Помалку работници повеќе работат – расте продуктивноста во македонската индустрија

Продуктивноста во земјите од Европската унија се зголеми за само 0,1 отсто во првиот квартал од 2026 година, покажуваат податоците на европската статистичка служба, Евростат.

За разлика од почетокот на оваа година, во последниот квартал од 2025 година, продуктивноста на трудот беше зголемена за 0,8 отсто според бројот на лица и за 0,7 отсто според работните часови, во споредба со истиот квартал од претходната година.

Продуктивноста на трудот се зголеми во повеќето земји од ЕУ. Во Данска растот е најголем и изнесува 4,8 отсто во споредба со првиот квартал од 2025 година. Следна се Литванија и Словенија со раст на продуктивноста од 3,5 и 2,7 отсто соодветно.

Пад на продуктивноста има во Ирска, земјата која ги повлече надолу и бројките на БДП во ЕУ во првиот квартал и во Италија. Во Ирска продуктивноста се намали за близу 17 отсто, а во Италија за 0,3 отсто.

Силен раст на продуктивноста на македонската индустрија во март

Продуктивноста во македонската индустрија во март бележи силен раст од 6 отсто. Март беше прв месец годинава кога продуктивноста беше во плус. Благодарение на добрата бројка за третиот месец од 2026 година, кварталниот раст изнесуваше само 1 отсто што е најлош резултат од крајот на 2024 година.

Во исиот период, од крајот на 2024 година, бројот на работници во македонската индустрија е во постојан пад.

Последниот податок се однесува на бројот на работниците во април годинава се намалил за 2,3 отсто споредено со истиот месец лани. За четири месеци од 2026 година намалување изнесува три отсто на годишно ниво.

Во првите четири месеци од оваа година најмногу работници се изгубени во текстилниот сектор. Во производството на облека годинава работат 11.4 отсто помалку работници од истиот период лани. Овој податок е само продолжение на трендот кој трае со години. Од 2021 година досега, бројот на работници во производството на облека е намален за над 37 отсто.

„Ова не е привремено забавување. Ова значи дека македонската текстилна индустрија го губи нивото што го имаше во општеството порано. Тоа најдобро се гледа по бројот на вработени и нивното учество во вкупниот број на вработени. Ако 2007 година бројот на вработени во текстилната индустрија изнесувал 10 отсто од вкупниот број вработени, сега тој процент изнесува 4 отсто“, изјави неодамна за ТВ Блумберг Адрија Ангел Димитров, претседател на Одборот на директори на  „Мода“ од Свети Николе.

Со помалку работници, производството расте

За разлика од бројките за бројот на работници во индустријата, податоците за индустриското производство се во пораст. По лошиот старт на годинава,  март и април покажуваат позитивни бројки.

„Во април месец оваа година индустриското производство порасна за цели 7,6 отсто споредено со април месец минатата година. И со тоа во првите четири месеци од годината, во првата третина од 2026 година, како ретко која држава во Европа имаме индустриско производство коешто ни е во позитива, мала, од 0,2 отсто, но не е во негатива“, изјави по објавувањето на овој статистички податок премиерот Христијан Мицкоски.

Сепак, бизнисмените се претпазливи. Надевајќи се дека растот ќе биде постојан, оставаат простор дека станува збор за моментален тренд.

„Мора да бидеме многу внимателни. Рано е да зборуваме за целосна стабилизација затоа што она што се случува на Блискиот Исток и цените на енергентите не покажуваат дека ќе имаме стабилизација. Големите економии будно ги следат овие промени и се повлекуваат, внимателни се со нарачките и создавањето залихи“, вели Владанка Трајкоска, претседателка на Организацијата на работодавачи за ТВ Блумберг Адрија.