Трамп тврди дека бил жртва на „тројна саботажа“ во ОН, бара итна истрага

Претседателот на САД, Доналд Трамп, побара итна истрага по наводената „тројна саботажа“ за време на неговиот говор на Генералното собрание на Обединетите нации во вторникот. Тој на социјалните мрежи објави дека серија технички проблеми, вклучувајќи застој на ескалаторот, неработење на телепромптерот и проблеми со аудиосистемот, биле намерни акции со цел да му се наштети.

„НАЈГОЛЕМА СРАМОТА се случи вчера во Обединетите нации – не еден, не два, туку три многу зли настани!“, напиша Трамп на својата објава на Трут соушал (Truth Social) во средата, опишувајќи ги случките.

Трамп, кој зборуваше во Њујорк во вторникот, го започна својот говор со коментар за техничките проблеми, изјавувајќи: „Еве што добив од Обединетите нации: лош ескалатор и лош телепромптер“. Претседателот додаде и дека аудиото било „целосно исклучено“.

Портпаролот на генералниот секретар на Обединетите нации, Стефан Дујарик, изјави дека генералниот секретар веќе наредил длабинска истрага и дека ОН ќе соработуваат со американските власти за целосна транспарентност во утврдувањето на причините за инцидентите.

„Пред неколку дена токму ескалаторот што води до главната говорница се заглави и застана“, изјави Трамп. „Неверојатно е што Меланија и јас не паднавме на острите метални рабови. Само затоа што се држевме за потпирачот, се спасивме од катастрофа“, продолжи тој. Претседателот тоа го нарече „саботажа“ и побара да бидат уапсени оние што го направиле тоа.

ОН го објаснија техничкиот проблем

Портпарол на ОН изјави дека застанувањето на ескалаторот било резултат на „вграден механизам за безбедност“, кој се активирал кога Трамп и неговата сопруга се обиделе да го користат ескалаторот. Како можен предизвикувач на овој проблем, ОН го наведоа видеографот од американската делегација.

Трамп исто така ја опиша и ситуацијата со телепромптерот, кој бил „целосно темен“ кога тој започнал да зборува. Иако на крајот започнал да функционира, претседателот изјави дека бил информиран по неговиот говор дека аудиото во салата било „целосно исклучено“, така што светските лидери не можеле да го слушнат неговиот говор без да користат слушалки за превод.

Американскиот амбасадор при ОН, Мајк Волц, изјави дека амбасадата поднела формално барање за истрага, поддржувајќи го ангажманот на Тајната служба на САД. Волц рече дека бараат резултати од внатрешната истрага на ОН за да се утврди причината за застанувањето на ескалаторот и дали тоа било намерна саботажа.

„Обединетите нации не можат да го игнорираат ова“, рече Волц, истакнувајќи дека инцидентите ја покажуваат слабоста на институцијата и претставуваат сериозни безбедносни ризици.

Белата куќа побара истрага

Портпаролката на Белата куќа, Каролин Левит, исто така побара истрага, повикувајќи на итно расчистување на инцидентите. Во својата објава на социјалните мрежи, Левит нагласи: „Ако некој во ОН намерно го запрел ескалаторот додека влегувале претседателот и првата дама, тој треба веднаш да биде отпуштен и ставен под истрага“.

Во прилог на нејзиното барање, Левит го сподели и написот од британскиот весник „Тајмс“, кој претходно објавил дека некои вработени во ОН се шегувале дека можат да ги исклучат ескалаторите и лифтовите поради пристигнувањето на Трамп.

Во моментов нема коментари за веста. Биди прв да коментира...

Остави коментар