Коцкањето на Трамп со Фед ризикува да ги турне каматите на обврзниците уште повисоко

Претседателот Доналд Трамп со невиден и сè поостар притисок врз Федералните резерви ризикува да предизвика контраефект, со повисоки долгорочни трошоци за задолжување што може да ги погоди финансиските пазари и економијата.

Со недели тој го критикува претседателот на Фед, Џером Пауел, зашто не ги намалил каматните стапки поодлучно за да ја стимулира економијата и, според Трамп, да ги намали трошоците на владата за сервисирање на државниот долг.

Трамп веќе го номинираше шефот на својот Совет на економски советници во управниот одбор на централната банка, а сега се обидува да ја разреши гувернерката Лиза Кук, отворајќи пат за правна битка околу политичката независност на институцијата.

Но и покрај големата моќ на Фед врз краткорочните каматни стапки, токму приносот на 10-годишните американски обврзници, кој во реално време го одредуваат трговците низ светот, најмногу влијае врз тоа колку Американците плаќаат за трилиони долари хипотеки, деловни кредити и други долгови.

И иако Пауел сигнализира дека е подготвен да почне со олабавување на монетарната политика уште од следниот месец, каматните стапки упорно остануваат високи од други причини: царините се закануваат да ја влошат и онака зголемената инфлација; буџетскиот дефицит е на пат да продолжи да го преплавува пазарот со нови обврзници; а даночните олеснувања на Трамп може дури и да донесат нов стимуланс следната година.

Ако на тоа се додадат и стравувањата дека Федералните резерви, лојални на претседателот, би можеле да ги намалат каматните стапки премногу и пребрзо, со што би се загрозила кредибилноста на централната банка во борбата против инфлацијата, долгорочните стапки би можеле да завршат уште повисоко од сегашните, притискајќи ја економијата и потенцијално предизвикувајќи потреси на другите пазари.

„Комбинацијата од послаб раст на вработувањата во САД и провокациите на Белата куќа кон Федералните резерви, и институционални и лични, почнува да создава сериозни проблеми за инвеститорите во американските обврзници“, изјави Дејвид Робертс, шеф на секторот за фиксни приходи во „Недгруп инвестментс“ (Nedgroup Investments), кој очекува дека долгорочните стапки ќе се зголемат дури и ако краткорочните паднат. 

„Инфлацијата е далеку над целта на Фед. Евтино финансирање сега најверојатно би поттикнало бум, послаб американски долар и значително повисока инфлација.“

 

Дефицитите и ризиците од инфлација ги држат долгорочните приноси високи

Трендот може да го ублажи економскиот ефект од намалувањето на каматите на Фед

Bloomberg

Притисокот врз долгорочните каматни стапки не постои само во САД. Тие се задржуваат високи и во Велика Британија, Франција и други земји, поради загриженоста на инвеститорите од истата комбинација на високи нивоа на државен долг и сè понепредвидлива политика.

Но вкрстените текови од враќањето на Трамп во Белата куќа создадоа свои предизвици.

За време на минатогодишната претседателска кампања, кога инвеститорите почнаа да се обложуваат на неговата победа, приносите на 10-годишните обврзници нагло пораснаа, иако Федералните резерви почнаа да ја повлекуваат својата референтна еднодневна стапка од над две децении високото ниво. Тоа беше затоа што инвеститорите очекуваа дека даночните намалувања на републиканците и агендата за дерегулација ќе ѝ додадат гориво на тогаш изненадувачки отпорната економија.

Откако Трамп ја презеде функцијата, сепак, Федералните резерви се во застој, бидејќи неговата непредвидлива трговска војна ја нарушува економската перспектива, ги плаши странските инвеститори и се заканува да ги зголеми потрошувачките цени. Кога воведувањето на царините во април од страна на Трамп предизвика една од најлошите распродажби на обврзници во последните децении, приносите нагло пораснаа, а Трамп ги стопира, велејќи дека пазарите „стануваат малку нервозни, малку исплашени“.

Оттогаш повторно ги воведе увозните давачки и неговата трговска политика и понатаму останува непостојана. 

Во исто време, неговиот закон за даночни намалувања треба да додаде повеќе од 3 трилиони долари на дефицитот во следната деценија, што ќе го зголеми јавниот долг освен ако неговите царини не бидат задржани од идните претседатели и на крајот не обезбедат доволно приходи за да го компензираат трошокот.

„САД мора да издадат огромен број државни обврзници за да го финансираат дефицитот“, изјави Мајкл Арон, главен инвестиционен стратег во „Стејт стрит инвестмент менаџмент“ (State Street Investment Management).

Тој рече дека ваквиот товар дополнително ги зголемува загриженоста за растот и инфлацијата.

„Како резултат, очекувам дека долгорочните стапки ќе останат повисоки и по­нестабилни отколку што очекува пазарот.“

Во моментов нема коментари за веста. Биди прв да коментира...

Остави коментар