирање на зградите во вредност од 2,5 милијарди долари, кулминирајќи во четвртокот со обиколка на градилиштето од страна на самиот Трамп.

Претседателот на Фед в среда веројатно ќе одговара и на такви прашања од новинарите, во врска со нападите, но веројатно ќе ја задржи својата порака фокусирана на економијата.

„Фасциклата на претседателот Пауел со подготвени одговори на предвидливи прашања ќе биде густа со материјал што нема никаква врска со монетарната политика“, напиша Фероли во својата белешка. „Очекуваме Пауел да повтори дека е фокусиран на работата што му ја доверил Конгресот“.

— Текстот е напишан со помош од Марија Елоиза Капуро, Мајкл Мекензи и Је Сие.

Во моментов нема коментари за веста. Биди прв да коментира...

Остави коментар