Кина им препорачува на компаниите да не ги користат чиповите H20 на „Енвидија“

Кина ги повика домашните компании да избегнуваат користење на процесорите H20 на „Енвидија“ (Nvidia Corp.), особено за намени поврзани со владата, што ги отежнува обидите на производителот на чипови да надомести милијарди изгубени приходи од Кина, како и потегот без преседан на администрацијата на Трамп да ги претвори тие продажби во значителен приход за американската влада.

Во изминатите неколку недели кинеските власти испратиле известувања до низа компании со кои ги советуваат да избегнуваат користење на помалку напредните полупроводници, велат лица запознаени со ситуацијата, кои побарале анонимност поради чувствителноста на информациите. Насоките биле особено остри против употребата на H20 за каква било работа поврзана со владата или националната безбедност од страна на државни претпријатија или приватни компании, велат тие.

Освен на „Енвидија“, пошироката иницијатива на Пекинг влијае и на ВИ-акцелераторите од „Адвенсд мајкро дивајсис“ - АМД (Advanced Micro Devices Inc. – AMD), брифира изворот, иако не е јасно дали некое од писмата конкретно го споменало чипот MI308 на АМД. Двете компании неодамна добија одобрување од Вашингтон да ја продолжат продажбата на помалку напредни ВИ-чипови во Кина, под контроверзен и правно спорен услов – да ѝ отстапуваат на американската влада 15 отсто од приходот поврзан со тие продажби. Сега, „Енвидија“ и АМД се соочуваат со предизвикот нивните кинески клиенти се под притисок од Пекинг да не ги вршат тие набавки.

Некои од писмата на Пекинг до компаниите содржеле и низа прашања, посочува изворот, како на пример зошто ги купуваат чиповите H20 на „Енвидија“ наместо локалните алтернативи, дали тоа е неопходен избор имајќи ги предвид домашните опции и дали забележале какви било безбедносни проблеми кај хардверот на „Енвидија“. Известувањата се совпаѓаат со извештаи во државните медиуми што ги доведуваат во прашање безбедноста и доверливоста на процесорите H20. Кинеските регулатори ја информирале „Енвидија“ за своите сомнежи, која, пак, останува на ставот дека нејзините чипови не содржат такви безбедносни слабости.

Во моментов најстрогите насоки на Кина за чиповите се ограничени на чувствителни намени, ситуација што потсетува на начинот на кој Пекинг ги ограничи возилата на „Тесла“ (Tesla Inc.) и ајфоните (Apple Inc. iPhones) во одредени институции и локации поради безбедносни причини. Владата на Кина во еден момент исто така ја забрани употребата на чиповите на „Мајкрон технолоџи“ (Micron Technology Inc.) во критична инфраструктура.

Сепак, можно е Пекинг да ги прошири построгите насоки за „Енвидија“ и АМД на поширок спектар ситуации, брифира извор упатен во разговорите, кој рече дека тие дискусии се во рана фаза.

АМД одби да коментира, додека „Енвидија“ во писмено соопштение наведе дека „H20 не е воен производ ниту е наменет за владина инфраструктура“.

Кина има доволно домашни чипови, додаде „Енвидија“, и „ниту се потпирала ниту некогаш ќе се потпира на американски чипови за владини операции“.

Кинеското Министерство за индустрија и информатичка технологија и администрацијата за сајбер на Кина не одговорија на барањата за коментар, за текстот што се темели на разговори со повеќе од шест извори запознаени со политичките дискусии во Пекинг. Белата куќа, пак, не одговори на барањето за коментар испратено надвор од вообичаеното работно време.

Ставот на кинеската влада може да го отежни пласирањето на хардверот на „Енвидија“ и АМД на најголемиот пазар за полупроводници во светот. Исто така, отвора прашања за објаснувањето на администрацијата на Трамп зошто САД дозволуваат таков извоз само неколку месеци откако практично го забранија. Повеќе високи американски функционери изјавија дека нивното повлекување на забраната е дел од трговскиот договор со Кина, но Пекинг јавно нагласи дека обновените пратки на H20 не се дел од никаков билатерален договор. Последните известувања од Кина до компаниите укажуваат дека азиската земја можеби воопшто не сакала таква отстапка од Вашингтон.

