Резултатите на „Енвидија“ се одлични, но акциите паѓаат

Највредната светска компанија, „Енвидија“, објави млаки прогнози за раст на приходите во тековното тримесечје, со што сигнализираше забавување на растот по две години на огромни скокови благодарение на трошоците за вештачка интелигенција.

Приходите од продажба во третиот фискален квартал, кој завршува во октомври, би требало да се движат околу 54 милијарди долари, објави компанијата во средата во соопштение. Иако тоа е во согласност со просечните процени на Волстрит, некои аналитичари прогнозираа повеќе од 60 милијарди.

Прогнозите само ја зголемија загриженоста дека ритамот на инвестиции во системи за вештачка интелигенција (ВИ) е неодржлив. Проблемите во Кина, исто така, ѝ го отежнаа работењето на „Енвидија“. Иако администрацијата на Трамп неодамна ги ублажи ограничувањата за извоз на дел од процесорите за ВИ во таа држава, тоа ублажување сè уште не се преточило во раст на приходите.

По објавата на компанијата, цената на акциите падна за околу три проценти во електронското тргување по затворањето на берзите. Од почетокот на годината па до тој момент, нивната вредност пораснала за 35 проценти, а благодарение на тоа пазарната капитализација на компанијата скокна на над четири трилиони долари.

За време на разговорот со аналитичарите во средата, раководството на компанијата ги отфрли тврдењата дека опаѓа интересот за имплементација на инфраструктура за ВИ.

Огромни шанси

„Шансите пред нас се огромни“, изјави главниот извршен директор Џенсен Хуанг. „До крајот на деценијата очекуваме дополнителни трошоци од 3 до 4 трилиони долари за инфраструктура за ВИ“, додаде тој.

Компанијата одобри и дополнителни 60 милијарди долари за откуп на сопствени акции. На крајот на второто тримесечје, „Енвидија“ имаше на располагање уште 14,7 милијарди долари од претходниот план за откуп.

Bloomberg

Приходите од продажба во второто фискално тримесечје, кое заврши на 27 јули, скокнаа за 56 проценти на 46,7 милијарди долари. Просекот на прогнози на аналитичарите беше 46,2 милијарди. Иако растот значеше дури 16 милијарди долари поголеми квартални приходи во споредба со истиот период претходната година, тоа беше најнискиот релативен скок во последните две години.

Одделот на компанијата за дата-центри, дивизија која сега сама по себе е поголема од кој било друг производител на процесори, оствари приходи од 41,1 милијарда долари. Просечната прогноза беше 41,3 милијарди. Приходите од компјутерски игри – што некогаш беше главен извор на приходи за „Енвидија“ – изнесуваа 4,29 милијарди долари. Аналитичарите во просек прогнозираа 3,8 милијарди. Одделот за автомобилска индустрија донесе 586 милиони долари, нешто помалку од прогнозите.

САД – Кина

Резултатите покажаа дека инвестициите на големите оператори на дата-центри „би можеле да ја намалат маржата доколку повратот од примената на вештачка интелигенција на краток рок и понатаму остане тешко мерлив“, напиша во порака до клиентите Џејкоб Борн, аналитичар во компанијата „Емаркетер“.

„Енвидија“ и понатаму се бори со последиците од сè поголемите тензии на релацијата САД – Кина, кои делумно се вртат и околу технологијата на полуспроводници. Администрацијата на Трамп во април ги заостри рестрикциите за извоз на процесори за дата-центри во Кина, со што ефективно ја исфрли „Енвидија“ од тој пазар. Вашингтон потоа ги ублажи ограничувањата со порака дека ќе дозволи делумен извоз, но за тоа бара 15 проценти од приходите од таквиот извоз.

Оддалечување од американската технологија

Од Пекинг истовремено повикуваат на оддалечување од користењето на американска технологија во ВИ системите што ги користи кинеската власт. Промената на политиката им ја отежна на аналитичарите од Волстрит изработката на прогнози за тоа колкави приходи „Енвидија“ би можела да оствари на тој пазар. Дел од нив очекуваат милијарди долари, додека други одбија да прогнозираат било какви приходи од кинескиот пазар сè додека не се разјасни ситуацијата за компанијата.

 

Michael Nagle/Bloomberg

Пред објавата на финансиските извештаи, разликите меѓу најниските и највисоките прогнози на аналитичарите што ја следат компанијата за третиот квартал изнесуваа околу 15 милијарди долари. Станува збор за еден од најголемите распони на прогнози во историјата на компанијата.

