Губењето на независноста на Федералните резерви (Фед) би претставувало „сериозна опасност“ за светската економија, изјави претседателката на Европската централна банка (ЕЦБ), Кристин Лагард, во интервју за француското радио „Класик“ (Classique).
Лагард оцени дека американскиот претседател Доналд Трамп би имал „многу тешка задача“ ако се обиде да ја преземе контролата врз Фед, потсетувајќи дека постојат законски заштити што го спречуваат отстранувањето гувернери на централната банка.
„Ако успее, тоа ќе претставувало многу сериозна закана за економијата на САД и за глобалната стабилност“, рече Лагард. „Монетарната политика има клучна улога во одржувањето на ценовната стабилност и оптималната вработеност во земјата.“
Според неа, автономијата на Фед е клучна за стабилноста на најголемата светска економија, а секое мешање во таа независност би имало последици и надвор од САД.
Изјавата доаѓа во време кога Трамп отворено го напаѓа Фед, барајќи драстично намалување на каматните стапки. Тој веќе се обиде да ја отпушти гувернерката Лиза Кук, која моментално по судски пат се бори против разрешувањето.
Говорејќи за состојбата во Европа, Лагард истакна дека ЕЦБ ја постигнала својата цел за ценовна стабилност, со инфлација од 2 отсто, и дека ќе продолжи да презема мерки за да ја задржи инфлацијата под контрола.
Очекувањата се дека на следниот состанок, политиката на каматните стапки ќе остане непроменета, бидејќи повеќето креатори на политиката сметаат дека тековното ниво од 2 отсто е соодветно. ЕЦБ исто така оцени дека ризиците од инфлација се „широко балансирани“, а европската економија покажува „отпорност“, и покрај геополитичките тензии и трговските бариери.
Лагард додаде дека неодамнешното подобрување на трговските односи меѓу ЕУ и САД значително ја намалило неизвесноста во економската перспектива.
.webp){kind=icon}
Во моментов нема коментари за веста. Биди прв да коментира...