Намалувањето на каматната стапка во САД ќе означи пресврт на пазарот на трудот

Се очекува функционерите на Федералните резерви да го поддржат ослабениот американски пазар на труд со намалување на каматните стапки во среда, што ќе означи пресврт откако загриженоста околу инфлацијата предизвикана од царините ги држеше на исто ниво цела година.

Политичкиот пресврт ќе се случи по постојаниот притисок од претседателот Доналд Трамп, кој оваа недела побара „големо намалување“ на каматите. Политичките драми, исто така, донесоа неизвесност околу тоа кој воопшто ќе присуствува на состанокот за монетарната политика оваа недела, иако составот се претпоставува дека беше финализиран во понеделникот навечер, кога Сенатот го потврди изборот на нов гувернер во Фед, а подоцна и една судска одлука овозможи на друг функционер засега да остане на функцијата.

Покрај тие интриги, инвеститорите ќе бидат фокусирани на претседателот на Фед, Џером Пауел, и на новите економски проекции за насоката на каматните стапки во наредните месеци. Проекциите ќе бидат објавени во 14 часот по вашингтонско време, заедно со одлуката за каматните стапки, а прес-конференцијата на Пауел ќе започне 30 минути подоцна.

Според набљудувачите на Фед, различните ставови за вработеноста и инфлацијата ќе спречат функционерите да ветат агресивно темпо на намалување на стапките.

„Секое следно намалување е потешко од претходното, освен ако пазарот на труд не покаже знаци на постојано влошување“, рече Адитија Бхаве, главен економист за САД во „Бенк оф Америка“.

Различни гласачи

Иако одлуката за каматната стапка ќе биде во фокусот на многу набљудувачи, вонредните околности околу составот на Комитетот за отворен пазар на Фед доминираа во вестите пред состанокот.

Сојузникот на Трамп, Стивен Миран, кого претседателот го номинираше за празното место во централната банка, свечено се заколна во вторникот наутро, токму пред состанокот. Миран е остро критикуван затоа што одби да се повлече од функцијата претседател на Советот за економски советници на Белата куќа. Наместо тоа, тој замина на неплатено отсуство, што го доведува во прашање неговиот капацитет за независно делување во Фед.

Во меѓувреме, апелацискиот суд во понеделникот навечер одлучи дека гувернерката на Фед, Лиза Кук, може да продолжи да работи во централната банка додека трае нејзиниот спор против Трамп кој се обидува да ја отпушти. Администрацијата на Трамп има намера да побара од Врховниот суд да му дозволи на претседателот да ја разреши поради наводи за измама со хипотеки, што Кук ги негира.

Според Кети Бостјанчич, главен економист во „Нејшнвајд“, точниот состав на гласачите, и дали Кук на крајот ќе остане во Фед, веројатно нема суштински да ја смени насоката на каматните стапки во следните неколку месеци. Но, ако претседателот успее да ја замени Кук, чиј мандат трае до 2038 година, тоа може да влијае врз долгорочната траекторија на стапките.

Трамп, исто така, ќе може да назначи нов претседател на Фед по истекот на мандатот на Пауел во мај. Мандатот на Миран истекува на крајот на јануари, но тој може да биде номиниран за подолг период или да остане во Фед додека Трамп не назначи друг за функцијата.

Се очекува Пауел да се соочи со прашања за сето ова, и дали тоа претставува закана за независноста на Фед од Белата куќа, за време на неговата прес-конференција.

Несогласувања

Набљудувачите на Фед гледаат можност за несогласувања околу очекуваното намалување на каматните стапки за четвртина поен, со тоа што дел од функционерите би поддржале поголемо намалување, а други би преферирале стапките да останат непроменети.

Разликите произлегуваат од тоа дали креаторите на политиката повеќе се загрижени дека пазарот на труд е на раб на остро влошување или, пак, се главно загрижени дека инфлацијата може да се забрза поради царините.

Двајца гувернери на Фед, Кристофер Волер и Мишел Боуман, гласаа против јулската одлука да не се менуваат стапките, наведувајќи загриженост за пазарот на труд. И двајцата беа назначени од Трамп за време на неговиот прв мандат.

Податоците објавени од тој состанок наваму покажаа дека растот на вработувањето остро забави, што доведе до поширока загриженост за потенцијален пад.

Bloomberg

Во исто време, инфлацијата останува над целта, иако преносот од царините кон конечните цени е поумерен отколку што првично се стравуваше, рече Бостјанчич.

Ако тројца функционери гласаат против, тоа ќе биде првпат од септември 2019 година повеќе од двајца да се спротивстават на одлука за каматните стапки.

Нови прогнози

Економистите анкетирани од „Блумберг Њуз“ во најголем дел очекуваат функционерите да предвидат две намалувања на каматните стапки за оваа година, во согласност со проекциите доставени во јуни. Тоа би значело уште едно намалување по состанокот оваа недела, или во октомври, или во декември.

Јунските прогнози за инфлацијата и невработеноста останаа релативно стабилни, што им дава малку причини на функционерите да додадат повеќе намалувања во нивната основна перспектива, смета Бхаве.

Но значајно малцинство од анкетираните економисти — повеќе од 40 отсто — очекуваат функционерите да запишат три намалувања на каматните стапки за 2025 година.

Проекциите, исто така, ќе покажат колку олеснување очекуваат функционерите за следната година, и како ја гледаат на инфлацијата и невработеноста во иднина.

Во моментов нема коментари за веста. Биди прв да коментира...

Остави коментар