Нервозните пазари го очекуваат извештајот на „Енвидија“ – што велат аналитичарите

Американскиот берзански пазар се подготвува за еден од најважните моменти годинава – објавата на кварталните резултати на компанијата „Енвидија“ (Nvidia). Перформансите на технолошкиот лидер би можеле да го одредат правецот на целиот индекс S&P 500, предупредуваат економистите, додека нервозата на пазарот ја поттикнуваат повеќе фактори. Ажурираните податоци за работењето компанијата ќе ги објави в среда, по затворањето на берзата во САД.

Фирмата што развива специјализирани чипови за гејминг, вештачка интелигенција (ВИ) и дата-центри е најголемата поединечна компонента на споменатиот референтен индекс, па затоа претставува системски важен фактор за поширокиот пазар на капитал.

„Резултатите на ’Енвидија‘ за вториот квартал од 2025 година би можеле да го одредат тонот на целото тргување со акции. ’Енвидија‘ носи речиси осум отсто тежина во S&P 500, повеќе од која било друга компанија“, истакнува аналитичарот на „Блумберг Адрија“ Руди Лукачиќ. Тој додава дека се очекува значителна нестабилност во врска со објавата на резултатите, со предвидени шест отсто поместувања во двата правца, што на ниво на целиот индекс значи потенцијално поместување од околу 0,8 отсто. Тоа би било повеќе отколку во случај на објавување клучни економски показатели, како што се податоците за вработеност или инфлација.

Откако „Енвидија“ кон крајот на мај го објави претходниот извештај за финансиското работење (за првиот квартал), нејзините акции пораснаа речиси за 30 отсто. Уште повпечатлив е податокот дека од априлската турбуленција предизвикана од воведувањето на американските царини тие скокнаа за повеќе од 70 отсто, додавајќи притоа над 1,8 отсто на индексот S&P 500 ( најмногу од сите компании).

Да потсетиме, мајскиот извештај на „Енвидија“ ги надмина очекувањата во делот на приходите, но истовремено покажа дека добивката е под притисок поради ограничувањата што администрацијата на САД ги постави за извоз на напредни чипови во Кина. И покрај значителниот еднократен трошок, настанат поради намалена побарувачка за чиповите H20 како последица на новите извозни правила, инвеститорите реагираа позитивно и ја зголемија цената на акциите. Резултатите на тој начин ја потврдија континуираната силна побарувачка за ВИ-акцелераторите на „Енвидија“, но ги нагласија и геополитичките предизвици со кои се соочи технолошкиот гигант.

Акциите на компанијата во моментов се тргуваат за околу 180 долари, а повеќе од 90 отсто од аналитичарите ја препорачуваат за купување. „Просечната целна цена неделава е зголемена на околу 194 долари, што укажува на потенцијален раст од околу девет до 13 отсто, додека некои проценуваат дека цената може да достигне и до 240 долари“, пренесува Лукачиќ.

Очекувањата во пресрет на новиот извештај се, без сомнение, исклучително високи: економистите предвидуваат 46 милијарди долари приходи (што претставува годишен раст од 54 отсто во споредба со првото полугодие минатата година) и 1,01 долар заработка по акција (скок од 48 отсто, исто така во споредба со првото полугодие лани). „Покрај остварените приходи, набљудувачите ќе ги интересираат и очекувањата на ’Енвидија‘ за идните периоди“, потсетува аналитичарот на „Блумберг Адрија“.

Инаку, клучни купувачи на микрочиповите на компанијата се другите водечки имиња од технолошкиот сектор: „Мајкрософт“ (Microsoft), „Алфабет“ (Alphabet), „Амазон“ (Amazon) и „Мета“ (Meta). Тие заедно сочинуваат околу 40 отсто од вкупните приходи на „Енвидија“. И што е уште поважно, напоменува аналитичарот, сите овие фирми најавија нови големи вложувања (вредни милијарди долари) во дата-центри и ВИ-инфраструктура, што му дава поддршка на идниот раст на приходите на „Енвидија“.