Грижите на Пекинг се во две насоки. Прво, кинеските власти стравуваат дека чиповите на „Енвидија“ би можеле да имаат функции за следење локација и далечинско исклучување – нешто што компанијата остро го демантира.

И покрај негирањата од „Енвидија“, администрацијата на Трамп разгледува можност локациското следење – доколку навистина постои – да се искористи како алатка за откривање и спречување шверц на забранети чипови во Кина. Истовремено некои американски законодавци предложија нов закон што би наложил задолжителна проверка на локацијата за сите напредни ВИ-чипови.

Втората причина е амбицијата на Пекинг да ја зајакне домашната индустрија за полупроводници и да ги поттикне кинеските компании да преминат од западни кон локални производи. Властите и порано ги охрабрувале фирмите да се ориентираат кон домашни чипови наместо кон процесорите H20 на „Енвидија“ и вовеле стандарди за енергетска ефикасност што овој модел не ги исполнува. Сепак, засега не е воведена целосна забрана за хардверот, кој беше развиен специјално за кинескиот пазар со цел да се усогласи со американските ограничувања за продажба на напредни чипови.

Чипот H20 има помала компјутерска моќ од врвните модели на „Енвидија“, но неговиот силен пропусен опсег на меморијата е особено погоден за фазата на препознавање и заклучување во развојот на ВИ – моментот кога моделите препознаваат обрасци и извлекуваат заклучоци. Тоа го прави посакуван производ за компании како „Алибаба груп“ (Alibaba Group Holding Ltd.) и „Тенсент“ (Tencent Holdings Ltd.) во Кина, каде што домашниот лидер во чипови, „Хуавеј“ (Huawei Technologies Co.), се соочува со тешкотии да произведе доволно напредни компоненти за да ја задоволи побарувачката. Според процена на функционери од администрацијата на Бајден – кои разгледувале, но не вовеле контроли врз продажбата на H20 – губењето на пристапот до овој чип на „Енвидија“ би го направило од три до шест пати поскапо за кинеските компании да ја спроведуваат оваа фаза врз напредни ВИ-модели.

„Пекинг, изгледа, ја користи регулаторната неизвесност за да создаде затворен пазар доволно голем за да ја апсорбира понудата на ‘Хуавеј’, а сепак да дозволи купување  чипови H20 за покривање на реалните потреби“, изјави Ленарт Хајм, истражувач фокусиран на ВИ во истражувачката организација РЕНД (RAND), во врска со напорите на Кина да ги одврати компаниите од користење американски ВИ-чипови. „Ова укажува дека домашните алтернативи сè уште се недоволни, и покрај притисокот на Кина врз странските доставувачи“.

Претседателот Доналд Трамп во понеделникот го нарече чипот H20 „застарен“, велејќи дека Кина „веќе го има во поинаков облик“. Тоа ги повтори претходните изјави на претставници од неговата администрација, кои ја бранеа одлуката за продолжување на извозот на H20 со образложение дека ‘Хуавеј’ веќе нуди чипови споредливи со H20. Според нив, САД треба што е можно подолго да го одржуваат кинескиот ВИ-екосистем зависен од помалку напредна американска технологија, за да ја лишат ‘Хуавеј од приходите и знаењето што би ги добила од поширока клиентска база.

H20 на „Енвидија“ е послаба верзија од врвните ВИ-чипови
Администрацијата на Трамп вели дека Кина веќе има подобра технологија од H20

 

Bloomberg

Првите лиценци за H20 на „Енвидија“ и MI308 на АМД беа издадени нешто повеќе од една недела по изјавата на Бесент – откако извршниот директор на „Енвидија“, Џенсен Хуанг, се сретна со претседателот, а двете компании се согласија да го делат приходот од продажбите во Кина со американската влада.