Гувернерката на Фед, Лиза Кук, нема намера да се повлече од функцијата

Гувернерката на Федералните резерви, Лиза Кук, ја најави својата намера да остане во централната банка, спротивставувајќи се на повиците од претседателот Доналд Трамп за нејзина оставка поради наводи за измама со хипотеки.

„Немам никаква намера да подлегнам на притисоци да се повлечам од мојата позиција поради некакви прашања отворени во еден твит“, наведе Кук во писмена изјава испратена преку портпарол на Фед.

„Имам намера сериозно да ги разгледам сите прашања поврзани со мојата финансиска историја како член на Федералните резерви и затоа ги собирам точните информации за да одговорам на сите легитимни прашања и да ги презентирам фактите“.

Директорот на Федералната агенција за домување и финансии (Federal Housing Finance Agency), Бил Пулт, неодамна ја повика државната обвинителка Пам Бонди да спроведе истрага против Кук во врска со два хипотекарни кредити. Откако „Блумберг њуз“ (Bloomberg News) објави во вторникот вечер за барањето до обвинителството, Трамп во средата наутро на социјалните мрежи побара Кук да поднесе оставка.

Оставката би отворила уште едно место за пополнување во Управниот одбор на Фед, додека претседателот Трамп врши притисок врз централната банка да ги намали каматните стапки. Трамп жестоко го критикуваше претседателот на Фед, Џером Пауел, бидејќи не ги намалил каматните стапки уште пред неколку месеци и предложи и тој да се повлече. Трамп и Пулт исто така жестоко ги критикуваа Пауел и Фед и поради трошоците за тековниот проект за реновирање на седиштето на институцијата.

Пулт на 15 август испратил писмо до Бонди и до претставникот на Министерството за правда, Ед Мартин, во кое сугерирал дека Кук можеби сторила кривично дело. Во писмото се наведува дека Кук „фалсификувала банкарски документи и имотни записи за да добие поповолни услови за заем“, со што, според кривичниот закон, потенцијално извршила измама со хипотеки.

Сè уште не се поднесени обвиненија и не е јасно дали Бонди ќе отвори истрага. Министерството за правда претходно одби да даде коментар за писмото на Пулт.

По објавувањето на изјавата на Кук, Пулт објави на социјалните мрежи: „Напиши што сакаш ти или твоите адвокати, госпоѓице Кук, фатена си врз основа на хипотекарни документи, а не на твит“.

Во интервју со Лора Инграхам на „Фокс њуз“, Пулт изјави дека ако Кук не поднесе оставка, „верувам дека претседателот има причина да ја отпушти“.

Администрацијата на Трамп исто така водеше постапки за наводи за измама со хипотеки против истакнати демократи, меѓу кои сенаторот од Калифорнија Адам Шиф, и државната обвинителка на Њујорк, Летиција Џејмс. Двајцата се долгогодишни политички противници на Трамп и двајцата ги негираа обвинувањата во овие случаи.

Пулт, во интервју за Си-ен-би-си (CNBC) во средата, ја оцени измамата со хипотеки како „егзистенцијална закана“ за Федералните банки за домување што ги надгледува неговата агенција.

„Ќе ја гониме“, изјави тој.

Но издвојувањето поединечни потрошувачки кредити од страна на Федералната агенција за домување и финансии (ФХФА) е реткост.

„Од мое искуство, не е вообичаено да се гледаат вакви интензивни проверки на документи за поединечни заеми“, изјави Бен Клубс, поранешен главен заменик-советник и вршител на должноста главен советник во Министерството за домување и урбан развој (ХУД) во администрацијата на Бајден.

„Ако ова навистина е некаква рутинска случајна проверка, тогаш е невообичаено резултатот од тоа да бидат тројца јавни функционери од Демократската партија и тие поднесоци да бидат објавени во детали“.

Сенаторката од Масачусетс, Елизабет Ворен, водечка демократка во Сенатската комисија што има надзор врз агенцијата на Пулт, изјави дека администрацијата на Трамп „не смее да ја користи федералната влада како оружје за незаконски да разрешува независни членови на Управниот одбор на Фед“.

„Долго време сум застапничка за тоа функционерите на Фед да бидат одговорни“, изјави Ворен.

„Но секој може да види дека веќе со месеци претседателот Трамп очајнички бара изговор за да ги заплаши или разреши претседателот Пауел и членовите на Управниот одбор на Федералните резерви, додека ја префрла вината на сите други освен на самиот себе за тоа како неговите неуспешни економски политики им штетат на Американците“.

 

Во моментов нема коментари за веста. Биди прв да коментира...

Остави коментар