Што може да ја расипе среќата

Сепак, Лукачиќ предупредува дека останува неизвесност околу кинескиот пазар, односно прашањето дали компанијата ќе може да ги продава своите производи во таа азиска земја. Администрацијата на Доналд Трамп претходно месецов им даде дозвола на „Енвидија“ и на уште една компанија – „Адванст мајкро дивајсис“ (Advanced Micro Devices – AMD) – да продолжат со продажбата во Кина, но под услов 15 отсто од приходите да им ги префрлат на американските власти.

Bloomberg

„Проблемот сега е што американската администрација тврди дека дозволува продажба на H20 затоа што е речиси застарен, а Кина го сфати тоа како навреда. Освен тоа, Пекинг е загрижен дека САД ги користат чиповите на ’Енвидија‘ за создавање ’задни врати‘ во кинескиот технолошки сектор“, изјави главниот пазарен стратег на „Џоунстрејдинг“ (Jonestrading), Мајкл О’Рурк, пренесе „Блумберг“. За појаснување, терминот „задни врати“ (англ. backdoors) се однесува на скриен пристап до систем или податоци без знаење или дозвола на корисникот.

Сепак, актуелниот оптимизам на инвеститорите укажува дека тие очекуваат технолошкиот гигант на крајот повторно да ја врати својата позиција во Кина.

Од друга страна, скептиците на берзанскиот пазар веќе подолго време предупредуваат дека можеби станува збор за преголем апетит за ризик кога станува збор за „Енвидија“, како и дека воопшто целиот ентузијазам околу ВИ достигнал врв. Како што забележува главниот пазарен стратег во компанијата „Би Рајли Велт“ (B. Riley Wealth), Арт Хоган, често се случува „Енвидија“ да ги објавува резултатите токму во моменти кога технологијата е под знак прашалник, додавајќи дека фирмата сепак „има потенцијал да биде позитивен катализатор“ за пазарот на капитал.

„Со индексот S&P 500 се тргува со P/E (англ. price-to-earnings ratio – однос меѓу цената и заработката по акција) од 24 пати, додека акциите на самата ’Енвидија‘ имаат вредност на овој параметар од 34 пати, што претставува многу високи вреднувања, односно акцијата на ’Енвидија‘ е, условно кажано, скапа. Прашањето е колку долго акцијата може да расте пред едно мало разочарување во резултатите на компанијата да го прекине тој раст и да поттикне корекција на вреднувањата кон пониски нивоа“, наведува Лукачиќ.

Дополнителен притисок врз американскиот берзански пазар деновиве вршат и макроекономските фактори, како инфлацијата, политиката на Федералните резерви и глобалните геополитички тензии, кои можат да влијаат врз довербата на инвеститорите. Така, оваа неделна еуфорија околу ВИ и „Енвидија“ како една од водечките компании во таа област доаѓа веднаш по внимателно проследениот говор на претседателот на Фед, Џером Пауел, кој барем накратко им ја врати надежта на пазарите за долгоочекуваното намалување на каматните стапки во септември. што доведе до закрепнување на пазарот во САД, откако индексот S&P 500 со денови бележеше пад.

Сепак, како што избледе почетниот оптимизам за можно намалување на каматните стапки, американската актива на почетокот на неделава поевтини. Еуфоријата стивна бидејќи на Волстрит се појавија сомнежи околу темпото на тие намалувања, додека трговците се подготвуваат за потенцијално неповолни податоци за инфлацијата. Омилената мерка на Фед за следење на базичната инфлација најверојатно пораснала минатиот месец, индексот на цените на лична потрошувачка (без храна и енергенти), според процените, скокнал за 2,9 отсто во однос на истиот период лани. Тоа би бил најбрзиот годишен раст во последните пет месеци.

Во моментов нема коментари за веста. Биди прв да коментира...

Остави коментар