Од „Енвидија“ соопштија дека во второто тримесечје не забележале никакви приходи од продажба на H20 процесори на кинески купувачи, што претставува пад од околу четири милијарди долари во однос на претходниот период. Компанијата не ја вклучи продажбата на H20 процесори ниту во своите прогнози за третиот квартал.

Висока пречка

Од „Енвидија“ предупредија и дека американските власти сè уште ги немаат претворено во регулатива своите планови за земање 15 проценти од приходите од продажбата на ВИ процесори во Кина. Тие ги објаснија и ризиците што произлегуваат од таквата политика.

„Било какви барања на американската влада за процент од нашата продажба можат да нè претворат во мета за судски тужби, да ги зголемат нашите трошоци и да ја загрозат нашата конкурентност, при тоа одат во корист на нашите конкуренти на кои тоа не се однесува“, порачаа од „Енвидија“.

Во конечниот биланс, во сегашното тримесечје во Кина би можеле да се испорачаат H20 процесори во вредност меѓу две и пет милијарди долари, наведоа тие. Бројката зависи од добивањето дозволи од американските власти – пречка што досега ја поминале „малку“ купувачи.

Bloomberg

„Кога би имале повеќе нарачки, би можеле и повеќе да наплатиме“, изјави за време на разговорот со аналитичарите главната финансиска директорка Колет Крес. Таа додаде дека компанијата продолжува да ги наговара американските власти да дозволат во Кина продажба и на помодерни верзии на Blackwell процесорите.

„Приликата за воведување на Blackwell процесорите на кинескиот пазар е реална“, рече Хуанг. „Мораме само да продолжиме да повторуваме колку е важно за американските технолошки компании да можат да водат и да останат во трката за вештачка интелигенција“, додаде тој.

Ако „Енвидија“ би смела да извезува и помодерни процесори на азиските пазари, би можела да ја искористи предноста и таму, на пазар вреден 50 милијарди долари, смета Хуанг. Огромната побарувачка за ВИ системи во Кина значи дека пазарот ќе расте за 50 проценти годишно, нагласи тој.

Најуспешна приказна

Под негово водство, 32-годишната компанија стана најуспешната приказна на технолошката индустрија. „Енвидија“ во најголем дел од својата корпоративна историја живееше во сенка на поголемите ривали како Интел, заработувајќи умерено од производство на графички процесори за гејмери.

Пресвртницата дојде кога своите графички процесори ги приспособи за модели на вештачка интелигенција, создавајќи нешто што Хуанг го нарекува забрзано пресметување.

Уште во 2022 година, „Енвидија“ беше мала компанија во споредба со Интел и бележеше помали годишни приходи од тие што денес ги остварува во едно тримесечје. Денес на „Енвидија“ ѝ се насмевнуваат годишни приходи од 200 милијарди долари – а до 2028 година бројката би можела да надмине и 300 милијарди. Тоа би значело дека компанијата ќе држи околу една третина од вкупните приходи на целата глобална индустрија за производство на процесори.

Но „Енвидија“ во голема мера зависи од инвестициските планови на неколку компании. „Мајкрософт“, „Амазон“ и други големи оператори на дата-центри се заслужни за околу половина од приходите од продажба. За да го диверзифицира бизнисот, Хуанг се обидува да навлезе и на други пазари нудејќи поширока палета производи. Тоа вклучува и продажба на комплетирани персонални компјутери, опрема за компјутерски мрежи, софтвер и други услуги.

Тој се посвети и на поширокото прифаќање на ВИ технологијата низ целата економија, а истовремено на своите тимови им диктира висок ритам во создавањето нов хардвер и софтвер.

Без предизвикувач

Компанијата со седиште во Санта Клара, Калифорнија, засега нема предизвикувач на пазарот на своите ВИ процесори познати како акцелератори. Внатрешни обиди, како оние во Амазон, или пак рани предизвици од потенцијални ривали како „Адвенсд мајкро дивајсес“, сè уште не го загрозија значајно нејзиниот пазарен удел.

Но пред компанијата стојат и други тешкотии. Освен проблемите со кинескиот пазар, најголема кочница за растот е понудата. Како и другите производители на процесори, „Енвидија“ нема сопствени фабрики, туку се потпира на надворешно производство – најмногу на „Тајван семикондактор“. Зголемувањето на производството на нови технологии и понатаму останува предизвик.

Во моментов нема коментари за веста. Биди прв да коментира...

Остави коментар